Փաստ ինֆո

Տնտեսական մրցակցության պաշտպանության պետական հանձնաժողովն ավարտել է դիմակների շուկայի ուսումնասիրությունը։

Ազգային ժողովում այսօր ՏՄՊՊՀ նախագահ Գեղամ Գևորգյանն ասաց, որ դիտարկել են դեկտեմբերից-մայիս ժամանակահատվածը և համեմատել են խոշոր 7 ընկերությունների մարժաները և գնային քաղաքականությունները. «Նախնական ունենք հետևյալ պատկերը։ Ներկրումը թանկացել է մոտ 10 անգամ, բայց բացի այդ ներկրման արժեքի թանկացումից, տնտեսվարողները մի հատ մեծածախ գնում են իրականացնում, որտեղ մարժա է գումարվում, այնուհետև մի հատ էլ մանրածախ վաճառքի վրա է մարժա կիրառվում, և այս մարժաների չափը մեզ անհանգստացրել է ու դրա հիման վրա էլ ուսումնասիրությունն ենք իրականացնելու»,-ասաց Գեղամ Գևորգյանը։

Վերջինս նշեց, որ Ռուսաստանում դիմակը Հայաստանից ավելի թանկ է, Վրաստանում հակառակը՝ ի տարբերություն Հայաստանի ավելի էժան։ Հայաստանում ամենաբարձր դիմակի գինը 220-ն է։ ՏՄՊՊՀ նախագահը նշեց, որ խոսքը գնում է ամենահասարակ դիմակի մասին։

«Մենք ամենալայն սպառման դիմակներն ենք վերցնում, որպեսզի կարողանանք հասարակության վրա ազդեցությունը ճիշտ կարգավորել։ Երկու արտադրություն կա, ինքնարժեքներն ենք հաշվել, հիմա չեմ հրապարակի, որովհետև դրանք առևտրային գաղտնիք են պարունակում, սակայն մի արատավոր երևույթ ևս, երբ մեր Հայաստանի Հանրապետությունում արտադրված դիմակը մեր տնտեսվարող սուբյեկտները ձեռք են բերում մի հատ մեծածախ, հետո նոր տալիս են դեղատնային ցանցերին, այսինքն երկու մարժա է գումարվում»,-նշեց Գեղամ Գևորգյանը։

ՏՄՊՊՀ նախագահը նաև նշեց, որ մտածում են դիմակները հանրային վայրերում ավտոմատ ապարատների միջոցով վաճառելու մասին։ Այս պարագայում դիմակի գինը մոտ 100 դրամով կիջնի, որովհետև միջնորդները դուրս կգան։ Գեղամ Գևորգյանն ասաց, որ գաղափարն այսօր կքննարկվի։

Աղբյուր` Փաստինֆո