Փաստ ինֆո

«Որեւէ բռնություն որեւէ մեկի կողմից դատապարտելի է, առավել եւս, եթե արձանագրվի, որ բռնություն է կիրառվել ոստիկանություն բերված քաղաքացու նկատմամբ»,-«Փաստինֆո»-ի հետ զրույցում ասաց փաստաբան Նորայր Նորիկյանը՝ անդրադառնալով Կապանի ոստիկանության բաժնում տեղի ունեցածին:

Նշենք, որ Կապանի ոստիկանության բաժին բերման էր ենթարկվել Քաջարանի համայնքապետի չորս մերձավոր, որոնցից երեքը ձերբակալվել են։ Բերման ենթարկվածներից մեկը ավելի ուշ ազատ էր արձակվել: Պարզվում է՝Քաջարանի բնակիչ Նվեր Խաչատրյանը սխալմամբ է բերման ենթարկվել ոստիկանություն, նաև բռնության ենթարկվել։ Երեկ Կապանում լարված իրավիճակ էր. Քաջարանցիները հավաքվել էին ոստիկանության բաժնի մոտ ու պահանջում արդարություն։

Ոստիկանությունը հայտնել է, որ Կապանի բաժանմունքում քաղաքացուն բռնության ենթարկելու դեպքի հետ կապված ներքին ծառայողական քննություն է սկսվել:

Իսկ Քննչական կոմիտեի հաղորդագրության համաձայն, Քաջարանի բնակիչներ Գ․ Մ․-ի և նրա ընկերոջ՝ Կ․ Թ․-ի միջև տեղի ունեցած վեճի հանգամանքների պարզաբանման համար Քաջարան համայնքի ղեկավարի կանչով 2020թ. ապրիլի 26-ին՝ ժամը 20:00-ի սահմաններում, Քաջարանի Լեռնագործների փողոցում գտնվող, վերջինիս պատկանող բենզալցակայանի հետնամասում գտնվող չգործող նախկին ռեստորանի շինությունում հավաքվել են համայնքի ղեկավարը և շուրջ 20 հոգի, որտեղ տեղի է ունեցել ծեծկռտուք։

Նորիկյանի խոսքով, ոստիկանությունից պետք է պահանջել ապահովել ծառայողական քննության բազմակողմանիությունն ու օբյեկտիվությունը: « Որքան հասկացա, նաեւ գլխավոր դատախազությունը դեպքի հետ կապված նյութերը ՀՔԾ է ուղարկել: Ես ակնկալում եմ, որ ՀՔԾ-ն նույնպես Քրեական դատավարության օրենսգրքին համապատասխան գործողություններ կիրականացնի եւ եթե առերեւույթ բռնության հանգամանքներ արձանագրված լինեն, ով ուզում է լինի, պետք է պատասխանատվության ենթարկի, այստեղ երկրորդ կարծիք լինել չի կարող»,- հավելեց փաստաբանը:

Փաստաբանը նաեւ ասաց, թե չգիտի՝ ինչ է նշանակում սխալմամբ բերման ենթարկել: «Ես կարծում եմ, որ բերման ենթարկելու քրեադատավարական ընթացակարգը հստակ է, որը սահմանված է Քրեական դատավարության մասին օրենսգրքով եւ իրավասու մարմինները, որոնք օժտված են բերման ենթարկելու դատավարական իրավունքով, պարտավոր են իրենց գործառույթներն իրացնելիս առաջնորդվել ՀՀ օրենսդրությամբ եւ, եթե իսկապես այդպիսի խնդիր է առաջացել, հենց ՀՔԾ-ն պարտավոր է համապատասխան գնահատական տալ բոլորի արարքներին»,-եզրափակեց փաստաբանը:

Աղբյուր` Փաստինֆո