Փաստ ինֆո

Այսօր սա սոցիալական այն կարևորագույն խնդիրն է, որ Ձեր աշխատանքը մի քիչ ավելի օպերատիվ պետք է լինի։ Այս մասին այսօր ԱԺ-ում ասաց «Բարգավաճ Հայաստան» խմբակցության պատգամավոր Նաիրա Զոհրաբյանը՝ դիմելով Տնտեսական մրցակցության պաշտպանության պետական հանձնաժողովի նախագահին։

«Այսօր կենտրոնում մտել եմ առնվազն 12 դեղատուն և անկեղծ ասած, միգուցե իմ բախտը չի բերում, բայց 150, 160 դրամով դիմակ ո՛չ Կենտրոնում, ո՛չ էլ Արաբկիր համայնքում չեմ տեսել։ 210, 220, եղել է տեղ անգամ 230։ Եթե մենք հաշվում ենք, որ մեկ ընտանիքում կա նվազագույնը 4 անձ, և նրանք առնվազն օրվա մեջ գոնե երկու անգամ պետք է դիմակ փոխեն, այլապես այն դառնալու է առողջության համար խիստ վտանգավոր, եթե ճմռթած, կեղտոտ դիմակը պարբերաբար դիմեն։ Ամսական ընտանիքի յուրաքանչյուր անդամ վճարելու է 20 հազար դրամ։ Հիմա այդ վիճակագրությունը Ձեզ չպե՞տք է ստիպի մի քիչ ավելի օպերատիվ լինել Ձեր քայլերում, գործողություններում և չասել՝ դե գիտեք երկարածավալ աշխատանք է, հլը մենք պետք է շարունակենք մոնիթորինգը։ Էդ չգիտե՞ք՝ ովքեր են էդ դիմակներ ներկրողները»,-ասաց Նաիրա Զոհրաբյանը՝ հավելելով, որ 20 դրամով էլ էին գերշահույթ ստանում, հիմա 220 դրամով էլ ստանում են արդեն սուպեր գերշահույթ։

ՏՄՊՊՀ նախագահ Գեղամ Գևորգյանը, արձագանքելով պատգամավորին, ասաց, որ ՀՀ-ում դիմակի գինը 220 դրամն է և կարող են շատ բան իմանալ, բայց դրանք պետք է փաստաթղթավորել. «Որ ասում եք օպերատիվ աշխատանք կատարեք։ Որ լիազորությունը մեր իրականացնենք, որը չենք կատարել։ Օրինակ տեսել ենք 200 դրամով են ծախում դիմակը, պետք է պահանջենք ներմուծման փաստաթղթեր, որ տեսնենք՝ ինչքան է, տեսնենք ում է ծախել, ումից՝ ձեռք բերել, որ մարժան տեսնենք ինչքան է։ Համեմատենք նախորդ ժամանակահատվածի մարժայի հետ, արդյունքում կարողանանք պատասխանատվության ենթարկել։ Եթե օպերատիվ աշխատանք ենթադրվում է, որ զանգեմ ներմուծողներին ասեմ՝ դիմակի գինը 60 դրամի իջեցրեք, թե չէ Ձեզ պատասխանատվության կենթարկեմ, դա կարա լինի, բայց դա կարող է որակվել իմ պաշտոնական լիազորությունների սահմանազանցում»,-ասաց Գեղամ Գևորգյանը։

Աղբյուր` Փաստինֆո