Փաստ ինֆո

ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորումը վերացնելու, գրավով կամ անձնական երաշխավորությամբ փոխարինելու մասին միջնորդությունները մերժելու որոշման դեմ վերաքննիչ բողոքը մայիսի 22-ին մակագրվել է Վերաքննիչ քրեական դատարանի դատավոր Արմեն Դանիելյանին: Այս մասին «Փաստինֆո»-ն տեղեկացավ  դատական տեղեկատվական համակարգից: 

Հիշեցնենք, որ պաշտպանական կողմը ներկայացրել էր Ռոբերտ Քոչարյանի խափանման միջոցը փոխելու երեք միջնորդություն՝ անձնական երաշխավորությամբ ազատ արձակելու, կորոնավիրուսով պայմանավորված խափանման միջոցն ընդհանրապես վերացնելու մասին, ինչպես նաև՝ գրավ կիրառելու մասին։ Ռոբերտ Քոչարյանի համար անձնական երաշխավորություն են ներկայացրել Հայաստանի նախկին վարչապետներ Վազգեն Մանուկյանը, Խոսրով Հարությունյանը, Կարեն Կարապետյանը, Արցախի նախկին վարչապետ Անուշավան Դանիելյանը։ Մայիսի 13-ին Երևանի ընդհանուր իրավասության դատարանը՝ դատավոր Աննա Դանիբեկյանի նախագահությամբ, մերժեց միջնորդությունները,որի դեմ պաշտպանական կողը վերաքննիչ բողոք է ներկայացրել։

Մասնավորապես՝ Հայկ Ալումյանը բողոքով պահանջել է բեկանել , փոփոխել Երևան քաղաքի առաջին ատյանի ընդհանուր իրավասության դատարանի «Խափանման միջոց կալանավորումը վերացնելու կամ փոփոխելու միջնորդությունները քննության առնելու մասին»13.05.2020թ. որոշումը , վերացնել Ռոբերտ Սեդրակի Քոչարյանի նկատմամբ որպես խափանման միջոց ընտրված կալանքը և նրան ազատ արձակել , հակառակ դեպքում ` փոփոխել նրա նկատմամբ կիրառված խափանման միջոցը , որպես խափանման միջոց ընտրելով գրավը կամ ՀՀ նախկին վարչապետներ Վազգեն Մանուկյանի , Խոսրով Հարությունյանի , Կարեն Կարապետյանի , ինչպես նաև Արցախի նախկին վարչապետ Անուշավան Դանիելյանի անձնական երաշխավորությունը: Իսկ պաշտպան Արամ Վարդևանյանի ներկայացրած վերաքննիչ բողոքը դատարան մուտք է եղել մայիսի 20-ին: Նա պահանջում է փոփոխել Երևան քաղաքի առաջին ատյանի ընդհանուր իրավասության դատարանի «Խափանման միջոց կալանավորումը վերացնելու կամ փոփոխելու միջնորդությունները քննության առնելու մասին» 13.05.2020թ. որոշումը`գրավի կիրառումը ճանաչել թույլատրելի և որոշում կայացնել Ռոբերտ Սեդրակի Քոչարյանի նկատմամբ որպես խափանման միջոց կիրառված կալանքը գրավով փոխարինելու մասին , սահմանելով գրավի ողջամիտ չափ:

Հիշեցնենք, որ Արմեն Դանիելյանը այն դատավորն է, որը բեկանել էր Երևանի ընդհանուր իրավասության առաջին ատյանի դատավոր Դավիթ Գրիգորյանի՝ Ռոբերտ Քոչարյանին 2019թ. մայիսի 18-ին ազատ արձակելու և մայիսի 20-ին Ռոբերտ Քոչարյանի և մյուսների գործով գործի վարույթը կասեցնելու և ՍԴ ուղարկելու մասին որոշումները։ Նա ունի ամենացածր վարկանիշը։

Հեղինակ՝ Իզաբել Սահակյան

Աղբյուր` Փաստինֆո