Փաստ ինֆո

Վատիկանում ՀՀ նախկին դեսպան Միքայել Մինասյանի նկատմամբ կալանավորումը որպես խափանման միջոց ընտրելու մասին դատարանի որոշման դեմ վերաքննիչ բողոք է ներկայացվել։ Վերաքննիչ քրեական դատարանից «Փաստինֆո»-ի հարցմանն ի պատասխան հայտնեցին, որ վերաքննիչ բողոքը մակագրվել է դատավոր Սերգեյ Մարաբյանին, իսկ դատարանի աշխատակազմից հայտնեցին, որ դատավորը վարույթ է ընդունել բողոքի քննությունը։

Նշենք, որ Սերգեյ Մարաբյանի վարկանիշը 60 միավոր է։

Ավելի վաղ հայտնել ենք, որ Միքայել Մինասյանը 2020թ մարտի 17֊ին որպես մեղադրյալ է ներգրավվել ՊԵԿ քննչական վարչությունում քննվող քրեական գործի շրջանակներում՝ ՀՀ քրեական օրենսգրքի 310.1 հոդվածի 1-ին մասով՝ ապօրինի հարստացման 2 դրվագ, 314.3 հոդվածով՝ հայտարարարագրում կեղծ տվյալներ ներկայացնելը և 190-րդ հոդվածի 3-րդ մասով՝ հանցավոր ճանապարհով ստացված գույքն օրինականացնելը (փողերի լվացումը): Խոսքն, ըստ քրեական գործի, 1 մլն 200 հազար դոլարի փողերի լվացման մասին է։ Ընդ որում՝ քրեական գործը հարուցվել է 2018թ֊ին։ Հատկանշական է, որ, թեև Մինասյանը որպես մեղադրյալ է ներգրավվել մարտի 17֊ին, սակայն վարույթն իրականացնող մարմինը կալանավորման միջնորդությունը ներկակացրել է մարտի 23֊ին, որը մակագրվել է դատավոր Արտուշ Գաբրիելյանին։

Մայիսի 6-ին Երևանի ընդհանուր իրավասության դատարանը՝ դատավոր Արտուշ Գաբրիելյանի նախագահությամբ, բավարարել է Վատիկանում ՀՀ նախկին դեսպան Միքայել Մինասյանի նկատմամբ կալանավորումը որպես խափանման միջոց ընտրելու մասին քննիչի միջնորդությունը։

Փաստաբան Միհրան Պողոսյանը «Փաստինֆո»-ի հետ զրույցում ասել էր, որ մարտի 17-ին հերթապահ էին Ավան նստավայրի դատավորները, որոնք հայտնի են իրենց անաչառությամբ և վարույթն իրականացնող մարմինը կալանավորման միջնորդությունը ներկայացրել է Արտուշ Գաբրիելյանի հերթապահության ժամանակ, ով հայտնի է՝ տարբեր գործերով իշխանահաճո որոշումներ կայացնելով։

Հեղինակ՝ Իզաբել Սահակյան

Աղբյուր` Փաստինֆո