Փաստ ինֆո

Փաստաբան Երեմ Սարգսյանն այսօր ներկայացրել է ՊԵԿ նախկին նախագահ, «Աստղիկ» բժշկական կենտրոնում  բուժում ստացող Գագիկ Խաչատրյանին մայիսի 22-ին  հարկադրաբար ՔԿՀ  տեղափոխելու ոդիսականը։

Նրա փոխանցմամբ՝ ի սկզբանե ներկայացվել էր, թե  Գագիկ Խաչատրյանը տեղափոխվում է  այլ վայրում  բուժումը շարունակելու համար, ինչի իրավասությունը քրեակատարողական ծառայությունն ունի, բայց հետագայում պարզվել է, որ խոսքն իրականում գնում է խուց տեղափոխելու մասին։ Այս մասին լրագրողների հետ զրույցում ասաց ՊԵԿ նախկին նախագահ Գագիկ Խաչատրյանի փաստաբան Երեմ Սարգսյանը։

Նա նշեց, որ երբ այս փաստը պարզ դարձավ, բժիշկներն անհանգստացան. «Երբ բժիշկները հասկացան, որ հիվանդության բուժումն ընդհատվում է և չի տեղափոխվում բուժման, խնդիր ծագեց և հարց բարձրացվեց՝ արդյոք դուք պահանջում եք, որ դուրս գրենք։ Այդ ժամանակ ինչ-որ անհասկանալի իրադարձություններ սկսեցին տեղի ունենալ, քրեակատարողական բժշկության կենտրոնի նույն բժիշկն անհետացավ, որից հետո «Աստղիկ» ԲԿ գրավոր հարցում կատարեցի ու պատասխան ստացա, որ Գագիկ Խաչատրյանի դուրս գրման հարցը պարզելու համար, իրենք հարցում են ուղարկել ԱՆ քրեակատարողական բժշկության կենտրոն ՊՈԱԿ-ին, որպեսզի այնտեղից ստանան պատասխան՝ դուրս գրվի, թե ոչ և միայն դրանից հետո հարցը կարող է որոշվել։ Նաև նշվեց, որ ժամը 18։36-ի դրությամբ Գագիկ Խաչատրյանը դուրս գրված չէ ու պետական մարմիններից նման կարգադրություն և նախաձեռնություն չկա։ 3-ից 4 ժամ այս խնդիրն ենք բարձրաձայնել և որևէ աշխատակից այդպես էլ նեղություն չքաշեց, որ ճշտի՝ արդյոք այդ պահին դուրս գրված է, թե ոչ ու նախընտրեցին այլ տարբերակ»,-ասաց Երեմ Սարգսյանը։

Վերջինս նշեց՝ պետական պաշտոնյաներն այնքան շահագրգռված են այս գործով, որ իրենք տեղի ունեցող անօրինականությունների մասով խնդիր են բարձրաձայնում, որին պետք է հաջորդեր Արդարադատության նախարարության պաշտոնատար անձանց այն արձագանքը, որ կստուգվեն այդ փաստերը. «Բայց ինչ ասվեց, միանգամից ժամերի ընթացքում նշվեց, որ բոլորը շահագրգիռ են այստեղ ու իրենք որևէ խնդիր չունեն ու այդ որոշումն էլ կայացրել է հիվանդանոցը։ Հիմա՝ հարց, եթե հիվանդանոցն է այդ որոշումը կայացրել, ինչու է այդ գրության մեջ գրված, որ ՊՈԱԿ-ի որոշման հիման վրա է դուրս գրվում»,-ասաց փաստաբանը՝ նշելով, որ հարց են բարձրացրել նաև այն մասին, թե ով պետք է պատասխանատվություն կրի հետագայում այս որոշման համար։ Երեմ Սարգսյանը նկատեց՝ պատահական չէ, որ հիմա փորձ է արվում խնդիրը բարդել այլ մարդկանց վրա։

«Գագիկ Խաչատրյանի անձնական բժշկական գործին ծանոթանալու ընթացքում պարզեցի, որ դրանում առկա է փաստաթուղթ, որ Քրեակատարողական հիմնարկ ՊՈԱԿ-ի տնօրենը գրություն է ուղարկում բժշկական կենտրոնին և առաջարկում է սեղմ ժամկետում քննարկել Գագիկ Խաչատրյանի ստացիոնար բուժումը դադարեցնելու և նրան ՔԿՀ տեղափոխելու հարցը, որը մենք դիտարկեցինք որպես ճնշում քաղաքացիական հիվանդանոցի վրա։ Համապատասխան գրությամբ ՊՈԱԿ-ի տնօրենին պահանջեցինք զերծ մնալ նման ճնշումներից։ Եվ այստեղ պատահական չէ, երբ Արդարադատության նախարարությունն ասում է ժամը 16։00-ին դուրս է գրվել, իրենք իմացել են ու եկել են տեղափոխեն, վստահեցնում եմ, որ քրեակատարողական ծառայությունն այդ մեծ անձնակազմով այնտեղ էր գտնվում ժամը 16։00-ից և չէին կարող նախապես կանխազգալ, որ Գագիկ Խաչատրյանը կարող է դուրս գրվի։ Կա՛մ ով պարտադրել է Գագիկ Խաչատրյանին տեղափոխել ինքն է պատասխանատու, կա՛մ այն բժիշկը, որը դուրս է գրել այն պատճառով, որ չեն տեղափոխելու այլ վայրում բուժում կատարելու»,-նշեց փաստաբանը։

Աղբյուր` Փաստինֆո