Փաստ ինֆո

ԱԺ «Լուսավոր Հայաստան» խմբակցությունը դեռ քննարկում է խորհրդարանական դահլիճ վերադառնալու հարցը։ «Փաստինֆո»-ի հետ զրույցում խմբակցության քարտուղար Գևորգ Գորգիսյանն արձանագրեց, որ իշխանությունները Նիկոլ Փաշինյանի ելույթի միջոցով վստահեցրին, որ տեղի ունեցածը կրկնվելու է, ուստի ԼՀԿ-ն պետք է հոգեբանորեն ու ֆիզիկապես պատրաստ լինի։

«Նիկոլ Փաշինյանին իր ելույթով լեգիտիմիզացրեց ու արդարացրեց այլակարծության նկատմամբ բռնությունն ԱԺ-ում։ Իհարկե, արձագանքը մեր սպասածը չէր, բայց քաղաքական կոնկրետ մոտեցում կար, որն իրենց թիմի ղեկավարի լեզվով և բերանով ասվել է»,-ասաց խմբակցության քարտուղարը։
Նա շեշտեց, որ խմբակցությունը պետք է քննարկի, թե ինչպես են վերադառնալու ԱԺ դահլիճ, այն դեպքում, որ իրենց ցանկացած քննադատական ելույթին կարող են հետևել շշերի հարվածները, բռունցքները և այլն։

«Մենք այդ ամենին հոգեբանորեն ու ֆիզիկապես պատրաստված պետք է գնանք այսուհետ, նաև չբացառելով «պադեզդներում» հաշվեհարդարն ու ասֆալտին փռելը»,-նշեց Գորգիսյանը։

Հարցին, փաստորեն արդեն մտավախություն ունեք, որ խորհրդարանից դուրս էլ հնարավոր է ձեր հանդեպ բռնություններ լինեն, նա պատասխանեց. «Մենք նման մտավախություն չունենք, բայց վարչապետի կոչից հետո ուղղակի պետք է զգուշավոր լինել»։
Հիշեցնենք, որ մայիսի 8-ին ԱԺ-ում ծեծկռտուք էր տեղի ունեցել «Լուսավոր Հայաստան» խմբակցության ղեկավար Էդմոն Մարուքյանի և «Իմ քայլը» խմբակցության պատգամավոր Սասուն Միքայելյանի միջև, որը դադարել էր նրանց գործընկերների միջամտությունից հետո: Տեղի ունեցածին իր գնահատականն էր տվել ՀՀ վարչապետ Նիկոլ Փաշինյանն ու ասել, որ իշխանությունն ամեն օր դառնում է բռնության զոհ սերժական, քոչարյանական հանցավոր բանդայի ու նրանց խորհրդարանական սպասարկումների կողմից։

Նա ընդգծել էր՝ տեղի ունեցածն այլ կերպ, քան քստմնելի սադրանք անվանել հնարավոր չէ. «Բայց ես նաև դատապարտում եմ այն, որ մենք տրվում ենք սադրանքների, իմ եղբորը, իմ ընկերոջը ես դատապարտում եմ, որովհետև մենք իրավունք չունենք տրվել սադրանքների։ Մեզ անընդհատ, ամեն օր ուզում են շեղել մեր արժեքներից, նրանք մեզ ուզում են դարձնել իրենց «պադեզդներում ծեծողներ», նրանք մեզ ուզում են հավասարեցնել «քիլերներին», ուզում են մեզ շեղել մեր արժեքների, ուզում են մեզ հանել հավասարակշռությունից, և այո, այսօր Հայաստանում հաստատված է բացառիկ իրավիճակ, երբ իշխանությունն ամեն օր դառնում է բռնության զոհ սերժական, քոչարյանական հանցավոր բանդայի ու նրանց խորհրդարանական սպասարկումների կողմից»։

Հեղինակ՝ Սոնա Գեւորգյան

Աղբյուր` Փաստինֆո