Փաստ ինֆո

Տիգրան Աթանեսյանի ընտանիքի նկատմամբ ոտնձգությունները կապված են փաստաբանի մասնագիտական գործունեության հետ։ Այս մասին ասուլիսին ասել է ինքը՝ փաստաբան Տիգրան Աթանեսյանը։ 

Նա տեղեկացրեց, որ քաղաքապետ Հայկ Մարությանը տարիներ առաջ սնունդ էր բաժանել իր տան մոտակայքում գտնվող հիմնարկում, որի սեփականատերերի կողմից ոտնձգություններ են եղել իր ընտանիքի նկատմամբ։

«Նրանք շատ սերտ կապեր ունեն ներկայիս իշխանավորների հետ, օրինակ, Հովհաննես Ազոյանը պարբերաբար այնտեղ անհասկանալի միջոցառումներ է կազմակերպում, ինչով են զբաղվում՝ չգիտեմ, ես առավել քան համոզված եմ՝ այն, ինչ տեղի է ունեցել, ունի կազմակերպիչներ», - նշեց Աթանեսյանը։

Նրա կարծիքով՝ դեպքի օրը ոստիկանությունը գտնվել է իր բարձունքի վրա։

«Հիմա խոսքը Դատախազությանն ու Քննչական մարմիններինն է, սպասում եմ քրեական գործի շուտափույթ հարուցման, պահանջելու եմ, որ այդ անձիք ենթարկվեն քրեական պատասխանատվության ու բացահայտվի այդ շղթան», - ասաց Աթանեսյանը՝ նշելով, որ համոզված է, որ սա կապված է իր մասնագիտական գործունեության հետ։

«Նոր իշխանության օրոք տարածում գտած քաղաքական հետապնդումների ժամանակ ևս պաշտպանում եմ այդ քաղաքական հետապնդումների ենթարկվող անձանց»,- ասաց նա։

Աթանեսյանը տեղեկացրեց, որ դիմել է պահնորդական ծառայության, որ իր տանն իրականացվի շուրջօրյա պահպանություն։

Աթանեսյանի խոսքով՝ իրեն չեն ներում, որ ինքը եղել է Նիկոլ Փաշինյանի փաստաբանը և հիմա ունի ամբողջական հակառակ դիրքորոշում Փաշինյանի վարած քաղաքականության շուրջ, թեպետ Փաշինյանի գործով իր դիրքորոշումը մնացել է նույնը։

«Այս ամենը, որ այս երկրում դարձել է հնարավոր, այո, ես մեղադրում եմ այս իշխանությանը, ի՞նչ են դարձրել էս երկիրը՝ հայհոյանքը նորմալ է, փնթի, կենցաղային բառերը դարձել են նորմալ, գրական հայոց լեզու, արդեն երեխային կարելի է հայհոյել ու հարձակվել երեխայի վրա, այո, Նիկոլ Փաշինյանը պատասխանատու է սրա համար, սա իր օրոք է ու հովանավորվում է իր օրոք», - ընդգծեց Աթանեսյանը։

Աղբյուր` Փաստինֆո