Փաստ ինֆո

Երկու օր է, ինչ փաստաբան Տիգրան Աթանեսյանի ընտանիքի նկատմամբ ոտնձգություններ են լինում։ Այս մասին ասուլիսին ասել է փաստաբան Տիգրան Աթանեսյանը։ 

Նրա խոսքով՝ ոտնձգությունները սկզբից եղել են կենցաղային, մասնավորապես՝ փաստաբանի տան մոտ է գտնվում Քանաքեռի հին կինոթատրոնը, հիմա ձայնագրման ստուդիա է։ Այն ունի մանկական հրապարակ և բոլոր երեխաները պարբերաբար խաղում են այդտեղ, մինչդեռ՝ սեփականատիրոջ 40-ամյա որդին պահանջում է, որ Աթանեսյանի երեխաները չխաղան այդ հրապարակում, թեեւ այդ անձի հետ որևէ հարաբերություն չի ունեցել։
Երկրորդ օրը՝ փաստաբանի տան և ստուդիայի միջև բաժանող ճաղավանդակը պատնեշով փակում են։

«Այդ ընթացքում, տեսնելով, որ սրա վրա էլ ռեակցիա չկա, երեխայիս, որ առաջին հարկի պատուհանից նայում է, հայհոյում են՝ ամենավերջին ստոր սեռական բնույթի հայհոյանքներով, տղայիս ցավը տանեմ՝ պատասխանում է։ Հասուն մարդիկ՝ 40-ամյան ամենաերիտասարդն է, մոտենում են ուզում են խփել պատուհանիս , կինս վազում է պատշգամբից դուրս, շուրջ 5-6 րոպե ամենավերջին ստոր հայհոյանքները՝ կնոջս հասցեին»,- ասաց նա՝ հավելելով, որ հասկանում է, որ սադրանք է։

Աթանեսյանը նշեց, որ ահազանգել է և ոստիկաններն իր հետ հավասար հասել են իր տուն և միջադեպը շարունակվել է իր հետ։
«Եթե չլիներ ոստիկանների միջամտությունը, միգուցե այսօր ես ճաղերի ետևում լինեի, որովհետև ինչով կավարտվեր՝ չգիտեմ։ Յուրաքանչյուրդ կհասկանաք, երբ ձեր կնոջ, 7,9,10 տարեկան երեխաների վրա հարձակվեն ոչնչություններ, որոնցից մեկը թմրանյութերի վաճառքով է զբաղվում»,- ասաց Աթանեսյանը: Բացի այդ՝ Աթանեսյանը նշեց, որ պարբերաբար շեշտում էին իր փաստաբան լինելու հանգամանքը։

Փաստաբանի համոզմունքով՝ սա կենցաղային հարց չէ, քանի որ գործող ստուդիան շատ սերտ կապեր ունի գործող իշխանությունների, մասնավորապես Երևանի քաղաքապետ Հայկ Մարությանի հետ։

Աղբյուր` Փաստինֆո