Փաստ ինֆո

Վերաքննիչ քրեական դատարանում՝ դատավոր Արմեն Դանիելյանի նախագահությամբ քննարկվում էր ՊԵԿ նախկին նախագահ Գագիկ Խաչատրյանի կալանքի երկարացման վերաբերյալ բողոքը։ Լրագրողների հետ ճեպազրույցում այս մասին ասաց փաստաբան Երեմ Սարգսյանը։

Նա նշեց, որ ներկայացրել են բոլոր հիմքերն ու հիմնավորումները, որոնց համաձայն Գագիկ Խաչատրյանն անհապաղ պետք է ազատ արձակվի։ Դատարանը հեռացավ խորհրդակցական սենյակ։ Որոշումը կհրապարակվի մայիսի 25-ին։

«Մշտապես երբ ասում էինք, որ Գագիկ Խաչատրյանն ունի վիրահատության կարիք, վարույթ իրականացնող մարմինը ներկայացնում էր շատ կասկածելի պայմաններում, ընդամենը ժամերի ընթացքում ձեռք բերված միջգերատեսչական հանձնաժողովային փորձաքննության եզրակացություն, որի համաձայն ոչ միայն վիրահատության կարիք չուներ, այլև ընդհանրապես բուժման կարիք չուներ։ Այն դեպքում, երբ դեռևս 2019 թվականի օգոստոսին և հուլիսին հենց քննիչի հանձնարարությամբ հսկայական կոնսիլիում էր եղել և արձանագրվել էր, որ ողնաշարի ստենոզ է առկա և վիրահատության կարիք ունի։ Դրանից հետո փորձաքննություն էր եղել, հիվանդությունը հաստատվել էր և հանկարծ երբ դիմեցինք ՄԻԵԴ, որպեսզի միջամտություն լինի, մի քանի ժամվա ընթացքում միջգերատեսչական նոր եզրակացություն ստացվեց, որի համաձայն՝ որևէ բուժման կարիք չունի։ Այսօր դատարանին ներկայացրեցինք պետության կողմից կատարված նոր կոնսիլիում, որ ընդամենը մեկ ամիս առաջ է կատարվել և նորից վերահաստատվել է, որ առկա է ողնաշարի ստենոզ ավելի բացասական դինամիկայով ու անհրաժեշտ է վիրահատական միջամտություն։ Փաստաթուղթը ներկայացրել ենք դատարանին՝ տեսնենք ինչպես պետք է դատարանը գնահատի այս փաստը»,-ասաց Երեմ Սարգսյանը։

Հիշեցնենք, որ ՀՀ ֆինանսների նախկին նախարար, Պետական եկամուտների կոմիտեի (ՊԵԿ) նախկին նախագահ Գագիկ Խաչատրյանն արդեն շուրջ 10 ամիս է, ինչ կալանքի տակ է։ Նա մեղադրվում է 2008-2014թթ. պետական գործունեության ընթացքում թույլ տված ենթադրյալ պաշտոնեական դիրքի չարաշահման և գույքի վատնման գործով։ Գագիկ Խաչատրյանի պաշտպանները բազմիցս բարձրաձայնել են, որ կա վիրահատական միջամտության անհրաժեշտություն, սակայն Գագիկ Խաչատրյանի խափանման միջոցն այդպես էլ չի փոփոխվում:

Աղբյուր` Փաստինֆո