Փաստ ինֆո

Մեկ տարի առաջ Երևան քաղաքի Նաիրի Զարյան փողոց-Ազատության պողոտա հատվածում մեքենան վնասելու գործով երիտասարդներին ներկայացված խուլիգանության մեղադրանքը հիմնավորված չէ։ Վերաքննիչ քրեական դատարանն ուժի մեջ է թողել արդարացման դատավճիռը։

Նշենք, որ խոսքը գնում է 2019թ. հունվարի 17-ին Երևանում տեղի ունեցած միջադեպի մասին, երբ Նաիրի Զարյան փողոց-Ազատության պողոտա հատվածում Opel մակնիշի ավտոմեքենայից դուրս են եկել մի խումբ երիտասարդներ, որպես զենք գործադրվող առարկայի գործադրմամբ կոտրել Mercedes մակնիշի ավտոմեքենայի ապակիները, որից հետո մեկ երիտասարդ ատրճանակով կրակոց է արձակել հեռացող Mercedes ավտոմեքենայի ուղղությամբ։

Դեպքի առթիվ հարուցվել էր քրեական գործ, որի շրջանակներում մեղադրանք էր առաջադրվել 5 երիտասարդի ՀՀ քրեական օրենսգրքի 258-րդ հոդվածի 4-րդ մասի հատկանիշներով՝ որպես զենք օգտագործվող առարկայի գործադրմամբ խուլիգանության համար։ Երևանի ընդհանուր իրավասության դատարանը՝ դատավոր Արտուշ Գաբրիելյանի նախագահությամբ, արդարացրել էր երիտասարդներին խուլիգանության հոդվածով և վերաորակել նրանց արարքը՝ ՀՀ քրեական օրենսգրքի 185-րդ հոդվածի 1-ին մասով՝ ուրիշի գույքը դիտավորությամբ ոչնչացնելու հատկանիշներով։ Դատարանը դադարեցրել է երիտասարդների նկատմամբ քրեական հետապնդումը և կարճել գործի վարույթը՝ տուժողի բողոքի բացակայության հիմքով։ Դատախազությունը համաձայն չի եղել դատարանի գնահատականի հետ։

Երիտասարդների պաշտպան Էրիկ Ալեքսանյանը «Փաստինֆո»-ի հետ զրույցում ասաց, որ դատախազությունը վերաքննիչ բողոք էր ներկայացրել դատական ակտի դեմ՝ պահանջելով բեկանել մեղադրանքի վերաորակման մասին որոշումը և դատապարտել երիտասարդներին խուլիգանության համար։ Բացի այդ՝ պաշտպան Ալեքսանյանը ևս մասնակի բողոքարկել է դատական ակտը՝ նշելով, որ համաձայն է չորս երիտասարդների արարքի վերաորակման որոշման հետ, դատարանը ճիշտ եզրահանգման է եկել, որ արարքում բացակայում է խուլիգանության հանցակազմը և առկա է ՀՀ քրեական օրենսգրքի 185-րդ հոդվածի հատկանիշները, սակայն համաձայն չէ երիտասարդներից մեկի՝ Շանոյանի արարքի վերաորակման հետ, քանի որ տեսանյութում երևում է, որ երիտասարդն անգամ գույքին չի դիպչել, չի հարվածել ո՛չ ձեռքով, ո՛չ այլ առարկայով, ընդամենը մեկնարկային ատրճանակով կրակել է օդ։ Ալեքսանյանը գտնում է, որ Շանոյանի արարքում չկա ոչ միայն խուլիգանության, այլև՝ գույքի վնասման հանցակազմ։ Ալեքսանյանը վերաքննիչ բողոքով խնդրել էր Շանոյանին արդարացնել նաև գույքի վնասման հանցակազմով։

Փաստաբանը հայտնեց, որ Վերաքննիչ քրեական դատարանն այսօր մերժել է դատախազի՝ առաջին ատյանի դատարանի դատավճռի դեմ ներկայացրած բողոքը և 4 ամբաստանյալների մասով որոշումը թողել է անփոփոխ, իսկ պաշտպանական կողմի բողոքը բավարարել և մասնակի բեկանել դատավճիռը՝ ամբաստանյալ Շանոյանին արդարացնելով նաև ՀՀ ՔՕ 185-րդ հոդվածի 1-ին մասով առաջադրված մեղադրանքում։

Հեղինակ՝ Իզաբել Սահակյան

Աղբյուր` Փաստինֆո