Փաստ ինֆո

Դատախազը պնդում է, որ Արամ Վարդանյանի՝ «Վստրեչի Ապերի» տան խուզարկությունն իրականացվել է ձերբակալման որոշման հիման վրա, ավելին՝ կատարվածը նա ներկայացնում է ոչ թե որպես խուզարկություն, այլ՝ զննություն։ «Փաստինֆո»-ի հետ զրույցում ասել է Արամ Վարդանյանի փաստաբան Լուսինե Սահակյանը՝ կատարվածը որակելով աբսուրդ։

«Երբ աբսուրդի մասին խոսում են ոստիկաններն, ովքեր ապօրինություն են կատարել և փորձում են իրենց ապօրինությունն ինչ- որ որոշման տակ քողարկել, ես ինչ որ տեղ հասկանում եմ, թեև իրավական պետությունում դա անհասկանալի է, բայց որ դատախազությունն էլ է նման հայտարարություններ անում, այսինքն ՝ ՀՀ քրեական դատավարության օրենսգրքի բոլոր նորմերից դուրս, դա արդեն անթույլատրելի է»,- ասաց փաստաբանն՝ արձանագրելով, որ այս տրամաբանությամբ՝ ձերբակալման որոշում ունենալու պայմաններում ցանկացած անձի տուն կարող են մտնել, կոտրել-ջարդել, ասել՝ մենք ինչ -որ անձի ձերբակալման որոշում ունենք, մենք իրեն ենք փնտրում ենք։ «Եթե սա թույլատրելի է դատախազության և ոստիկանության համար, ուրեմն պետք է հասկանանք, որ այլևս անկառավարելի է դարձել մեր երկրում ամեն ինչ և թույլատրվում է ամեն ինչ։ Դատախազն այսօր դա էր հիմնավորում, որ այն, ինչ կատարվել է Արամ Վարդանյանի տանն այդ գիշերը, որն իրավական որևէ նորմով կարգավորում չունի, ընդհակառակը՝ իր մեջ մի շարք հանցագործությունների տարրեր է պարունակում, ստացվում է՝ թույլատրելի է»,- ասաց փաստաբանը։

Նրա խոսքով՝ եթե դատախազությունը գտնում է, որ քրեական գործ չի հարուցվելու, նշանակում է, որ այլևս ոչ միայն հանցագործությունների դեմ պայքար չկա, այլև՝ Հայաստանն՝ ի դեմս իրավապահ մարմինների, ընդունում է, որ հանցագործությունները պետք է կատարվեն և դրանք դատախազության և իրավապահ մարմինների կողմից թույլատրելի են։ Սահակյանը վստահեցնում է՝ խնդիրը միայն Արամ Վարդանյանը չէ, այլ այն է, որ Կոնվենցիայի մի շարք նորմերով սահմանված պահանջները խախտելու վերաբերյալ փաստերի առկայության դեպքում պետությունն ունի պարտավորություն՝ անհապաղ արդյունավետ քննություն իրականացնելու և անձանց պատասխանատվության ենթարկելու։

«Այսօր ՀՀ-ն հրաժարվում է կատարել իր պարտականությունները,դրանով իսկ երևում է, որ սա կոնկրետ պետության և համապատասխան մարմինների գործողություններն են եղել, ի սկզբանե ոստիկաններն, ովքեր մուտք են գործել, իմացել են, որ իրենք պատասխանատվության չեն ենթարկվելու»,- ասաց Լուսինե Սահակյանը՝ հավելելով, որ այս խնդիրները բարձրաձայնում են «բեսպրեդելը» կանխելու համար։
Նշենք, որ Արամ Վարդանյանի տնից բացի խուզարկություն է իրականացվել նաև հարակից տներում և դատախազը դատական նիստին պնդում էր, որ իրավապահները կաշկանդված չեն ձերբակալման որոշման հիման վրա անձին փնտրելու տեսանկյունից, այսինքն՝ կարող են ցանկացած վայրում փնտրել անձին՝ ունենալով ձերբակալման մասին որոշում։ Փաստաբան Լուսինե Սահակյանն անդրադարձավ նաև այս հայտարարությանը՝ նշելով, որ անձին ձերբակալման մասին որոշում ունենալը մի բան է և անձը պետք է հայտնաբերվի և ձերբակալվի, բայց, եթե միջամտություն է իրականացվում անձի այլ իրավունքների, օրինակ՝ բնակարան են մուտք գործում, այս պարագայում հստակ է, որ պետք է լինեն համապատասխան որոշումներ։

«Այն գործողությունները, որոնք կատարվել են Արամ Վարդանյանի տանը ոչ զննություն էր, ոչ Արամ Վարդանյանին գտնելու փորձ էր։ Նրանք այնպես չէ, որ փնտրում էին Արամ Վարդանյանին, ակնհայտ էր, որ այստեղ կար բոլորովին այլ նպատակ »,- ասաց նա։

Նշենք, որ մարտի լույս 5-ի գիշերը ոստիկանական մեծ ուժեր՝ դիմակավորված եւ զինված, ներխուժել են Արամ Վարդանյանին ու նրա հարազատներին պատկանող տներ եւ, ինչպես երեւում են հրապարակված կադրերից, կիրառել անհարկի ուժ։ Նշված գործողությունների հետեւանքով տուժել է մանկահասակ թոռնուհին՝ 5 տարեկան։ Արձանագրվել են նաեւ հափշտակության դեպքեր։
Ինչպես արդեն հայտնել ենք՝ մարտի 9-ին Արամ Վարդանյանին որպես մեղադրյալ ներգրավվելու մասին որոշում է կայացվել և նրա նկատմամբ հայտարարվել է հետախուզում։ Նրան մեղադրում են Էմիր Արամյանի կողմից 2016 թվականին կատարված կողոպուտը կազմակերպելու, 2019 թվականին նույն Էմիլի առեւանգումը կազմակերպելու, ապա 2020 թվականի մարտի 4-ին նրա նկատմամբ սպանության փորձ կատարելու մեջ։

Մանրամասները՝ տեսանյութում

Հեղինակ՝ Իզաբել Սահակյան

Աղբյուր` Փաստինֆո