Փաստ ինֆո

ԱԺ «Լուսավոր Հայաստան» խմբակցությունը տեսանելի չի համարում Կոռուպցիայի կանխարգելման հանձնաժողովի աշխատանքների արդյունքները։

Նշենք, որ օրենքով հենց այս հանձնաժողովին է վերապահված բարձրաստիճան պաշտոնատար անձանց, բացառությամբ պատգամավորների, դատավորների և դատախազների, էթիկայի կանոնների, իրավիճակային շահերի բախման կարգավորումների պահպանմանը հետևելը։ Հանձնաժողովն արդեն 6 ամիս է, ինչ գործում է եւ այս ընթացքում բարձրաստիճան պաշտոնյաների կողմից բազմիցս հնչել են վիրավորական արտահայտություններ, պիտակավորումներ, որոնք մնացել են անհետեւանք։

Հանձնաժողովի նախագահը քաղհասարակության ոլորտում աշխատանքի մեծ փորձառություն ունեցող Հայկուհի Հարությունյանն է, որի թեկնածությունը հանձնաժողովում ընտրվելու համար առաջադրվել էր «Լուսավոր Հայաստան» խմբակցության կողմից։ «Փաստինֆո»-ն հետաքրքրվեց խմբակցությունից, թե ինչպես են գնահատում հանձնաժողովի աշխատանքը։

Խմբակցության քարտուղար Գևորգ Գորգիսյանը «Փաստինֆո»-ի հետ զրույցում հայտնել է, որ խմբակցությունը մշտապես կապի մեջ է Կոռուպցիայի կանխարգելման հանձնաժողովի նախագահ Հայկուհի Հարությունյանի հետ ու փորձում է հետևել կառույցի աշխատանքներին։

«Փորձում ենք հետևել որպեսզի հնարավորինս ակտիվ աշխատանքներ իրականացվեն, բնականաբար առանց նրանց աշխատանքին խառնվելու, որովհետև կառույցը պետք է լինի անկախ»,-ասաց Գևորգ Գորգիսյանը։

Նա արձանագրեց, որ Կոռուպցիայի կանխարգելման հանձնաժողովը դեռ նոր է ձևավորվել, և ցավոք, դեռ լուրջ աշխատանք տեսանելի չէ։

«Ցավոք սրտի ՀՀ-ում որևէ քաղաքական մարմին ԱԺ-ում տեղի ունեցած բռնությանը պատշաճ արձագանք չտվեց։ Թեև մեր թեկնածուն կառույցի նախագահն է, բայց այնտեղ միանձնյա ղեկավարում չէ, դա թիմային կառույց է և շատ հարցեր միայն իրենից կախված չեն, ըստ այդմ ամեն ինչ միայն մեր ներկայացրած թեկնածուից պահանջել, կարծում եմ, այդքան էլ արդար չի լինի, հաշվի առնելով այն լծակներն ու գործիքակազմը, որը նա ունի»,-ասաց Գորգիսյանը։

Աղբյուր` Փաստինֆո