Փաստ ինֆո

Մեկուկես ամիս ազատության մեջ մնալուց հետո քրեական հեղինակություն համարվող Վահագն Աբգարյանը, նույն ինքը՝ «Ալավերդցի Վահագնը» նորից կկալանավորվի։ Վերաքննիչ քրեական դատարանը՝ դատավոր Արմեն Բեկթաշյանի նախագահությամբ, բավարարել է գործով տուժողի ներկայացուցչի՝ Աբգարյանին գրավի դիմաց ազատ արձակելու որոշման դեմ վերաքննիչ բողոքը և բեկանել է Աբգարյանին 15 մլն դրամ գրավի դիմաց ազատ արձակելու մասին Լոռու մարզի ընդհանուր իրավասության դատարանի որոշումը։ 

Նշենք, որ Աբգարյանը մեղադրվում է ապօրինի կերպով ռազմամթերք հանդիսացող փամփուշտներ, ակոսափող հրազեն հանդիսացող 2 ատրճանակ ձեռք բերելու, Ալավերդի քաղաքի բնակիչ Կամո Փիրուզյանի սպանությունը կազմակերպելու և սպանության առթիվ հարուցված քրեական գործի շրջանակներում ՔԿ Լոռու մարզային վարչության պետին առանձնապես խոշոր, իսկ քննիչ Արտակ Հովհաննիսյանին՝ խոշոր չափերով կաշառք տալու մեջ։

2020թ ապրիլի 1-ին Լոռու մարզի ընդհանուր իրավասության դատարանը՝ Ս. Գզոգյանի նախագահությամբ, բավարարել էր Աբգարյանի պաշտպան Ինեսսա Պետրոսյանի միջնորդությունը՝ Վահագն Աբգարյանին գրավի դիմաց ազատ արձակելու մասին միջնորդությունը՝ գրավի չափ սահմանելով 15 մլն ՀՀ դրամը։ Ներկայացված միջնորդությունում պաշտպան Պետրոսյանն անդրադարձ էր կատարել նաև ԱՀԿ 2020թ փետրվարի 24-ին հրապարակած զեկույցին և նշել է, որ Վահագն Աբգարյանը գնվում է կորոնավիրուսի վարակման ռիսկային խմբում։ Լոռու մարզի ընդհանուր իրավասության դատարանն արձանագրել էր, որ շարունակվում են առկա լինել ամբաստանյալ Վ.Աբգարյանի կալանքին տակ պահելու պայմանները և հիմքերը: Մասնավորապես շարունակվում է առկա լինել հիմնավոր կասկած առ այն, որ ամբաստանյալ Վ.Աբգարյանն առնչություն ունի իրեն մեղսագրված արարքին: Միաժամանակ Դատարանը փաստում է, որ սույն գործով արդեն իսկ հարցաքննվել է գործի առանցքային վկան և դատարանում հետազոտվել են գաղտնալսումների գերակշիռ մասը, ուստի դրանով հանդերձ չեզոքանում է քրեական դատավարությանը մասնակցող անձանց վրա անօրինական ազդեցություն գործադրելու եղանակով դատարանում գործի քննության խոչընդոտելու հավանականությունը: Ինչ վերաբերում է ամբաստանյալի կողմից քրեական վարույթն իրականացնող մարմնից թաքնվելու և նոր հանցանք կատարելու հանգամանքին, ապա դատարանը գտնում է, որ գրավի կիրառման միջոցով հնարավոր է չեզոքացնել ամբաստանյալ Վ.Աբգարյանի ոչ իրավաչափ վարքագծի դրսևորման հնարավոր ռիսկերը:

Ամբաստանյալ Վ.Աբգարյանի նկատմամբ այլընտրանքային խափանման միջոցի` գրավի կիրառումը ճանաչելով թույլատրելի` դատարանը հաշվի է առել նաև վերջինիս ընտանեկան վիճակը, այն, որ նա ունի երկու երեխա, առողջական վիճակը, վերջինս տառապում է մի շարք հիվանդություններով, բացի նրա նկատմամբ քրեակատարողական հիմնարկում գտնվելու ժամանակ ենթադրաբար գործադրվել է բռնություն, որի հետևանքով ստացել է վնասվածներ և տեղափոխվել բժշկական կենտրոն:

Աբգարյանին գրավի դիմաց ազատ արձակելու որոշումն ընդունելի չի եղել տուժող կողմի և դատախազության համար, նրանք բողոքարկել են դատարանի որոշումը՝ պահանջելով կրկին կալանավորել Աբգարյանին։

Հեղինակ՝ Իզաբել Սահակյան

Աղբյուր` Փաստինֆո