Փաստ ինֆո

Եթե մենք պետք է զուտ մուտաֆորիայի համար մեզ մոտ օրինակ 7-10 օրվա դիմակ պահենք, որն արդյունավետ չէ և ուղղակի անցաթղթի նման ցույց տանք ու անցնենք, կարծում եմ՝ դա զուտ ֆինանսական ծանրաբեռնվածություն է առաջացնելու բնակչության համար։ «Փաստինֆո»-ի հետ զրույցում այս մասին ասաց «Կոնսիլիում» ՀԿ նախագահ Գևորգ Գրիգորյանը՝ անդրադառնալով բաց տարածքում դիմակի պարտադիր առկայության վերաբերյալ որոշմանը։

Հիշեցնենք, որ երեկ Ազգային ժողովը երկրորդ ընթերցմամբ և ամբողջությամբ ընդունեց կառավարության կողմից ներկայացված Վարչական իրավախախտումների վերաբերյալ օրենսգրքում լրացում ու փոփոխություն կատարելու մասին նախագիծը, որի համաձայն՝ բաց վայրերում դիմակի առկայության բանակը խախտելը կառաջացնի 10 հազար դրամ տուգանքի սահմանում։

Գևորգ Գրիգորյանը գտնում է, որ բաց տարածքում դիմակ պետք է կրել միայն մարդաշատ վայրերում. «Դիմակ կրելն ինքնագիտակցության մի մասն է։ Մարդը պետք է հասկանա,որ եթե մտնում է մարդաշատ վայր, խանութ կամ փակ տարածք, ցանկալի է դիմակ կրել։ Բայց միևնույն դիմակը 10 օր կրելն արդյունավետ չէ։ Նույն դիմակը կրել, հետո գրպանը դնել ու կրկին կրել, արդյունավետ չէ։ Կարծում եմ՝ մենք հիմա ոչ թե պետք է քննարկենք դիմակի հարցը, այլ պետք է քննարկենք՝ ինչ է ուզում կառավարությունը մեզանից։ Պարտադիր է դիմակը, թե ոչ։ Ինչո՞ւ այն ժամանակ, երբ ասում էինք պարտադիր է, իրենք ասում էին, որ պարտադիր չէ։ Ինչո՞ւ այն ժամանակ, երբ ասում էինք՝ զգույշ եղեք, իրենք ասում էին, որ խուճապ ենք տարածում, իսկ հիմա իրենք են խուճապ տարածում։ Գտնում եմ, որ դիմակը գրպանում պահելու առումով դա անիմաստություն է, իսկ ժողովրդի ֆինանսական ծանրաբեռնվածության առումով ժողովուրդն է ընտրել այս կառավարությունը, ժողովուրդն է տվել այդ մանդատը նրանց և ժողովուրդն էլ թող մտածի այդ ուղղությամբ։ Կա՛մ թող դիմանա, կա՛մ թող իշխանությունը փոխի»,-ասաց բժիշկը՝ հավելելով, որ պետական մակարդակով ժողովրդին անարդյունավետ գործողություններ պարտադրելն առնվազն անլուրջ է։

Վերջինիս արձանագրեց, որ հիվանդության կանխարգելումը տապալված է, քանի որ տարածված հիվանդությունն այլևս չի կարելի կանխարգելել։ Գևորգ Գրիգորյանի կարծիքով այժմ մենք պայքարում ենք հիվանդության դեմ, միևնույն ժամանակ փորձում ենք բուժել հիվանդներին. «Խնդիրը կայանում է նրանում, որ կառավարության մոտ ոչ այն կոմպոնենտն է ստացվում, ոչ էլ այս։ Ո՛չ կարողանում են բուժել, որովհետև տեսնում ենք, որ մահերի թվերն աճում են, ո՛չ էլ կարողանում են տարածումը կանխել։ Ես չգիտեմ, թե նրանք մեզանից ինչ են ուզում։ Համոզված եմ, որ նախարարությունից նույնպես այդ հարցին չեն կարողանալու պատասխանել, և նախարարի որակումով դա կոչելու են անհեթեթ հարց։ Դա շատ պարզ հարց է, որը շատ երևույթների վրա լույս կսփռի»,-նշեց Գևորգ Գրիգորյանը։

Անդրադառնալով կորոնավիրուսի վճարովի թեստավորումներն արգելելու որոշմանը՝ Գևորգ Գրիգորյանը նշեց, որ ոչ պետական լաբորատորիաներում կամ ոչ պետական ծրագրով թեստավորումներն արգելելը կատարյալ հիմարություն է, ինչի հետևանքով ավելի քիչ թեստավորումներ են լինելու։ Բացի այդ բժիշկը գտնում է, որ դա նաև մարդու իրավունքներն է ոտնահարում. «Օրինակ` ես ուզում եմ գնամ վճարովի թեստ հանձնեմ ու հասկանամ՝ հիվանդ եմ, թե ոչ։ Դա արգելված է, ես էլ գանգատներ չունեմ ու պետության հաշվին չեմ կարող թեստ հանձնել։ Այսինքն՝ դա իմ և ինձ նման շատերի իրավունքի ոտնահարում է։ Երբ նայում ենք իշխանության տեսանկյունից, ապա նրանք ուզում են վերահսկել բոլոր թվերը, որպեսզի հետագայում էլ կարողանան դրանք կիրառել իրենց քաղաքական մանիպուլյացիաների մեջ։ Այսօր և մոտակա 15-20 օրերին էլ կորոնավիրուսով վարակակիրների թիվն իմ գնահատմամբ դարձել է քաղաքական շահարկումների առիթ, այլ ոչ թե իրական պատկեր։ Նրանք ի սկզբանե փորձեցին քիչ վարակակիր ցույց տալ, թվերն աճեցին ու նրանք խառնվեցին։ Հիմա փորձում են այդ թվերը տեղավորել օրական վարակվածների մեջ, կորցնեն այդ թվերը և դրանում նրանց օգնության է հասել նախկին փոխնախարար Սամվել Մարգարյանը։ Վարչապետը և նախարարը, երբ մեծ-մեծ խոսում են, որ նախկինի վերադարձ չկա, այսօր նախկինից օգնություն են խնդրում, որպեսզի կարողանան դուրս գալ իրենց եփած ճաշից»,-ընդգծեց Գևորգ Գրիգորյանը։

Նշենք, որ օրեր առաջ Առողջապահության նախարարությունը հայտարարություն էր տարածել այն մասին, որ վճարովի հիմունքներով կորոնավիրուսային հիվանդության հարուցիչի նկատմամբ թեստավորման իրականացումն անթույլատրելի է և վտանգավոր, քանի որ այդ աշխատանքների նկատմամբ լիարժեք վերահսկողություն իրականացնել հնարավոր չէ. «Լաբորատորիաների կողմից կարող են գնվել և կիրառվել տարբեր զգայունություն և մասնահատկություն (սպեցիֆիկություն) ունեցող թեստ-հավաքածուներ՝ կասկածի տակ դնելով ստացված արդյունքների հավաստիությունը, բուժման ճիշտ մարտավարության ընտրությունը և արդյունավետությունը, ինչպես նաև անորոշություն առաջացնելով վարակի վերահսկմանն ուղղված հետագա միջոցառումների կազմակերպման և իրականացման հարցում»,-նշված է հայտարարությունում։

Հեղինակ՝ Հասմիկ Կոշկարյան

Աղբյուր` Փաստինֆո