Փաստ ինֆո

«Վարչապետը իր ասուլիսին մոտավորապես ներկայացրեց, որ օրինական դուրս է եկել ՀՀ տարածքից, ըստ իր վարկածի, բայց ինչու չի հասել Աֆղանստան եւ գնացել է Կրասնոդար պետք է իրավապահ մարմինները պարզեն: Կարծես թե խոսքն այն մասին է, որ տեղ չի հասել այնտեղ ուր պետք է գնար, դա էլ, կարծում եմ ՝ մաքսանենգության մի ձեւ է»,- «Փաստինֆո»-ի հետ զրույցում ասաց «Թրանսփարենսի ինտերնեշնլ» հակակոռուպցիոն կենտրոնի ծրագրերի ղեկավար Վարուժան Հոկտանյանը՝ անդրադառնալով Հայաստանից դեպի Ռուսաստան տեղափոխված ծխախոտի խոշոր մաքսանենգության դեպքերին:

«Որքան ես գիտեմ, արտակարգ դրության պայմաններում բեռնափոխադրումները արգելված չեն, մի դեպքում դա գնացել էր Աֆղանստան՝ որպես բեռնափոխադրում, մյուս դեպքում, որպես լայն սպառման ապրանք էին փոխադրել եւ խնդիրը նրանում չէ, որ բեռնափոխադրում չպետք է տեղի ունենար, այլ նրանում է, թե ինչու դա տեղի ունեցավ այդպես: Սպասենք իրավապահներին, ես անձամբ ուզում եմ լսել իրավապահ մարմինների բացատրությունները, որովհետեւ այստեղ առաջին հերթին մենք գործ ունենք մաքսանենգության դեպքի հետ, ինձ համար ակնհայտ է, որ սա մաքսանենգություն է»,-ասաց Հոկտանյանը՝ շեշտելով, որ օբյեկտիվ քննությամբ իրավապահները պետք է պարզեն, թե ովքեր են կանգնած այդ մաքսանենգության հետեւում:

Արդեն տեղեկացրել ենք, որ ռուսալեզու EADaily-ը հաղորդել էր, որ ՌԴ Վորոնեժ քաղաքի օդանավակայանում հայտնաբերվել է Հայաստանից ժամանած մաքսանենգ ծխախոտի նոր խմբաքանակ: Ըստ աղբյուրի, բեռը հայտնաբերվել էր տրանսպորտային ոստիկանության կողմից, որն այն ուղարկել է փորձաքննության: Այնուհետեւ Սուրբ Աթոռում ՀՀ նախկին դեսպան Միքայել Մինասյանը ֆեյսբուքյան ուղիղ եթերում հայտարարեց, որ մայիսի 9-ին Հայաստանից տնտեսական ապրանքների անվան տակ 18 տոննա 831 կիլոգրամ մաքսանենգ ծխախոտի առգրավման մասին։ Իսկ ավելի վաղ, ապրիլի 25-ին ՌԴ Անվտանգության դաշնային ծառայության աշխատակիցները մաքսային ծառայության աշխատակիցների հետ համատեղ գործողությունների արդյունքում Կրասնոդար քաղաքի օդանավակայանում Հայաստանից ժամանած խոշոր խմբաքանակի ծխախոտ էին առգրավել: Լրատվամիջոցներում տեղեկություն հայտնվեց այն մասին, որ գործարքը համակարգվել է ՀՀ վարչապետի ընտանիքի անդամների կողմից: Մասնավորապես, շոշափվեց ՀՀ վարչապետ Նիկոլ Փաշինյանի տիկին Աննա Հակոբյանի եղբոր՝ պատգամավոր Հրաչյա Հակոբյանի անունը:

Նշենք, որ փաստերի առթիվ դեռեւս քրեական գործ չի հարուցվել: Մեր հարցին, արդյո՞ք այս հանգամանքը կասկածելի չէ, Վարուժան Հոկտանյանը պատասխանեց, թե իր ունեցած տեղեկություններով, հետաքննությունն սկսվել է եւ հույս հայտնեց, որ քրեական գործ կհարուցվի: «Ես ինքս իրավաբան չեմ եւ չգիտեմ, թե սովորաբար ո՞ր փուլում է գործը հարուցվում: Ես սպասում եմ, որ այդ գործը հարուցվի, երբ ես ասում եմ, թե ով է կանգնած այդ ամենի մեջքին, դրանից կերեւա, դա ինչ-որ մեկի անհատական նախաձեռնությո՞ւնն է, թե խառնված են պաշտոնատար անձինք, սա բացահայտելը պետք է լինի հետաքննության իմաստը»:

Վարուժան Հոկտանյանը տարօրինակ չի համարում , որ քաղաքական իշխանությունն այս դեպքերի առիթով լուռ է . «Իսկ լռության փոխարեն ի՞նչ էիք ակնկալում, ի՞նչ պետք է իրենք ասեին: Քաղաքակիրթ մոտեցումը սա է՝ նախ հետաքննություն սկսել, իրավապահ մարմինները պետք է ասեն: Ես էլ իրենց տեղը լինեի, հղում կանեի իրավապահ մարմիններին: Խնդիրն այն չէ՝ աղմուկ են բարձրացրել, հերքում են, լռում են… հարցը նրանում է, թե որքա՞ն օբյեկտիվ կլինի հետաքննությունը եւ նախաքննությունը»:

Հարցին, արդյո՞ք օբյեկտիվության հետ կապված կասկածներ կան, Վարուժան Հոկտանյանը պատասխանեց. «Այո, ունեմ կասկածներ, կապված այն բանի հետ, որ հեղափոխությունը դեռ չի նշանակում, որ մինչեւ վերջ արմատախիլ է արվում ամեն ինչ, ես նախորդիվ հրապարակային ելույթներում ասել եմ, որ եթե ասվում է, որ հիմա համակարգային կոռուպցիա չկա, դա դեռ չի նշանակում, որ դրա նախապայմանները եւ արմատները վերացած են»:

Վարուժան Հոկտանյանը հիշեցրեց իրենց կազմակերպության կողմից հրապարակված կոռուպցիայի ընկալման համաթվի մասին, որով Հայաստանը ամենամեծ առաջընթացն էր գրանցել 2019 թվականին, բայց Հոկտանյանը շեշտեց, զեկույցում հատուկ նշվել էր՝ Հայաստանն այն երկրների ցանկում էր, որոնք ուշադրության արժանի էին, իսկ արդյո՞ք առաջընթացը կշարունակվի: «Երբ մեթոդաբանությունը նայում ենք, տեսնում ենք ՝ հիմանկանում 2018-ի վերջ, 2019 սկիզբ, այսինքն, առաջին եռամսյակ: Փորձագետները այդ հարցը դնում էին, թե արդյո՞ք այդ ամենը անշրջելի է, թե՞ հետո կլինի լճացում»:

Բանախոսը չի կարծում, որ եթե հեղափոխություն է եղել, դրանից հետո ամեն ինչ կլինի օբյեկտիվ, հոյակապ եւ ամենաբարձր մակարդակով: «Սպասենք, տեսնենք : Սա կլինի ամենալուրջ լակմուսային թղթի տեստը, որը ցույց կտա, թե որքանով ենք մենք ձգտում նոր համակարգ կառուցել: Ես ուզում եմ օպտիմիստ լինել : Քիչ առաջ զրուցում էինք եւ ես բերեցի Սինգապուրի վարչապետի ՝ հայտնի Լի Կուանյուի օրինակը, ով չկանգնեց այն բանի առաջ, որ իր ամենամոտ բարեկամներն ու ընկերներն էին ներքաշված կոռուպցիայի մեջ, նա չկանգնեց նրանց պատժելու առաջ, եթե բացահայտվի այդպիսի բան , ուրեմն անկախ զբաղեցրած դիրքից եւ վարչապետի հետ ազգակցական կամ ընկերական կապից, պետք է պատժվեն: Ես անձամբ հակված չեմ այդ բացահայտումները այն ձեւով պատկերացնել, որ նրանք անպայման կապված լինեն, հնարավոր է կա այդ կապը, հնարավոր է՝ չկա, դրա համար պետք է օբյեկտիվ հետաքննություն լինի եւ անկախ դեմքերից, լինեն պատիժներ: Դա ինչքանո՞վ կարվի, կլինի նոր իշխանությունների գլխավոր տեստը, թե որքանով են նրանք պատրաստ լրջորեն պայքարել կոռուպցիայի դեմ»,-եզրափակեց Վարուժան Հոկտանյանը:

Աղբյուր` Փաստինֆո