Փաստ ինֆո

Արամ Վարդանյանի տան խուզարկությունն իրականացվել է ձերբակալման որոշման հիման վրա։ Այս մասին դատական նիստին ասել է դատախազը՝ նշելով, որ դատախազություն ներկայացված հաղորդումն ուղարկել է ոստիկանություն՝ ծառայողական քննության։

Դատախազի փոխանցմամբ՝ ոստիկանությունը նշանակել է ծառայողական քննություն, որի ընթացքում ոստիկանության ծառայողների գործողություններում ապօրինությունների չեն հայտնաբերվել, սակայն հաստատվել է, որ Արամ Վարդանյանի տանից անհետացել են որոշակի իրեր։ Դատախազը տեղեկացրեց, որ այդ մասով հարուցվել քրեական գործ՝ գողության հատկանիշներով և ՀՔԾ-ում իրականացվում է նախաքննություն։

Բացի այդ՝ դատախազը, մատնանշելով Վճռաբեկ դատարանի նախադեպային որոշումը, նշեց, որ ներկայացված ամեն հանցագործության մասին հաղորդում չէ, որ պետք է ստուգման ենթարկել։ Նախագահող դատավորի դիտարկմանը, որ դատախազը պարբերաբար օգտագործում է գրություն, նամակ արտահայտությունները՝ հանցագործության մասին հաղորդման փոխարեն՝ վկայակոչելով վճռաբեկ դատարանի որոշումը, թե յուրաքանչյուր հաղորդում չէ, որ համարվում է հանցագործության մասին հաղորդում, դատախազը նշեց, որ դա քննարկվել է ոչ թե որպես հանցագործության մասին հաղորդում, այլ՝ որպես դիմում։

Նախագահող դատավորի ճշգրտող հարցին, թե արդյո՞ք դատախազը հաստատում է, որ սա հանցագործության մասին հաղորդում է, դատախազը նշեց, որ հանցագործության մասին հաղորդում է՝ գողության մասով։ Նրա խոսքով՝ ծառայողական քննության ընթացքում է հաստատվել, որ կորել են որոշակի իրեր։

Դատախազը պնդեց, որ տան խուզարկությունն իրականացվել է օրինական հիմքերով՝ ձերբակալման որոշման հիման վրա, Նորք Մարաշ վարչական շրջանների դատախազի կողմից հսկողություն է իրականացվում, մինչդեռ՝ դատարանն արձանագրեց, որ ոստիկանություն ուղարկված դիմումը չի եղել Նորք Մարաշ վարչական շրջանների դատախազի կողմից։

Ինչ վերաբերում է Արամ Վարդանյանի 5-ամյա թոռան, դստեր ներկայությամբ ատրճանակների մերկացմանը՝ դատախազն ասաց, որ դա լրացուցիչ ստուգման կարիք ունի, ինչին ի պատասխան դատարանն արձանագրեց, որ դատախազությունը մասամբ է ընդունում հանցագործության մասին հաղորդումը։
Նախագահող դատավոր Գագիկ Պողոսյանի դիտարկմանը, թե արդյո՞ք կարելի է ենթադրել, որ դատախազությունն ի վիճակի չէ որոշում կայացնել առանց ոստիկանության կողմից որոշում կայացնելու, դատախազն ասաց, որ դա միանշանակ այդպես չէ։
Հաջորդ հարցով դատավորը հետաքրքրվեց, թե արդյո՞ք խուզարկության ժամանակ եղել են քաղաքացիական հագուստով անձինք, դատախազը պատասխանեց, որ չգիտի։

Բացի այդ՝ նախագահող դատավորը հայտնեց, որ բողոքում նշված է, որ բացվել են պահարանների դռները, մահճակալներն են տակնուվրա արվել, իսկ պահարանները եղել են նաև տարբեր չափերի, բացվել են նաև փոքր պահարանները, որտեղ չափահաս տղամարդ չի կարող տեղավորվել,ինչին ի պատասխան դատախազն ասաց, որ դա դեռևս պարզ չէ և փորձել են պարզել ծառայողական քննության ընթացքում։

Դատարանը դիմեց փաստաբաններին՝ պարզելու, թե ինչ են նկատի ունեցել նման տվյալներ ներառելուց, փաստաբան Լուսինե Սահակյանն ասաց, որ կոտրտված են եղել փոքրիկ պահարանները, մահճակալները տակնուվրա էր արված, կոտրված էին դռները, պատուհաններն էին կոտրվել, որոնց վերաբերյալ նկարահանումները հետագայում կներկայացնեն քննությանը։

Դատարանի ՝ դատախազին ուղղված դիտարկմանը, թե ձերբակալման մասին որոշման հիման վրա խուզարկություն կատարվել է ոչ միայն տվյալ անձի տանը, այլև՝ հարակից տներում, խուզարկվել է մի ամբողջ թաղամաս, դատախազը պատասխանեց, որ չկա կաշկանդվածություն ՝ անձին այլ վայրերում փնտրելու համար, կարող են մուտք գործել ցանկացած վայր, որտեղ կարող է գտնվել անձը։

Բացի այդ՝ փաստաբան Լուսինե Սահակյանն ասաց, որ ոստիկանությունում կատարված ծառայողական քննության արդյունքներն իրենց չի տրամադրվել և միջնորդեց՝ ստանալ ծառայողական քննության նյութերը դատարանի միջոցով։

Ավելի վաղ տեղեկացրել ենք, որ Արամ Վարդանյանի փաստաբան Լուսինե Սահակյանը հանցագործության մասին հաղորդում էր ներկայացրել դատախազություն՝ Արամ Վարդանյանի տան խուզարկության ժամանակ կատարված ապօրինությունների վերաբերյալ։ Հանցագործության մասին հաղորդումը դատախազությունն ուղարկել է ոստիկանություն՝ ծառայողական քննության, մինչդեռ՝ փաստաբանները գտնում են, որ ոստիկանությունը չի կարող գնահատական տալ սեփական գործողությունների վերաբերյալ։ Հաղորդման հիման վրա քրեական գործ է հարուցվել՝ տանից հափշտակությունների դեպքի վերաբերյալ։ Փաստաբանները պահանջում են քրեական գործ հարուցել և պատասխանատվության ենթարկել խուզարկության ժամանակ ապօրինություններ թույլ տված ոստիկաններին։ հակառակ դեպքում՝ մերժել քրեական գործի հարուցումը, մինչդեռ՝ այս պարագայում, փաստաբանների գնահատմամբ, հաղորդմանն ամբողջությամբ չի քննարկվել։

Նշենք, որ մարտի լույս 5-ի գիշերը ոստիկանական մեծ ուժեր՝ դիմակավորված եւ զինված, ներխուժել են Արամ Վարդանյանին ու նրա հարազատներին պատկանող տներ եւ, ինչպես երեւում են հրապարակված կադրերից, կիրառել անհարկի ուժ։ Նշված գործողությունների հետեւանքով տուժել է մանկահասակ թոռնուհին՝ 5 տարեկան։ Արձանագրվել են նաեւ հափշտակության դեպքեր։

Ինչպես արդեն հայտնել ենք՝ մարտի 9-ին Արամ Վարդանյանին որպես մեղադրյալ ներգրավվելու մասին որոշում է կայացվել և նրա նկատմամբ հայտարարվել է հետախուզում։ Նրան մեղադրում են Էմիր Արամյանի կողմից 2016 թվականին կատարված կողոպուտը կազմակերպելու, 2019 թվականին նույն Էմիլի առեւանգումը կազմակերպելու, ապա 2020 թվականի մարտի 4-ին նրա նկատմամբ սպանության փորձ կատարելու մեջ։

Հեղինակ՝ Իզաբել Սահակյան

Աղբյուր` Փաստինֆո