Փաստ ինֆո

Արթուր Դանիելյանը հարցաքննության է հրավիրվել իր հետ կապ չունեցող գործով։ Այս մասին լրագրողների հետ զրույցում ասաց «Ադեկվադ» միաբանության անդամ Լիլիթ Թումանյանը։ 

Նա վստահեցնում է, որ Դանիելյանը մասնակցություն չի ունեցել, ականատես չի եղել, վկա չի եղել։

Թումանյանի կարծիքով՝ գործը վերաբերում է Հակոբ Բերբերյանի և նրա լայվին, սակայն նշեց, որ գործին չի ծանոթացել։

Հարցին, թե արդյո՞ք նա պատրաստվում է մնալ, Թումանյանն ասաց, որ կմնա որքան հնարավոր է, որովհետև վստահ չէ, որ բերման չեն ենթարկի։

«Հրահանգն ի սկզբանե այնպիսին է, որ այստեղ մարդ չպետք է մնա և մարդիկ պետք է չցուցաբերեն իրենց քաղաքացիական աջակցությունը որևէ քաղաքական գործչի»,- ասաց նա։

Ինչ վերաբերում է բերման ենթարկված քաղաքացիներին փաստաբանական օգնություն ցուցաբերելուն, Լիկա Թումանյանն ասաց. «Մեր իրավաբանը նույնպես բերման ենթարկվեց և պետք է հասկանալ, թե այս պարագայում ով է զբաղվելու»։ Նա տեղեկացրեց, որ բերման ենթարկված իրավաբանը Գարեգին Պետրոսյանն է։

Լիլիթ Թումանյանի փոխանցմամբ՝ «Ադեկվադ» միաբանության անդամներից մոտավորապես 20 հոգի բերման է ենթարկվել ոստիկանության աշխատակիցների կողմից։

«Պաշտոնական բացատրությունն այն է, որ չեն ենթարկվել պարետի որոշմանը, բայց ես տեղյակ եմ, որ միաբանության անդամները պահպանել են սոցիալական հեռավորություն։ Չի եղել որևէ խախտում, հակառակը, ոստիկաններն են ավելի շատ», - ասաց Լիլիթ Թումանյանը՝ հավելելով. «Իրականում սոցիալական հեռավորության պահպանումը և, առհասարակ, արտակարգ դրության ռեժիմի պահպանումն արվում է բացառապես որպես քաղաքական մահակ։ Ընտրողական մոտեցում է ցուցաբերվում, որովհետև հիմա Կասկադում, եթե զբոսնեք, կտեսնեք ավելի շատ մարդ ավելի փոքր տարածքում։ Խնդիրը և դրդապատճառները քաղաքական են» ։

Աղբյուր` Փաստինֆո