Փաստ ինֆո

Ցավում եմ, բայց չեմ հասկանում, թե ինչու չեք անդրադառնում այն փաստին, որ պետությունը մինչև այս տարվա դեկտեմբերի 31-ը մաքսատուրքերից ազատել է դիմակների ներկրումը։ Պետությունն իր այս քայլն արել է։ ԱԺ ամբիոնից ասաց «Իմ քայլը» խմբակցության պատգամավոր Սիսակ Գաբրիելյանը՝ դիմելով «Բարգավաճ Հայաստան» խմբակցության պատգամավորներին, որոնք դժգոհում էին դիմակների բարձր գներից։

«Եկեք ընդմիջմանն իրար հետ գնանք Չինաստանի շուկաներն ուսումնասիրենք, եթե դուք այնտեղ 0,33 ցենտից էժան դիմակ գտնեք, ես կհամաձայնեմ ձեզ հետ, որ Հայաստանում դեղատներում գերշահույթ են ապահովում։ Ուսումնասիրել եմ ամբողջ չինական շուկան, ամենաէժան դիմակը 0,33 ցենտ է, որը մոտավորապես 150 դրամ է»,-ասաց պատգամավորը։

Անդրադառնալով Նաիրա Զոհրաբյանի խոսքերին, թե իրեն 78 տարեկան տատիկ է գրել, որն իր տան դիմաց դուրս է եկել կանաչի վաճառելու և 100 հազար դրամ տուգանվել է տեղաշարժման թերթիկ չունենալու համար, Գաբրիելյանն ասաց՝ չի հավատում այս պատմությանը։

«Չեմ ասում խաբում եք, բայց երկու պատճառով չեմ հավատում. Մարդն իր տան դիմաց լինելու համար տեղաշարժման թերթիկ պարտավոր չէ լրացնել և գյուղատնտեսական ապրանքի վաճառքը, որքանով հիշում եմ, երբևէ արգելված չի եղել։ Խնդրում եմ, այդ տատիկի հեռախոսահամարն ինձ տվեք, ես կապվեմ իր հետ, տեսնեմ ոնց կարող էր կանաչի վաճառելու համար տուգանվել»,-շեշտեց պատգամավորը

Աղբյուր` Փաստինֆո