Փաստ ինֆո

Արդեն երկու օր է սոցցանցերում և մամուլում շրջանառվում է Զվարթնոց օդանավակայանը Շառլ Ազնավուրի անունով կոչելու թեման: Ընդ որում, այն համատեքստում, թե նման առաջարկությամբ հանդես է եկել նրա որդին՝ Նիկոլա Ազնավուրը:

Ազնավուրի մահից անմիջապես հետո էլ նման առաջարկության մասին մամուլը բարձրաձայնեց: Սակայն, պարզվում է, ոչ այն ժամանակ, ոչ այսօր Ազնավուրի որդին չի եղել դրա հեղինակը: Ինչ -որ մարդիկ առաջարկել են՝ օգտագործելով որդու անունը: Հասկանում եք, այդպես ավելի ազդեցիկ է, մարդկանց զգայուն լարերի վրա հենց այդպես են խաղում, նուրբ թեմա է: Բայց անկեղծ լինենք՝ սա ընդհանրապես քննարկման թեմա չէ:

Օդանավակայան Զվարթնոցը՝ Զվարթնոցի՝ երկնային զինվորների՝ զվարթունների, կամ հրեշտակների տաճարի հետ նույն տարածականության մեջ է: Տարբեր ժամանակների այս երևույթները երկնային էություն ունեն և բազում շերտերով, տիեզերական կապերով կապված են միմյանց հետ: Պատկերացրեք՝ եթերի տարերք, գիտելիքի ու երկնային ոլորտը մարմնավորող Տիր աստծո մեհյանից /պատմությունը փաստում է, որ տաճարի տեղում Տիրի մեհյանն է եղել/ ՝ կտարելություն Զվարթնոցի տաճար և խորհրդային մոդեռնիզմի եզակի նմուշ՝ Զվարթնոց օդանավակայան:

Եվ ուրեմն, ի՞նր արհեստական թեմա է հրապարակ նետվում ներկա իշխանության մշակութային գերատեսչության կողմից: Եվ ի՞նչ ասել է՝ ,,բազմաթիվ մարդիկ դիմում են Զվարթնոց օդանավակայանը Ազնավուրի անունով վերանվանելու առաջարկով,,: Կամ՝ հանրային խորհրդում են ուզում այս հարցը քննարկել: Իրականում նման հարց չկա, մի փորձեք գործ անելու պատրանք ստեղծել:

Քաղաքացիները բազմաթիվ առաջարկներ միշտ կարող են անել, իսկ մշակույթի ոլորտի քաղաքականությունը մշակող մարմինը հենց նրա համար է, որ այդ առաջարկներին կարողանա հիմնավոր և փաստարկված պատասխան տալ:

Շառլ Ազնավուրը մեր սրտերում է և հոգիներում, նրան մի խառնեք ձեր կեղծ օրակարգերին՝ հատկապես այն ժամանակ, երբ ցանկանում եք հանրությանը շեղել բուն թեմաներից: Ամենակարևորը և առաջին հերթին՝ Արցախի թեմայից, կառավարման ոլորտի ճգնաժամային վիճակից, համավարակի տխուր վիճակագրությունից, բոլոր այն թոփ թեմաներից, որ վերջին շրջանում կապվում է վարչապետի ընտանիքի հետ…Ամեն ինչ այնքա՜ն թափանցիկ է:

Ընդ որում, տպավորություն է ստեղծվում, որ այս անգամ հանրությանը շեղելու հարցը դրվել է Հանրային խորհրդի նախագահի ուսերին:

Հեղինակ՝ Ա.Ե.

Աղբյուր` Փաստինֆո