Փաստ ինֆո

Շիրակի մարզի Լուսաղբյուր գյուղում այսօր՝ մայիսի 19-ին հրդեհից մահացածները հարս ու սկեսուր էին։ Միասին բնակվում էին հին, փայտե տանը։

«Փաստինֆո»-ի հետ զրույցում Լուսաղբյուրի գյուղապետ Մելս Մանուկյանն ասաց, որ կանայք ապրում էին երկրաշարժից հետո կառուցված փայտե հին տանը։ Ընտանիքի մյուս անդամները՝ 92-ամյա կնոջ որդին և երեք թոռներն իրենց ընտանիքներում Ռուսաստանի Դաշնությունում են՝ արտագնա աշխատանքի։

Գյուղապետը հրդեհի մասին իմացել է կեսգիշերին։ Ճթճթոց է լսել ու տնից դուրս եկել. «Երբ եկա արդեն հարևաններից չորս հոգի այստեղ էին։ Նրանք էլ էին հրդեհի մասին ուշ իմացել։ Շատ արագ վառվեց տունը։ Տատիկը ներսից օգնություն էր կանչում։ Մինչև պատուհանի ճաղավանդակները պոկեցինք, առաստաղը փլվեց, չկարողացանք օգնել»,-պատմեց գյուղապետը։

Նրա խոսքով այրվել է նաև հարևաններից մեկի ավտոմեքենան ու տան կտուրը, բայց նրանք չեն իմացել այդ մասին. «Ես արթնացրեցի նրանց։ Բախտներս բերեց, որ ավտոմեքենայի գազի բալոնի պայթելու ժամանակ հեռու էինք, մեծ վնասվածքներ չունեցանք»,-ասաց Մելս Մանուկյանը գյուղապետը։

Գյուղապետը կարծում է, որ հրդեհի պատճառը վառարանն է եղել։ Պատմում է՝ տանը փայտե վառարան էին վառում, երեկ երեկոյան ժամի նույնպես վառել են. «Հավանական վարկածը դա է։ Երևի վառարանը միացած է մնացել։ Թե չէ թոռը երկու ամիս առաջ ամբողջ էլեկտրականությունը փոխել է, քիչ հավանական է, որ դա լինի պատճառը»։

Ընտանիքի անդամները Հայաստան վերադառնալու խնդիր ունեն։ Թոռներից մեկը հնարավոր է այսօր վերադառնա. «Մարզպետարանում էլ է այդ հարցը բարձրացվելու։ Տեսնենք կառավարությունը կամ պարետը կարողանալու են օգնել, որ մարդիկ ցամաքով գան։ Չգան Վրաստանով մնան»,-ասաց գյուղապետը։

Հիշեցնենք, որ այսօր 00։44-ին ԱԻՆ ճգնաժամային կառավարման ազգային կենտրոնը տեղեկություն է ստացվել, որ Շիրակի մարզի Լուսաղբյուր գյուղի 4-րդ փողոցի թիվ 12 տանը հրդեհ է բռնկվել։ Հրդեհը մեկուսացվել է ժամը 02:15-ին, մարվել՝ 06:08-ին: Տունն ամբողջությամբ այրվել է։ Փրկարարները տանը հայտնաբերել են երկու կնոջ դի։

Հեղինակ՝ Հասմիկ Կոշկարյան

Աղբյուր` Փաստինֆո