Փաստ ինֆո

Կորոնավիրուսի բացասական հետևանքներն առավելապես և հիմնականում կրել է զբոսաշրջության ոլորտը, քանի որ այն ամբողջությամբ կանգ է առել։ Այս մասին այսօր ԱԺ փոխնախագահ Վահե Էնֆիաջյանի և տուրիստական ընկերությունների ներկայացուցիչների հետ հանդիպման ժամանակ ասաց Տուրիզմի հայկական ֆեդերացիայի նախագահ Մեխակ Ապրեսյանը։

Վերջինս նշեց, որ ոլորտի տնտեսվարողները 100 տոկոսով զրկված են եկամտից, սակայն ունեն պարտավորություններ. «Նրանք ունեն հարկային, վարկային պարտավորություններ, ունեն իրենց բիզնեսը, աշխատատեղերը պահպանելու հրամայական։ Եթե դիտարկում ենք կառավարության կողմից հաստատված միջոցառումները, ապա առաջին միջոցառումը, որը թվում էր՝ կարող էր զբոսաշրջության ոլորտին օգտակար լինել, ըստ էության ստացվում է, որ հենց զբոսաշրջության համար նախատեսված չէ, որովհետև լավագույն սցենարի դեպքում ոլորտի հիմնական եկամուտների վերականգնումը կլինի հաջորդ տարվա ապրիլից։ Լավ սցենարի դեպքում այս տարվա ամռան վերջից կարող են սկսել վերականգնվել այցելությունները, բայց դա հիմնական եկամուտները չի ապահովի։

Հետևաբար եթե օգտվենք այդ վարկային միջոցներից, ակնհայտորեն չենք կարողանալու սկսենք մարել և երկու տարի ժամկետն էլ բավարար չէ։ Զբոսաշրջության համար շատ կարևոր է, որ այս արտոնյալ վարկային միջոցները տրամադրվեն ոչ թե 24, այլ 36 ամսով և առնվազն 12 ամիս արտոնյալ ժամանակահատվածով»,-ասաց Մեխակ Ապրեսյանը։

Նշենք, որ Ազգային ժողովի փոխնախագահ Վահե Էնֆիաջյանն այսօր հանդիպում է տուրիստական ընկերությունների ներկայացուցիչների հետ։

Աղբյուր` Փաստինֆո