Փաստ ինֆո

Հայաստանում գործող խոշոր մարզասրահների մեծ մասը՝ չնայած պարետի կողմից գործունեության թույլտվությանը, չեն կարողանում վերսկսել աշխատանքները, քանի որ պարետատան կողմից սահմանված կանոններով հնարավոր չէ ապահովել հաճախորդների հարմարավետ մարզումները։

Նշենք, որ պարետի որոշմամբ մայիսի 18-ից մարզասրահները պետք է վերսկսեին իրենց աշխատանքները, սակայն սահմանվել էին հստակ կանոններ։ Մասնավորապես՝ ըստ որոշման՝ աշխատակիցների և այցելուների մուտքը մարմնամարզական օբյեկտ թույլատրվում է բացառապես դիմակներով և պաշտպանիչ ձեռնոցներով: Այցելուները ներկայանում են մարզումների արդեն հագնված, ինչպես նաև մարզվելուց առաջ և հետո ցնցուղի ընդունումն իրականացվում է տանը:

«Փաստինֆո»-ի հետ զրույցում «Reebok» սպորտային ակումբից հայտնեցին, որ աշխատանքները չեն վերսկսել, քանի որ պարետատան սահմանած կանոններով հնարավոր չէ լիարժեք մարզումներ իրականացնել։

«Gold's Gym» մարզասրահը հայտարարություն է տարածել ու հաճախորդներին տեղեկացրել, որ հաշվի առնելով երկրում տիրող համաճարակային իրավիճակը և պարետատան կողմից հաստատված ցուցումները, ակումբի վերաբացումը հետաձգվում է, քանի որ կառավարության կողմից նշված պայմաններով հնարավոր չէ ապահովել հաճախորդների հարմարավետ մարզումները։ Նույնպիսի հայտարարությամբ է հանդես եկել նաեւ «Multi Wellness centre»-ը. «կարևորելով հաճախորդների առողջությունն ու անվտանգությունը՝ որոշվել է հետաձգել ակումբի վերաբացումը՝ ՀՀ-ում տիրող համաճարակային իրավիճակից ելնելով»։

«Lady zone» ֆիթնես ակումբից «Փաստինֆո»-ին տեղեկացրին, որ աշխատանքները վերսկսվել են «Lady zone»ի Մալաթիայի և Ռոսիա մոլի մասնաճյուղերում՝ «Պահպանում ենք պարետի սահմանած բոլոր կանոնները»։

Աղբյուր` Փաստինֆո