Փաստ ինֆո

Շուտով ամբողջ աշխարհում վարակակիրների թիվը կհատի արդեն 5 միլիոնը։ Սակայն երկրներ կան, որոնց հաջողվում է վարակակիրների թիվը կայունացնել, իսկ որոշ երկրներում վարակի պիկը դեռ նոր է սկսվում։ 

Մեր տարածաշրջանում վարակակիրների ու մահացությունների թվով Հայաստանն առջեւում է։ Այս պահի դրությամբ Հայաստանում կորոնավիրուսով վարակվել է 5 041 մարդ, մահացել՝ 64 մարդ։ Ադրբեջանն ու Վրաստանը զիջում են վարակակիրների ու մահացածների թվով։ Ադրբեջանում կորոնավիրուսի 3387 հաստատված դեպք կա և 40 մահվան դեպք, իսկ Վրաստանում վարակակիրները 702-ն են, մահացածները՝ 12-ը։ Նշենք, որ մեկ օրվա ընթացքում Վրաստանում կորոնավիրուսի ընդամենը մեկ դեպք է գրանցվել։

Աշխարհի մի շարք երկրներում նույնպես վարակակիրների թիվը նվազում է։ Նոր Զելանդիայում արդեն երկրորդ օրն է, ինչ վարակի ոչ մի դեպք չի գրանցվել։ Նախորդ շաբաթ Նոր Զելանդիայում իրենց աշխատանքն են վերսկսել սրճարանները, խանութներն ու ռեստորանները։ Ֆրանսիայում էլ նվազել են կորոնավիրուսից մահացության դեպքերը։ Նշենք, որ Ֆրանսիան ամենաշատ մահացության դեպք գրանցած չորրորդ երկիրն է, ԱՄՆ-ից, Մեծ Բրիտանիայից և Իտալիայից հետո։

Մի շարք երկրներում, այդ թվում Չեխիայում, Հնդկաստանում վարակակիրների թիվը շարունակում է աճել։ Չեխիայում վերջին չորս շաբաթվա մեջ գրանցվել է վարակակիրների ռեկորդային՝ 111 դեպք՝ ընդհանուր դեպքերի քանակը հասցնելով 8594-ի։ Հնդկաստանում էլ կորոնավիրուսի դեպքերն արդեն հասել են 100 հազարի, իսկ մահացության դեպքերը՝ 3000-ի։ Միայն վերջին 24 ժամվա ընթացքում Հնդկաստանում գրանցվել է վարակի 4970 նոր դեպք։ Հնդկաստանը վարակակիրների թվով առաջ է անցել Չինաստանին, որտեղ տարեվերջին բռնկվել է կորոնավիրուսը։

Վարակակիրների թիվն աճում է նաեւ Ռուսաստանում, որն արդեն վարակակիրների թվով աշխարհում երկրորդ երկիրն է։

Աղբյուր` Փաստինֆո