Փաստ ինֆո

Վենետիկի հանձնաժողովի եզրակացությունը պարտադիր բնույթ չունի, դա խորհրդատվական նշանակություն ունի, բայց խնդիրն այն է, որ մենք պետք է ի վերջո կարողանանք երկակի ստանդարտների ռեժիմից վեր կանգնենք։ Չի կարելի մի դեպքում Վենետիկին դիմելն իրավաչափ համարել, իսկ մյուս դեպքում, երբ դա իշխանության քիմքին հաճելի չէ՝ ոչ իրավաչափ։ Այս մասին այսօր «Փաստինֆո»-ի հետ զրույցում ասաց ԱԺ «Բարգավաճ Հայաստան» խմբակցության պատգամավոր, իրավաբան Գևորգ Պետրոսյանը։

Հիշեցնենք՝ մայիսի 16-ի ասուլիսում ՀՀ վարչապետ Նիկոլ Փաշինյանը հայտարարել է, որ առնվազն մեկ տարի հնարավոր չի լինելու հանրաքվեի կազմակերպել, ուստիեւ արդարադատության նախարար Ռուստամ Բադասյանը դիմել է Վենետիկի հանձնաժողով՝ ՀՀ Սահմանադրական դատարանի շուրջ ստեղծված ճգնաժամի հանգուցալուծման վերաբերյալ: Նշենք, որ դրանից առաջ Վենետիկի հանձնաժողովն էր դիմել ՀՀ կառավարությանը՝ կոչ անելով ուղարկել հանրաքվեի դրված Սահմանադրական փոփոխությունների նախագիծը, սակայն կառավարությունն այդպես էլ չուղարկեց։

Ըստ Գեւորգ Պետրոսյանի՝ երբ Վենետիկի հանձնաժողովին դիմելն իշխանության շահերից է ելնում, դա համարվում է իրավաչափ գործողություն, իսկ երբ ոչ իշխանահաճո թեմաներով է նման առաջարկ արվում որակվում է անհարկի անդրադարձ։

«Ինչպես շրջանառության մեջ դրվեց՝ «մեր վրա տղա եք բերել» տարբերակն է։ Եթե ինչ-որ առիթով հանձնաժողովին դիմելը ոչ իրավաչափ ենք համարվում, ուրեմն եկեք վերանայենք Վենետիկի ատյանի հետ մեր փոխհարաբերությունների ապագան, բայց եթե ինչ-որ հարցերով դիմում ենք, ուրեմն պարտավոր ենք բոլոր հարցերով դիմել, իհարկե՝ պահպանելով մեր ինքնիշխանության ամենակարևոր գաղափարը»,-ասաց Պետրոսյանը։

Դիտարկմանը, թե վարչապետը հայտարարել է, որ «Առնվազն մեկ տարի հանրաքվե չենք կարող անել, բայց մյուս կողմից չենք կարող սպասել ՍԴ իրավիճակի լուծմանը մինչև կորոնավիրուսի համաճարակն ավարտվի», արդյո՞ք հնարավոր է հանրաքվեի անցկացումը չեղարկել, պատգամավորը պատասխանեց.

«Հանրաքվեի անցկացումը կարող է չեղարկել հանրապետության նախագահը, որովհետև նրա հրամանագրով է այն նշանակվել, բայց խնդիրը ոչ թե այն է, թե ով կչեղարկի կամ երբ կնշանակվի հանրաքվեն, այլ խնդիրն այն է, թե այսօր որքանով է հանրաքվե անցկացնելը առաջնային անհրաժեշտություն երկրում առկա խնդիրների կողքին»։

Հարցին, թե վարչապետն ասաց քննարկվում է ՍԴ հարցը ԱԺ-ում մասնակի կամ ամբողջական լուծելու տարբերակը, նման իրավասություն ունի՞ խորհրդարանը՝ Պետրոսյանը պատասխանեց. «Ես նման մեխանիզմ չգիտեմ, ով նման գաղափար է դրել շրջանառության մեջ ճիշտ կլինի նրանից պարզել։ ՍԴ-ն գործում է իր անդամներով, եթե կոնկրետ դատավորից ազատվելու իրավական հիմք կա, ապա սա այլ հարց է, բայց ԱԺ-ն ՍԴ լուծարելու իրավասություն չունի»։

Հեղինակ՝ Սոնա Գեւորգյան

Աղբյուր` Փաստինֆո