Փաստ ինֆո

«Արդեն ՄԻՊ-ն է տեսակետ հայտնում, իսկ դա նշանակում է, որ մեծ պրոբլեմ ունենք: Ես զարմանում եմ, թե ինչո՞ւ Ալեն Սիմոնյանը չի արձագանքում: Երբ Վազգեն Մանուկյանն էր ՀԽ նախագահ, նա հայտարարում էր, որ Հանրային խորհուրդը մեզ պետք չէ, հիմա ինչո՞ւ չի հայտարարում, որ պետք չէ եւ Ստեփանի հետ միասին ուղարկենք պատմության գիրկը: Արման Բաբաջանյանը ինչո՞ւ չի տիրություն անում, որ իր օրենսդրական նախաձեռնությունը գործի, որով ՀԽ նախագահին կարող էին հեռացնել, եթե նա քաղաքական չեզոքություն չի պահպանում: Ինչո՞ւ բոլորը միանգամից սառան»,-»,-«Փաստինֆո»-ի հետ զրույցում ասաց Հանրային խորհրդի անդամ, քաղաքագետ Արծրուն Պեպանյանը՝ անդրադառնալով ՀԽ նախագահ Ստյոպա Սաֆարյանի սկանդալային վարքագծին:

«Երբ Վազգեն Մանուկյանի դեմ կամպանիան գնում էր , հիմնականում ֆեյքերն էին գրում եւ հայհոյող կանայք, բայց իր դեմ մեր ժողովրդի ինտելեկտուալ հատվածն է դուրս եկել, ես սա ցավով եմ ասում: Կիրթ մարդիկ են, ոչ սեւ են, ոչ սպիտակ, դա վարչապետին չի՞ անհանգստացնում»,-հարցնում է ՀԽ անդամը:

Հիշեցնենք, Ստյոպա Սաֆարյանը, որը աչքի ընկնում իր անթաքույց պրոիշխանական գնահատականներով ու դիրքորոշմամբ, հերթական անգամ սկանդալի կիզակետում է հայտնվել իր ֆեյսբուքյան գրառման պատճառով: Այս անգամ նա անպարկեշտ արտահայտություններ է թույլ տվել ադրբեջանագետ Անժելա Էլիբեգովայի հասցեին, ինչն արժանացել է ընդհուպ ՀՀ Մարդու իրավունքների պաշտպանի գնահատականին: Նշենք, որ Սաֆարյանը ֆեյսբուքում հայտնի է նախկին իշխանությունների ու բոլոր նրանց հասցեին հայհոյախառն գրառումներով, ովքեր հանդգնում են քննադատել գործող իշխանություններին:

Ստյոպա Սաֆարյանը անհանդուրժող վերաբերմունք էր դրսեւորել նաեւ լրատվամիջոցների ներկայացուցիչների նկատմամբ: Նա իր կազմակերպած քննարկմանը սահմանափակել էր լրագրողների մուտքը՝ կազմելով յուրայինների ու ոչ յուրայինների ցուցակ:

Ուշագրավ է, որ ՀԽ նախկին նախագահ նախագահ Վազգեն Մանուկյանը հրաժարական տվեց Հանրային խորհրդի նախագահի պաշտոնից այն բանից հետո, երբ իշխող ուժի ներկայացուցիչները հայտարարեցին, որ ՀԽ-ի գործունեությունն անիմաստ է, իսկ Վազգեն Մանուկյանի գործունեությունը՝ քաղաքականացված:

Արծրուն Պեպանյանն ասաց՝ Հանրային խորհուրդը լծակ չունի ՀԽ նախագահի հրաժարականի հարցը բարձրացնելու համար: Դա կարող է անել միայն կառավարությունը: «Այսօր ինձ շատ վրդովված զանգել էր ՀԽ մեկ այլ անդամ, առաջարկում էր դատապարտող տեքստ պատրաստել, որովհետեւ ինքը մեզ խայտառակում է , ես ասացի, որ այդ տեքստը պետք լինի ոչ թե դատապարտող, այլեւ՝ անհանգստացնող: Մենք անհանգստացած ենք, բայց չենք կարող իրեն հեռացնել, իրեն կառավարությունն է նշանակել եւ նա անձեռնմխելի է : Իրեն կարող են հանել, միայն եթե ասենք, քաղաքական չեզոքությունը խախտի: Թող ընթացք տան, այս ի՞նչ է կատարվում: Այս իրավիճակում ինքը Վազգեն 1-ին կաթողիկոսի նման բոլորին պետք է համարեր իրենը, գիշերները չքներ, մտածեր՝ ի՞նչ կարող եմ անել, որ այդ կրակները հանգչեն, բայց ինքը չի համապատասխանում այդ պաշտոնին, եթե ուզում է դրանով զբաղվել, թող դուրս գա, գնա, կուսակցություն բացի եւ ինչ ուզում է՝ անի»,-վրդովված ասաց Արծրուն Պեպանյանը՝ հավելելով, որ ՀԽ նախագահի պաշտոնին երկրի վարչապետը պետք է վաղուց արձագանքած լիներ: «Իր նշանակածն է, ճիշտը այն կլինի, որ կանչի, խրատ տա: Ըստ օրենքի նա կարող է հանել»:

Նրա տեղեկացմամբ՝ կորոնավիրուսով պայմանավորված ՀԽ-ն բնականոն աշխատել չի կարողանում: Նրա փոխանցմամբ, Հանրային խորհուրդը այսօր պետք է փորձի ինչ-որ հարցեր հեռավար քննարկել, որի արդյունավետությունը, սակայն, ըստ Պեպանյանի մեծ չէ: Հանրային խորհրդի անդամը փորձել է մի քանի անգամ երկրում ատելության մթնոլորտի խնդիրը ՀԽ օրակարգ բերել, սակայն, ապարդյուն:

«Ես ինքս տարբեր առիթներով մի քանի անգամ անհանգստություն արտահայտել եմ, որ Հանրային խորհրդի նախագահը պարտավոր էր փորձել քայլեր ձեռնարկել այս ատելության մթնոլորտը մեղմելու համար, հատկապես, որ ՀԽ-ի մասին օրենքում նրան այդ լիազորությունը տրված է: Ինքը կառավարության, հասարակության, քաղհասարակության, գործատուների միջեւ գոյություն ունեցող խնդիրների լուծմանը միջամտելու իրավունք ունի՝ կառավարությանն առաջարկներ ներկայացնելով, փորձելով այդ խնդիրները մեղմել: Ես այս հարցը Ստեփան Սաֆարյանի նախագահությամբ տեղի ունեցած ՀԽ առաջին իսկ նիստին եմ դրել, ասել եմ՝ հարգելիներս երկրում քաղաքացիական պատերազմ է, եկեք հասկանանք՝ ինչ կարող ենք անել»,-պատմեց մեր զրուցակիցը:

Արծրուն Պեպանյանի խոսքով, Ստյոպա Սաֆարյանը արձագանքել է իր նախկին հրապարակումներին ու կոչերին՝ նշելով որ ինքը ճիշտ է, եթե նախկինները «հանցագործ» են, պետք է ասել: «Ես իրեն հեռակա ասացի՝ քաղաքական կուսակցության առաջնորդն ու ԱԺ փոխնախագահն իրար հետ խնդիրներ ունեն, դա արդեն մասնավոր անձանց խնդիր չէ, քաղաքական խնդիր է եւ դու, որպես ՀԽ նախագահ, պարտավոր էիր այդ հարցն օրակարգում դնել, բայց դա անելու փոխարեն դու անցել ես, մի կողմի վրա հարձակվում ես, որ ի՞նչ: Ես կառավարությանն եմ հորդորել, որ ուշադրության դարձնեն, ի վերջո իրենք են նշանակել նրան ՀԽ նախագահ: Ինձ ֆեյսբուքյան ընկերությունից հեռացրեց»,-եզրափակեց Արծրուն Պեպանյանը:

Աղբյուր` Փաստինֆո