Փաստ ինֆո

Կառավարությունը պատրաստվում է քայլեր անել Հայաստանում իրապես անկախ դատական համակարգ ունենալու համար: Այս մասին առցանց մամուլի ասուլիսի ժամանակ ասաց ՀՀ վարչապետ Նիկոլ Փաշինյանը:

«Շատ է խոսվում դատական համակարգում բարեփոխումների տեմպի և արագության մասին, բայց արդյոք արագ բարեփոխումը լավ բարեփոխում է: Երրորդ Հանրապետության պատմության մեջ ականատես եմ եղել մի քանի բարեփոխումների փայլուն ծրագրերի, որոնք ուղղակի վիժեցվել են այդ բարեփոխումների հեղինակների շատ արագ իրականություն դարձնելու մղման պատճառով: Մենք նույնիսկ ՀՀ-ում ունեցել ենք շատ արագ իրականացված և հաջող բարեփոխումների օրինակներ, որոնք հետո քաղաքական իրավիճակի կոնյուկտուրայի փոփոխության բերումով զրոյացվել են և մոռացության են մատնվել, այսինքն ինստիտուցիոնալ խնդիր չեն դարձել»,-ասաց Նիկոլ Փաշինյանը ընդգծելով, որ Հայաստանում բարեփոխումները պետք է ընթանան հանդարտ տեմպով, որպեսզի դրանք դառնան խորքային:

Վարչապետը որպես օրինակ բերեց խորովածը. «Երբ հյուր է գալիս և խնդիր կա խորոված անելու: Մարդիկ սոված են, պետք է հնարավորինս արագ այդ խորովածն իրենց հասցնել և դրա համար թեժ կրակ է արվում, բայց եթե այդ խորովածն ավելի արագ է արվում, քան անհրաժեշտ է, երեսը վառվում է և մեջը հում է մնում: Արդյունքում հյուրերը սոված են մնում: Նույնն էլ բարեփոխումներն են: Երրորդ Հանրապետության պատմության մեջ տասնյակ բարեփոխումներ ունենք, որ երեսը վառած է, մեջը հում է, բայց մտադրությունը լավ է: Մենք այդպես չենք ուզում: Ուզում ենք նորմալ կրակի վրա անենք նորմալ խորոված, մատուցենք նորմալ, որ հյուրը, ՀՀ քաղաքացին, ժողովուրդը գոհ լինի, հագենա բարեփոխումների արդյունքներից»,-հավելեց վարչապետը` ընդգծելով, որ չեն ուզում Հայաստանում արագ ստեղծել պրոհեղափոխական, բայց խամաճիկային դատարան: Նիկոլ Փաշինյանի խոսքով ցանկանում են ունենալ իսկապես անկախ դատական համակարգ:

«Ես ցնցված եմ այն փաստից, թե մեր իրականության մեջ մաֆիոզ մտածողությունն ինչքան խորն է, որ այս բաժակի սև և սպիտակ լինելու հարցի նկատմամբ մեր դիրքորոշումը կարող է մեծապես կախված լինի նրանից, թե սրա սև կամ սպիտակ լինելը մեր ընգերոջը, մեր ընտանիքին, մեր կլանին ինչքանովա ձեռնտու: Էսօր ասում են բա ինչու մինչև հիմա ազնիվ և պրոֆեսիոնալ կադրերը հազարներով չեն համալրել պետական կառավարման համակարգը: Մի հատ կարաք էդ ազնիվ ու պրոֆեսիոնալ կադրերի ցուցակը տաք: Այո կան այդպիսի կադրեր: Նրանցից շատերն այսօր պետական կառավարման համակարգում աշխատում են, բայց կան բազմաթիվ կադրեր, որոնք ազնիվ են զրո պրոֆեսիոնալությամբ և կանպրոֆեսիոնալ մարդիկ, որոնք ազնիվ չեն»,-նշեց վարչապետը:

Աղբյուր` Փաստինֆո