Փաստ ինֆո

Վարչապետն արեց հայտարարություն առ այն, որ հիմա գազի գնի բարձրացման մասին խոսելու լավագույն ժամանակը չէ: Սա մի քանի տեսանկյունից խնդրահարույց հայտարարություն էր: «Փաստինֆո»-ի հետ զրույցում այս մասին ասաց «Հայացք» վերլուծական կենտրոնի փորձագետ, տնտեսագետ Լիլիա Ամիրխանյանը:

Նա նկատեց միևնույն ասուլիսի ժամանակ վարչապետը ևս մեկ անգամ հայտարարեց, որ հայ-ռուսական հարաբերությունները փայլուն են, մինչդեռ նման հարաբերությունների կոնտեքստում ցանկացած խնդրահարույց հարցի շուրջ ենթադրվում են գործընկերոջ հետ կոնսուլտացիաներ, քննարկումներ. «Այս պարագայում, եթե իսկապես ունենք փայլուն հարաբերություններ, ապա վարչապետի հայտարարությունը, որ գազի գնի բարձրացման համար ժամանակը լավագույնը չէ և մենք ակնկալում էինք ու դեռ ակնկալում ենք ռուսական կողմից, առնվազն այդ փայլուն հարաբերությունների տրամաբանության ներքո գործընթացի կոնտեքստում չէ: Այսինքն փաստացի բացահայտ է, որ չկան այդ կոնսուլտացիաները և հետևաբար չկա փայլուն հարաբերությունների տրամաբանությունն այս գործընթացում»,-նկատեց փորձագետը:

Բացի այդ նրա կարծիքով եթե լիներ իրավիճակ, երբ ճգնաժամն առնչվեր միայն մեզ, ապա կարող էինք որպես դաշնակից ակնկալել, որ Ռուսաստանը պետք է ըմբռնումով մոտենա և ինչ-որ քայլեր ընդառաջի, սակայն ճգնաժամը միայն մերը չէ և Ռուսաստանի համար այն նույնպես բացասական հետևանքներով է հարուստ: Հետևաբար ճգնաժամի առկայությունից ակնկալել, որ դիմացի կողմը կգնա մի քայլի, որը մեզ գուցե բերի ինչ-որ դրական արդյունք, սական հենց այդ կողմի տնտեսության համար բացասական արդյունք ունենա, ապա սա կոլեգիալության ու փայլուն հարաբերությունների կոնտեքստում կրկին չի տեղավորվում:

«Բացի այդ պետք է հասկանալ, որ ռուսական գազի գնի հետ կապված ցանկացած հայտարարության մասին խոսելիս պետք է հստակ տարանջատում մտցնենք: Ի վերջո ռուսական գազի գինը նկատի ունենք հայ-ռուսական բանակցությունների կոնտեքստում, թե «Գազպրոմ Արմենիա»-ի ներկայացրած հայտի կոնտեքստում: Եթե չկա տարանջատում, ապա կարող է ընկալվել, որ երկրի ղեկավարի կողմից սա ճնշում է Հանրային ծառայությունրը կարգավորող հանձնաժողովի նկատմամբ, որ գազի գնի վերանայման Գազպրոմի հայտին բացասական պատասխան տա, քանի որ այս պահին հանձնաժողովը քննում է այդ հայտը: Միանշանակ չենք կարող ասել, որ խոսքը դրա մասին է, բայց քանի որ մոտեցումը նրբորեն արված չէ և չկա հստակեցում, թե ինչի մասին է խոսովում գազի գին ասելով, կարող է լինել նման ընկալում»,-նշեց Լիլիա Ամիրխանյանը ավելացնելով, որ սա նաև երրորդ երկրին է հնարավորություն տալիս օգտվելու նմանատիպ հայտարարություններից և ռուսական գազի գնի հետ կապված ներկայացնելու սեփական դիրքորոշումները:
Առհասարակ, եթե զուտ գնագոյացման մեխանիզմների տեսանկյունից հարցին մոտենանք, ապա փորձագետի խոսքով, եթե այսօր այսրոպեական իրավիճակից ելնելով առաջարկում ենք գազի գնի վերանայում իջեցման տեսքով, ապա ստեղծում ենք նախադեպ և դիմացի կողմին լիարժեք իրավունք վերապահում, որ ցանկացած այլ իրավիճակներում, երբ գուցե դրությունն ի վնաս մեզ աշխատի, դիմաից կողմը նույն տրամաբանությամբ մեզ համար բարձրացնի գազի գինը.

«Նմանատիպ հայտարարությունն այդ կոնտեքստում ներկայացնելը մեզ համար շահեկան չէ: Փոխվարչապետ Մհեր Գրիգորյանն էլ հարցազրույցնրից մեկի ժամանակ ասաց, որ այսրոպեական իրավիճակներից ելնելով գազի գնի համար դիմելը կարող է նաև մեզ համար խնդրահարույց լինել և հետագայում արդեն իրավիճակի փոփոխությունից ելնելով մեր դեմ աշխատել»,-ասաց փորձագետը:

Հարցին` արդյոք վարչապետը չէր մտածում այդ մասին, երբ նման հայտարարություն էր անում, Լիլիա Ամիրխանյանը միանշանակ չկարողացավ պատասխանել, բայց նկատեց, որ սա առաջին դեպքը և առաջին ոլորտը չէ, երբ հայտարարություններն արվում են այդ պահին ինչ-որ խնդիր լուծելու համար և հաշվարկված չեն:

Հիշեցնենք, որ այսօր առցանց մամուլի ասուլիսի ժամանակ ՀՀ վարչապետ Նիկոլ Փաշինյանն անդրադարձավ նաև գազի գնին: Նա ասաց, որ քաղաքական խորհրդակցություններն այդ թեմայով շարունակվում են, սակայն այս պահին որևէ կոնկրետ բան չի կարող ասել. «Նավթի գների անկման և փլուզման պայմաններում մենք կարող էինք ակնկալել Հայաստանի ռազմավարական գործընկեր Ռուսաստանից, որ հիմա գազի գնի բարձրացման մասին խոսելը լավագույն ժամանակաշրջանը չէ: Մենք կշարունակենք աշխատել մեր գործընկերների հետ»,-նշեց վարչապետը:

Հեղինակ՝ Հասմիկ Կոշկարյան

Աղբյուր` Փաստինֆո