Փաստ ինֆո

Խոսվում է այն մասին, որ մեզ չի հաջողվել Արցախը վերադարձնել բանակցություններին, այնպես, ինչպես դա չի հաջողվել վերջին 22 տարում, երբ 1998թ-ին Արցախը բանակցային սեղանից դուրս թողնվեց: 22 տարի ամբողջ միջազգային հանրությունը, ԵԱՀԿ Մինասկի խումբն աշխատել է այդ պայմաններում, և այդպես եղել է լռելյայն կոնսենսուս, որ Արցախը պետք է բանակցությունների սեղանի շուրջ չլինի: Այս մասին այսօր հրավիրված ասուլիսում ասաց ՀՀ վարչապետ Նիկոլ Փաշինյանը:

Նա շեշտեց, որ ներկայիս իշխանության պատկերացումն այն է, որ չի կարող Արցախի հարցը լուծվել առանց Արցախի ընտրված ներկայացուցիչների. «Մենք չենք կարող որոշումներ կայացնել Արցախի ընտրված ներկայացուցիչների փոխարեն»:
Վարչապետի խոսքով, ի տարբերություն նախկին մի շարք դեպքերի, այսօր բանակցային սեղանի շուրջ նստած անձը ներկայացնում է Հայաստանի ժողովրդին ու ասում է, որ եթե կլինի այնպիսի լուծում, որին ոչ ասելը ռացիոնալ չէ, ապա ժողովրդի հետ խորհրդակցելու անհրաժեշտությւոն կլինի:

«Ղարաբաղի հարցը կարող է լուծվել մեկ մարդու քմահաճույքո՞վ, այդ ով է այդ մարդը, ես ուզում եմ իմանալ: Ես միտում եմ նկատում, որ ոմանք փորձում են Հայաստանի օրինական ներկայացուցիչներին բանակցային սեղանի շուրջ կաշկանդել անընդհատ ասելով.

«Վայ, այս ինչ է տեղի ունենում»: Ինչու են ուզում Հայաստանի օրինական ներկայացուցիչներին կաշկանդել բանակցային սեղանի շուրջ, որովհետև Արցախի հարցի բանակցային գործընթացի հիմքում դրված է մի սկզբունք՝ որևէ բան որոշված չէ, քանի դեռ ամեն ինչ համաձայնեցված չէ, բանակցային սեղանի շուրջ կարող են հնչեցվել ամենաընդունելիից մինչև ամենանընդունելի գաղափարները, ուզում են այնքան կաշկանդել, որ Հայաստանի ներկայացուցիչներն ականջները փակե՞ն, ասեն մենք չենք լսում կամ էլ փախնեն բանակցությունների սեղանից: Սա ի՞նչ մոտեցում է»,-ասաց Փաշինյանն ու շեշտեց, որ ՀՀ-ն կաշկանդված չի լինելու բանակցությունների սեղանի շուրջ:

Մանրամասները` տեսանյութում:

Աղբյուր` Փաստինֆո