Փաստ ինֆո

Պաշտոնական Ստեփանակերտը միշտ օգտագործում է «իշխանություն», «պաշտոնական Ստեփանակերտ» տերմինները եւ այդպես լինելու այսուհետեւ եւս: «Փաստինֆո»-ի հետ զրույցում ասաց Արցախի Հանրապետության նախագահ Բակո Սահակյանի մամլո խոսնակ Դավիթ Բաբայանը՝ ընդգծելով. «Դուք գիտեք, որ այս տարիների ընթացքում մենք երբեւիցե չենք օգտագործել այլ տերմինաբանություն բացի «պաշտոնական Ստեփանակերտ», ԼՂՀ, Արցախի Հանրապետություն եւ այդպես է լինելու այսուհետ եւս»:

Հիշեցնենք, վարչապետ Նիկոլ Փաշինյանը մամլո ասուլիս ժամանակ այսօր խոսելով Ղարաբաղյան հիմնախնդրի կարգավորման գործընթացից մի քանի անգամ օգտագործեց «Արցախի ընտրված ներկայացուցիչ» ձեւակերպումը, ինչը փորձագիտական շրջանակաների գնահատմամբ վտանգավոր է , քանի որ նվազեցնում է Արցախի Հանրապետության սուբյեկտայնությունը:

Դավիթ Բաբայանի խոսքով, խնդիրն այն է, թե ինչ է ընկալվում այդ տերմինաբանության տակ: «Այդ տերմինաբանությունը բնական է, առաջացնում է որոշ քննարկումներ , բայց խնդիրը այն է, թե ինչն է ընդունվում որպես իմաստ : «Ընտրյալ ներկայացուցիչ», բնական է, որ պետք է լինի իշխանություն, չի կարող լինել «ընտրյալ ներկայացուցիչ», որը իշխանության կողմից չէ: Արցախը պետություն է, թեեւ չճանաչված, բայց «ընտրյալ ներկայացուցիչը»-ը հասկացվում է հենց պետության, իշխանության անդամ կամ իշխանության կողմից բանակցությունների համար նշանակված անձ: Մենք այդպես ենք հասկանում, այլ տարբերակ լինել չի կարող, պետք է հստակ արձանագրել, որ որպես ընտրյալ ներկայացուցիչ Ստեփանակերտում հասկացվում է հենց այս կատեգորիաները»,-ասաց Դավիթ Բաբայանը:

Ինչ վերաբերում է «ընտրյալ ներկայացուցիչ» տերմինի ադրբեջանական մեկնաբանությանը, որը այն դիտարկում է այսպես կոչված «Լեռնային Ղարաբաղի մարզի ադրբեջանական համայնք» ՀԿ-ի համատեքստում, որի ղեկավար Թուրալ Գյանջալիեւը վերջերս այդ երկրի խորհրդարանի պատգամավոր ընտրվեց Ադրբեջանի «№122 Խանքենդիի ընտրատարածքից»` Դավիթ Բաբայանն ասաց. «Մենք սա անթույլատրելի ենք համարում, որովհետեւ մենք չենք ճչանաչում այդ «ԼՂ-ի ադրբեջանական համամայնք – կառույցին, միգուցե դա ոչ կառավարական մի օղակ է: Դրա համար, որպեսզի այսպիսի խնդիրներ չլինեն, շատ կարեւոր է, որ մենք էլ հստակեցնենք, թե ինչ տերմինաբանություն ենք կիրառում: Միգուցե օգտագործենք Լեռնային Ղարաբաղի Հանրապետության ընտրյալ ներկայացուցիչներ ձեւակերպումը»,-նշեց Դավիթ Բաբայանը:

Հավելենք, որ «Լեռնային Ղարաբաղի մարզի ադրբեջանական համայնք» ՀԿ նախագհի եւ արդեն Ադրբեջանի «№122 Խանքենդիի ընտրատարածքից» ընտրված պատգամավորի կարգավիճակում Թուրալ Գյանջալիեւը հանդիպումներ է ունեցել ոչ միայն ԵԱՀԿ համանախագայող երկրների դեսպանների, այլեւ ԵԱՀԿ համանախագահի անձնական ներկայացուցիչ Անջեյ Կասպրշիկի հետ, ինչը փաստում է այն մասին, որ ադրբեջանական կողմը ամեն բան անում է այդ կառույցի սուբյեկտայնությունը բարձրացնելու եւ միջազգային հանրության ընկալումներում այդ կառույցի ու Արցախի Հանրապետության իշխանությունների միջեւ հավասարության նշան դնելու համար:

Մեզ հետ զրույցում Դավիթ Բաբայանը շեշտեց՝ Ադրբեջանն ամեն ինչ անում է, որպեսզի բանակցային գործընթացում խցկի իր՝ այսպես կոչված «ադրբեջանական համայնքը» :

«Մենք դա պետք է չեզոքացնենք եւ չեզոքացնում ենք, ընդմիշտ նրանք պետք է հասկանան, որ մենք չենք ընդունելու այսպես կոչված «ադրբեջանական համայնք» հասկացությունը: Ինչ վերաբերում է միջնորդներին, ապա այստեղ եւս քաղաքականության խնդիր է, եթե մենք ասում ենք Լեռնային Ղարաբաղի Հանրապետության ընտրյալ ներկայացուցիչներ, դա այլ բան է: Դրա համար կրկնում եմ, շատ ավելի լավ կլինի, եթե մենք օգտագործենք այս տերմինը»,-ասաց Դավիթ Բաբայանը՝ հավելելով, որ առհասարակա տերմինաբանության հետ կապված լուրջ խնդիրներ ունենք:
«Կարեւոր է հստակեցնել նաեւ հակամարտության անվանումը, մենք օգտագործում ենք ադրբեջանաղարաբաղյան հակամարտություն տերմինը, որը ավելի ճիշտ է, որովհետեւ Ադրբեջանն է այն սանձազերծել: Աշխատանք կա անելու»,-եզրափակեց Դավիթ Բաբայանը:

Անդրադառնալով բանակցային սեղանին Արցախի Հանրապետության վերադարձին, Դավիթ Բաբայանն ասաց՝ դա հրամայական է ռւ բնականաբար, հիմնախնդիրն անհնար է կարգավորել առանց Արցախի Հանրապետության: «Մենք հասկանում ենք, որ դա շատ բարդ խնդիր է , աշխատատար եւ ժամանակատար խնդիր է եւ ակնկալել շուտափույթ փոփոխություններ, բնականաբար, վաղաժամ է, բայց կրկնում եմ՝ դրան այլընտրանք չկա: Պետք է աշխատանքը շարունակել այդ ուղղությամբ»:

Հավելենք, որ այսօրվա ասուլիսին վարչապետ Նիկոլ Փաշինյանը, որն իշխանության գալուց հետո Արցախը բանակցային սեղան վերադարձնելու խնդիրը հռչակել էր որպես առաջնահերթություն եւ հայտարարել է. «Խոսք է գնում այն մասին, որ մեզ չի հաջողվել Արցախին վերադարձնել բանակցային սեղան, այնպես, ինչպես չի հաջողվել վերադարձնել վերջին 22 տարում, երբ որ Արցախը բանացային սեղանից դուրս թողնվեց։ 22 տարի ամբողջ միջազգային հանրությունը, ԵԱՀԿ Մինսկի խումբը աշխատել են այդ պայմաններում։ Եղել է լռելյայն կոնսենսուս, որ Արցախը պետք է բանակցությունների սեղանին չլինի։ Սակայն մենք չենք կարող որոշում կայացնել Արցախի ընտրված ներկայացուցիչների փոխարեն»:

Հեղինակ՝ Մ.Ղ.

Աղբյուր` Փաստինֆո