Փաստ ինֆո

Գավառում տեղի ունեցած զինված միջադեպից հետո հիվանդանոցում դանակահարված գավառցիները չեն վստահում նախաքննության անաչառությանը` արձանագրելով, որ միջադեպի ժամանակ զենք գործադրած անձանցից ոչ մեկն առ այսօր չի կալանավորվել, ձերբակալվել:

Հիշեցնենք՝ ապրիլի 28-ին Գավառում տեղի է ունեցել փոխհրաձգություն, որի ժամանակ սպանվել է երկու երիտասարդ՝ Նորատուսի բնակիչ Վ. Ավետիսյանը` նորատուսցի արջը և Գավառի բնակիչ՝ ՔԿ Զինվորական քննչական գլխավոր վարչության քննիչ Զ. Պարոնիկյանը, մի քանի հոգի ստացվել վնասվածքներ։ Միջադեպի մասնակից մի քանի անձ, պայմանական ասած մյուս կողմի ներկայացուցիչներից, որոնք զինված միջադեպի ժամանակ տուժել էին, տեղափոխվել էին Գավառի բժշկական կենտրոն, որի վրա հարձակում էին գործել սպանված երիտասարդների հարազատները։ Հարձակման վերաբերյալ մամուլում տեղեկատվություն հայտնվեց, թե հիվանդանոցում կտրել են երկու հոգու վիզ, սակայն իրավապահ մարմինները չշտապեցին հերքել կամ տեղեկատվություն տրամադրել՝ Գավառում տիրող իրավիճակի վերաբերյալ եւ միայն հաջորդ օրը հանդես եկան մասնակի հերքմամբ՝ նշելով, որ հիվանդանոցի վրա հարձակում եղել է, բայց որեւէ մեկի պարանոցը չեն կտրել, նոր զոհեր չեն եղել։

«Այդպիսի խաղեր չի կարելի խաղալ։ Ասում են՝ անվտանգությունից ելնելով երկուսին հայտարարում են մորթված»,- «Փաստինֆո»-ի հետ զրույցում ասաց փաստաբան Արմեն Մուխսիկարոյանը, որն իրականացնում է հիվանդանոցում դանակահարված Հայթյանների շահերի պաշտպանությունը` ավելացնելով. «Ինչպե՞ս կարելի է ասել՝ հավի ճտի նման մորթել են և այդ գիշեր ավելի վատ բան չսպասել»,- ասաց փաստաբանը։

«Փաստինֆո»-ի հարցին, թե արդյո՞ք անվտանգության ապահովման միջոց կիրառելու համար փաստաբանը դիմել է իրավապահներին, Մուխսիկարոյանը պատասխանեց, որ դիմել է Փաստաբանների պալատի նախագահին, ով տրամադրել է 24 ժամյա հասանելի հեռախոսահամար, բայց արդյո՞ք հնարավոր է պահպանել անվտանգությունը։

Ըստ նրա՝ յուրաքանչյուրին թիկնապահներ ապահովելը պրակտիկորեն անհնարին է, հատկապես արդեն ստեղծված նախադեպը ցույց է տվել, որ անձի պաշտպանությունը պետության կողմից ապահովելը ֆանտազիայի ժանրից է։

«Ամերիկայի նման պետությունը տալիս է զենքի իրավունք, որ հարկ եղած դեպքում անձը կարողանա իրեն պաշտպանել։ Բոլոր հանցագործները զինված են լինում և բոլորն էլ դա շատ լավ գիտեն։ Իսկ զինված չեն լինում մեզ պես հասարակ, բարեխիղճ մարդիկ, ովքեր խոցելի են »,- ասաց նա՝ նշելով, որ զենքով դիմադրություն ցուցադրելու դեպքում էլ կբարձրացվի ապօրինի զենք պահելու հարցը։ Ավելին՝ նա նշեց, որ վստահություն չունի նաև ոստիկանության նկատմամբ։

«Այդ ոստիկանությունում մի քանի հոգի լրտեսներ կան, ինֆորմացիան նույն պահին հասնում է Նորատուս։ Ես գնամ ոստիկանություն, ինչ ասեմ։ Մենք հանցավոր բարքերի տեր մարդիկ չենք, պարզապես մեր տարածքային ոստիկանությունը չունի այդ վստահությունը, որ մենք իրենց դիմենք և ասենք՝ մեր անվտանգության հետ կապված գործողություններ կատարի։ Չկա այդ վստահությունը, չի էլ լինելու՝ կարծում եմ։ Գրությամբ դիմել էի ոստիկանություն, որտեղից պատասխանել են, որ իրենց գործողություններն իրավաչափ են։ Նորատուսցիներին հրավիրել, ասել են՝ եկեք մարդ մորթեք, շատ իրավաչափ գործողություն է։ Հիմա էլ նշանակված է ծառայողական քննություն»,- ասաց Մուխսիկարոյանը։

Նշենք, որ Մուխսիկարոյանը բացի Հայթյանների փաստաբանը լինելուց, նաև բարեկամական կապ ունի նրանց հետ և նրա տունը ևս խուզարկվել է։

Հարցին, թե ինչ էին փնտրում փաստաբանի տանը՝ վերջինս պատասխանեց, որ ապացույցներ են սպասում՝ դեպքերից 20 օր անց։

«Ոստիկանությունը ողբերգություն է։ Մի հատ հանցագործություն լինի, ձեռքից բռնեն ու նստեցնեն, թե ոչ, դրանից այն կողմ իրենք չկան։ Դեպքը եղել է ապրիլի 28-ին, մեկ ամիս անցել է, սպասում են՝ երկնքից գործի հանգամանքների վերլուծությամբ ինչ -որ բան ընկնի »,- ասաց նա՝ հավելելով, որ ձերբակալվածները երեխաներ են և որևէ կապ չունեն այս ամենի հետ։
Անդրադառնալով Գավառում տեղի ունեցած միջադեպին՝ փաստաբանն ասաց, որ տեսանյութում երևում է 15-20 զինված անձինք։

«Զենքը ձեռք, եթե մարդը որևէ տեղ է գնում, արդեն ՀՀ քրեական օրենսգրքի 34-104-րդ հոդվածով կասկածյալ է։ Զենքով գնացել են՝ զենքերով պար պարելո՞ւ, թե՞ մարդ սպանելու։ 10 անձ կա զենքը ձեռքին, բայց 34-104-րդ հոդվածով ձերբակալված մարդ չկա այժմ»,- ասաց նա։

Փաստաբանը հայտնեց, որ Գավառի հիվանդանոցում կատարված միջադեպի ժամանակ որևէ ոստիկան անգամ քերծվածք չի ստացել և վստահեցնում է՝ ոստիկանությունից են հայտնել, որ Գավառի հիվանդանոց տեղափոխված անձանց պատրաստվում են տեղափոխել Երևան։

Նրա փոխանցմամբ՝ Գավառի հիվանդանոցում տեղի ունեցած միջադեպի ժամանակ դիմադրություն է ցուցաբերվել, դանակով հարվածել են Դավիթ Հայթյանի սրտին՝ դանակը թողնելով սրտի մեջ, ինչը փրկություն է եղել, քանի որ դանակը հանելու դեպքում Դավիթին փրկել չէր հաջողվի, բացի այդ՝ Դավիթ Հայթյանը վնասվածքներ է ստացել նաև գլխի շրջանում։

«Գավառի հիվանդանոցի պատմության մեջ երևի առաջին անգամ արվել է սրտի վիրահատություն»,- ասաց նա։ Մուխսիկարոյանը տեղեկացրեց, որ Արմեն Հայթյանն էլ ստացել է դանակի 13 հարված, վնասել են կոկորդը։

«Նրանք զենք չեն ունեցել՝ շշով, ինչ-որ եղել է հարմար, պաշտպանվել են»,- ասաց Մուխսիկարոյանը։

Փաստաբանը նշեց, որ Հայթյանները և Դավոյանը չունեն մեղադրյալի կարգավիճակ, սակայն նախաքննական մարմինը փորձում է ապացույցներ գտնել Արմեն Հայթյանին մեղադրանք առաջադրելու համար։

Ըստ նրա՝ դեպքի վերաբերյալ իրավապահներն ունեն մշակած կանխավարկած, որը փորձում են առաջ տանել ԶԼՄ-ներով և այդ վարկածի շուրջ սկսում են աշխատել։

«Եթե հարձակումը տեղի է ունեցել հանկարծակի, առանց նախնական պայմանավորվածության և պատահական է եղել, այս դեպքում անխուսափելի է անհրաժեշտ պաշտպանության վարկածը, որը փաստ էր։ Հիմա նրանք փորձում են գտնել մի փաստ, որևէ կապ, հեռախոսազանգ հարձակվողներից մեկի հետ, որ մեր տղային փաթաթեն դիտավորյալ պայմանավորված զինված բախման գործընթացը։ Ես իրենց հիասթափեցնեմ, որովհետև, եթե նման բան լիներ, Արմեն Հայթյանը հաստատ միայնակ չէր հայտնվի այդ պատերազմում։ Եղել է հանկարծակի հարձակում և Արմենը դիմել է անհրաժեշտ պաշտպանության, սա միակ հնարավոր վարկածն է։ Նրանք պարտավոր են կիրառել անհրաժեշտ պաշտպանություն,ինչը չի համարվում հանցավոր արարք՝ ըստ ՀՀ քրեական օրենսգրքի»,- ասաց Մուխսիկարոյանը։

Հեղինակ՝ Իզաբել Սահակյան

Աղբյուր` Փաստինֆո