Փաստ ինֆո

«Կամք» ՀԿ հիմնադիր Վահագն Չախալյանը «Փաստինֆո»-ի հետ զրույցում պատմել է պատգամավոր Նիկոլայ Բաղդասարյանի և «Կամք» նախաձեռնության անդամ Արթուր Ալեքսանյանի մասնակցությամբ տեղի ունեցած միջադեպի մանրամասները։

Հիշեցնենք, որ Ալեքսանյանը մեղադրվում է իշխանության ներկայացուցչի նկատմամբ բռնություն գործադրելու սպառնալիք հնչեցնելու համար։ Ըստ պատգամավոր Նիկոլայ Բաղդասարյանի՝ ԱԺ նիստից հետո Ալեքսանյանը հեծանիվով փորձել էր վրաերթի ենթարկել իրեն, ինչի մասին Բաղդասարյանը հայտնել էր ոստիկանությանը: Ալեքսանյանը մայիսի 13-ին ձերբակալվել էր, իսկ երեկ 2 ամսով կալանավորվել:

«Մենք Ազգային ժողովի դիմաց ակցիա ենք իրականացրել, ամոթանք ենք տվել տխրահռչակ կոնվենցիան ընդունելու համար։ «Ամոթի միջանցք» էինք ստեղծել ու դուրս եկող պատգամավորներին ամոթանք էինք տալիս, բացականչում՝ «ամոթ քեզ»։ Մեր ընկերներից մեկը հեծանիվով գնացել է Նիկոլայ Բաղդասարյանի հետևից ու գոռացել՝ «Ամոթ ձեզ»։ Պատգամավորին հեծանիվով հարվածելու միտում չի եղել։ Արթուրը շատ զուսպ է, երկու տարի է իրեն ճանաչում եմ, որևէ անգամ իր կողմից հայհոյանք չեմ լսել»,-«Փաստինֆո»-ին ասաց Չախալյանը։

Նա շեշտեց, որ ԱԺ-ի մոտ սկսված բողոքի ակցիան շարունակել են նախագահական նստավայրի մոտ, այդ ամբողջ ընթացքում ոստիկանության աշխատակիցները եղել են Արթուր Ալեքսանյանի կողքին, սակայն բերման են ենթարկել միայն այն ժամանակ, երբ նա տուն էր գնում։

«Այս ընթացքում նրանք հետևում էին մեզ, նայում էին մեզ, սակայն սպասեցին, որ նա գնա տուն ու ճանապարհին կանգնեցնեն, ցուցադրական բերման ենթարկեն։ Սա անհեթեթություն է, նա կարող էր հանգիստ գնալ ոստիկանություն, եթե իմանար, որ իրեն փնտրում են։ Հավելյալ շոու սարքելու իմաստ չկար։ «Էրեբունի պլազայի» միջադեպի դեպքում ոստիկանապետը ուղեկցեց կասկածյալին, հատուկ նրա համար մեքենայի դուռը բացեց, իսկ Արթուր Ալեքսանյանի դեպքում 22 հոգով, 4 մեքենայով գալիս ու պառկեցնում են ասֆալտին, բերման են ենթարկում, կարծես լուրջ հանցագործ է։ Հետո էլ ոստիկանությունը հաղորդագրություն է տարածում, թե հայտնաբերել է հանցագործի»,-ասաց մեր զրուցակիցը։

Նրա խոսքով, Ալեքսանյանին բերման ենթարկելուց հետո սկսվել է նաև իրեն բերման ենթարկումների շարքն ու 24 ժամվա ընթացքում հասցրել են իրեն 3 անգամ բերման ենթարկել։

«Ասում էին, թե հավաք եմ կազմակերպել, բայց հավաք, որպես այդպիսին, չեմ կազմակերպել։ Առաջին անգամ եկան ասացին քաղաքական հայտարարություն մի արեք, մի ասեք ձերբակալությունը քաղաքական է, հարցնում եմ՝ ինչու պետք է քաղաքական հայտարարություն չանեմ, ասում են՝ պարետի որոշմամբ։ Հետո ասացին, թե պետք է լայվն անջատեմ, կրկին հարցրի թե ինչ պատճառով, ասացին պարետի որոշմամբ, ես էլ ասացի՝ ցույց տվեք պարետի որոշումը, որից հետո բերման ենթարկեցին։ Մի անգամ էլ ընկերներս փորձի համար նախանշված վայրում հավաքվեցին ինձնից 30 րոպե շուտ, ոչ ոքի բերման չենթարկեցին, ես մոտեցա ու բերման ենթարկեցին, ասացին, որ եթե այնտեղ եմ, ուրեմն բողոքի ակցիա եմ իրականացնում»,-պատմեց Չախալյանն ու ընդգծեց, որ ոստիկաններն իրեն ասել են՝ չգնա դատարանի դիմաց, թե չէ կձերբակալեն։

Անդրադառնալով նաև Արթուր Ալեքսանյանի կալանավորմանը՝ մեր զրուցակիցը նշեց, որ նիստը դռնփակ է եղել ու անգամ իրեն թույլ չեն տվել կանգնել դատարանի դռան մոտ։

Հեղինակ ՝ Սոնա Գեւորգյան

Աղբյուր` Փաստինֆո