Փաստ ինֆո

Մեր հիվանդանոցային կարողություններն ընդլայնելու անհրաժեշտություն կար, և մենք սահմանափակումների շրջանում ինֆեկցիոն ոլորտում 300 տեղերը հնգապատկել ենք ու դարձրել 1500 տեղ։ Այս մասին կառավարության այսօրվա նիստի ժամանակ ասաց ՀՀ վարչապետ Նիկոլ Փաշինյանը։

«Մարտին հաշվարկ ունեինք, որ եթե հանկարծ մեզ մոտ իրադարձությունը զարգանա օրինակ իտալական սցենարով, մեկ ամսվա ընթացքում մենք կորոնավիրուսից կունենանք 10 հազար մահ։ Այսինքն` մենք համոզված չէինք, որ հենց այդ սցենարով կընթանա և եթե անկեղծ ասեմ հիմա էլ համոզված չենք, այդ սցենարով կընթանա, թե ոչ։ Ինչքան էլ մեր ռազմավարությունը լինի հետագայում սահմանափակումներին չվերադառնալը, այնուամենայնիվ մենք կարող ենք ստիպված գնալ այդպիսի որոշման»,-ասաց վարչապետը։

Նա նշեց, թե որ պարագայում կարող է դա տեղի ունենալ։ Այն դեպքում, եթե կառավարությունը սիմպտոմով հիվանդներին բուժօգնություն ցուցաբերելու կարողությունները սպառի. «Մեր 2217 ակտիվ դեպքերից միայն մոտ 600-ն է, որոնք որևէ բուժօգնության անհրաժեշտություն ունեն։ Թոքաբորբով 661 հիվանդ ունենք այս պահին։ Նույնիսկ թոքաբորբով հիվանդների 20-25 տոկոսին կարող ենք ասիմպտոմ համարել, որովհետև թոքաբորբի թեթև տեսակներ են, արյան մեջ թթվածնի պարունակությունը ավելի քան բավարար է, այսինքն թեթև թոքաբորբ է։ Բայց եթե պարզվի, որ ունենք ավելի քան 1500 հիվանդ, ովքեր կոնկրետ բուժման անհրաժեշտություն ունեն, ստիպված կլինենք վերադառնալ սահմանափակումների ռեժիմին»,-ասաց վարչապետը։

Աղբյուր` Փաստինֆո