Փաստ ինֆո

ՔԿՀ-ներում որևէ դատապարտյալ և կալանավորված անձ այս պահին չի վարակվել կորոնավիրուսով, ինչը վկայում է, որ կանխարգելման միջոցառումները, որոնք իրականացվել են ՔԿ ծառայության և ՀՀ ԱՆ կողմից, իրենց արդյունքը տալիս է։ Այս մասին հրավիրված ասուլիսին ասել է ՀՀ արդարադատության նախարար Ռուստամ Բադասյանը։

«Իհարկե, կարծում եմ այս իրավիճակը երկար դժվար թե շարունակվի, որովհետև կորոնավիրուսի տարածման տեմպերը և տարածման հեշտությունն անպայմանորեն բերելու է մի իրավիճակի, երբ կունենանք նաև վարակված դատապարտյալ, բայց դա չի նշանակում, որ որևէ կատաստրոֆա կլինի, որովհետև մենք դատապարտյալների հիվանդանոցում արդեն վաղուց նախապատրաստել ենք հատուկ կահավորված երկու մասնաշենք, որտեղ արդյունավետ բուժումը և արդյունավետ վերահսկողությունը, մեկուսացումը հնարավոր կլինի ապահովել »,- ասաց Բադասյանը։

Նախարարը հայտնեց, որ Քրեակատարողական ծառայողների շրջանակներում կան կորոնավիրուսի վարակման դեպքեր, հիմնականում «Վարդաշեն» ՔԿՀ մեկ հերթափոխի մասնակիցներն են վարակված, եղել է 8 դեպք, որից հետո մի քանի կասկածելի դեպք է եղել և թեստավորում է արվել, բայց չցանկացավ կոնկրետ թիվ հայտնել՝ նշելով, որ վստահ չէ, որ գիտեն կոնկրետ թիվ, քնի որ թեստերը դեռ ընթացքի մեջ է։

«Մեկ դեպք ունեցել ենք ծառայողների շրջանում կարծես «Սևան»-ում և «Հրազդան»-ում»,- ասաց նա։
Ինչ վերաբերում է ՔԿՀ-ներում սոցիալական հեռավորության պահպանմանը, Բադասյանը նշեց, որ Հայաստանում ՔԿՀ-ների վիճակը լավագույներից է աշխարհում, այն առումով, որ ծանրաբեռնվածության ցուցանիշը 43 % է։

«Բոլոր մյուս երկրներում, որտեղ հրատապ միջոցառումներ են իրականացրել՝ համաներմամբ ազատ արձակելու և այլ գործողությունների մասով, դրանք ընդամենը պայմանավորված է նրանով, որ 100%-ից ավել էր բեռնվածությունը, այսինքն՝ ցուցանիշների խախտումներ կան։ Մեզ մոտ ՔԿՀ-ները երևի թե այս պահի դրությամբ ամենաանվտանգ վայրն է՝ կորոնավիրուսի տարածման առումով, ինչի մասին վկայում է թվերը, որ զրո դեպք ունենք կալանավորված և դատապարտված անձանց շրջանում »,- նշեց Բադասյանը։

Աղբյուր` Փաստինֆո