Փաստ ինֆո

Բազմիցս ասել եմ՝ երբեք չեմ խախտել օրենքը և Սահմանադրությունը, բայց հասկացել եմ մի բան, որ մեղադրվում եմ այն պատճառով, որ բժիշկ եմ՝ ընտրվել եմ ԱԺ նախագահ, որովհետև որպես ԱԺ նախագահ ես միշտ իմացել եմ, որ պետք է ապահովեմ ԱԺ բնականոն աշխատանքը։ Այսօր տեղի ունեցած դատական նիստից հետո հայտարարել է ԱԺ նախկին նախագահ Արա Բաբլոյանը։ 

Նրա խոսքով՝ բնականոն աշխատանքն ապահովելու համար գոյություն ունի ԱԺ աշխատակազմ՝ 650 հոգուց բաղկացած, որոնց պետությունը վճարում է աշխատավարձ և այդ աշխատակազմը պատրաստում է բոլոր այն փաստաթղթերը, որոնց հիման վրա աշխատում են պատգամավորները։

«Ես ստացել եմ փաստաթուղթ՝ Գագիկ Հարությունյանից և հանձնել եմ իմ աշխատակազմին։ Աշխատակազմը պատրաստել է պատասխան, որով ես հայտարարությամբ հանդես եմ եկել։ Ես ինձ թույլ չեմ տվել, որ ասեմ՝ նոր կանոնակարգով կամ հին կանոնակարգով, այսպես արեք կամ այնպես արեք։ Իրենք արել են այնպես, ինչպես պահանջում է օրենքը։ Բոլորը գիտեն, որ ես չեմ միջամտել։ Ինչ վերաբերում է օրերին, դրանք որևէ նշանակություն չունեն, որովհետև հիմնական օրերը, որոնք ունեն նշանակություն՝ ամսի 5-ն է և 12-ը, որովհետև 5-ին իմ հայտարարությունը հրապարակվել է և երկրորդ հայտարարության օրը՝ 12-ն է։ Մնացած ամսաթվերը, որոնք շրջանառվում են, համարում եմ գործավարական փնթիություն և որևէ իրավական հիմք չունեն»,- ասաց Բաբլոյանը։

Նրա խոսքով՝ երբ օրինակ էր բերում, որ նույն կերպ վերաբերվել է Նիկոլ Փաշինյանին, Արարատ Միրզոյանին, Արտակ Զեյնալյանին, երբ նրանք պաշտոն են ստանձնել, հայտարարությամբ է հանդես եկել,արձանագրել փաստը, բայց պատգամավորներից մեկն իրեն մեղադրել է՝ ասելով՝ Բաբլոյանը ոչ միայն չգիտի, այլև՝ չի կարդում փաստաթուղթը։

«Ես ասացի՝ բարեբախտաբար, որ կարդում եմ, հասկանում եմ, եթե կան մարդիկ, որոնք չեն հասկանում, իրենք թող նորից կարդան, որովհետև, երբ մարդիկ ԱԺ կողմից ընտրվել են վարչապետ, ապա իրավունքի ուժով դադարում է նրա պատգամավոր լինելը, այսինքն՝ որևէ դիմումի կարիք չկա»,- ասաց Բաբլոյանը։

Նրա խոսքով՝ իրեն մեղադրում են մի բանի համար, որ նա չի միջամտել և չի վերցրել իրավաբանի գործն իր վրա։

«Հայաստանում արդեն կարելի է իրավաբաններին էլ մեղադրել, որ, եթե իրենց երեխայի սուր ապենդիցիտը բարդություն է տվել, ինչու ինքը ժամանակին չի կարողացել ախտորոշել և վիրահատել իր որդուն, որովհետև դրա մասին շատ պարզ գրված է գրքերում։ Կարելի է մեղադրել մարդուն, որ ինքը պատճառ է եղել, որ իր որդին ունեցել է բարդություն»,- ասաց նա։

Աղբյուր` Փաստինֆո