Փաստ ինֆո

Այն, որ մենք արդեն երկու տարի ապրում ենք պոպուլիստական իշխանության ժամաանակաշրջանում՝ ազգովի և անհատապես կրելով նրա պատճառած ամենօրյա վնասները, կարծում եմ, օրեցօր ավելի շատերն են համոզվում:

Խոսում են, թմբկահարում, ամենատարբեր հրատապ թեմաներն օրեր շարունակ բերանի ծամոն դարձնելով ու աղաղակելով, սակայն ամեն բան հենց խոսելով էլ՝ դեռ չսկսված՝ ավարտվում է: Եվ դա բոլոր ասպարեզներում է: Առավելագույնը՝ մեկ-երկու սարքովի շոու և շոուի շրջանակում իրականացված օպերատիվ գործողություններ: Հենց այդպես էլ «սկսվեց» ու ավարտվեց քաղաքային իշխանության՝ օպերայի հրապարակը սրճարաններից ազատելու ծրագիրը, որ ավելի շուտ «օպերացիա» էր հիշեցնում, քանի որ դեմոնստրացիան, ցուցադրանքը մի տեսակ հետևում թողեց հանրության և մասնագետների՝ օպերան իրեն անհարիր սրճարաններից ազատելու ցանկությունը: Ապամոնտաժվեցին ընդամենը երկուսը, ըստ ամենայնի անցանկալի սեփականատերերի պատկանողները: Հետո՝ մեծ աղմուկից հետո եղավ երկարատև լռություն:

Նույն կերպ՝ ներկա քաղաքապետի պաշտոնավարման արշալույսին օրերից մի օր «գասկը» մեկ այլ «օպերատիվ» գործողություն իրականացրեց Երևանի արվարձաններից մեկում՝ ասես՝ «կանեփ-կակաչ+թավիշ» համալիր օպերատիվ-կանխարգելիչ գործողությունը արվեր: Գետնատարած մարդիկ փռվեցին ասֆալտին, հետո պարզվեց, որ տվյալ ինքնակամը այնքան էլ ինքնակամ չէր, կամ՝ եթե անգամ ինքնակամ էր, միթե՞ անպայման էր ասֆալտին փռելը: Նմանատիպ օպերատիվ գործողություններ էլի արվեցին, ասենք այդպիսին էր Նար-Դոս փողոցի մի շարք դարն ապրած կրպակների ապամոնտաժումը, բայց սա էլ ցուցադրանքի տարբերակով էր, այլ ոչ՝ որպես աշխատանքային գործընթաց:

Ինչու՞ ենք այդ կարծիքին: Հենց թեկուզ այն պարզ պատճառով, որ այսօր Երևանի տարբեր հատվածներում, բակերում, բազմաբնակարան շենքերին կիպ-կպած նոր շենքերի կառուցման շինթույլտվություններ են տրվում՝ առանց հաշվի առնելու քաղաքաշինական նորմ ու նպատակահարմարություն: Սա իրե՛նց տվածն է, իրե՛նց խախտումներն են և ուրեմն, իրենք ա՞չք են փակում…

Վերջին շրջանում նմանօրինակ շինարարությունների մասին են բարձրաձայնում բնակիչները, սակայն եթե նախկինում նրանց միանում էին զանազան «պատասխանատու» հ/կ-ներ և մասնագիտական հանրություն, ապա այսօր մարդիկ մենակ են մնացել իրենց պայքարում:

Վերջերս նման մի խնդրի մասին մամլո ասուլիս հրավիրելով բարձրաձայնեցին Երևանի Ծարավ Աղբյուր նորակառույց թաղամասի բնակիչները: Շենքերը կառուցվել են, մարդիկ հիպոթեկային վարկավորմամբ, որոշակի սոցծրագրերի շրջանակում ձեռք են բերել բնակարաններ, սակայն այսօր անկախ իրենցից հայտնվել են մի շարք քաղաքաշինական խնդիրների առաջ: Բնականաբար, ցանկացած նոր թաղամաս պիտի ունենա անհրաժեշտ բոլոր ինֆրաստրուկտուրաները՝ դպրոց, մանկապարտեզ, հանգստյան կանաչ գոտի, խանութներ ու դեղատներ: Բայց ահա՝ շենքերը կան, այնտեղ շուրջ 10000 բնակիչ է ապրում, սակայն նախկինում ծրագրված դպրոցի փոխարեն այսօր բազմաբնակարան շենքի կառուցման թույլտվություն է տրվել:

Մինչդեռ այս հատվածում նախկինում ծրագրված էր այգի և դպրոց կառուցել, որն ըստ ամենայնի՝ առկախված է: Իսկ քաղաքային իշխանությունը փոխանակ արդեն իսկ կառուցված բնակելիները սնող կառուցվածքները խթանելու, թաղամասի անհրաժեշտությունների համատեքստում շինթույլտվություններ տրամադրի՝ ուղղակիորեն կառուցապատողների շահն է միայն սպասարկում: Թերևս, կամազների արդեն որդեգրած կանոնով…

Սակայն այսօրինակ կառուցապատումները մայրաքաղաքում մեկն ու երկուսը չեն, բազմաթիվ են:

Դժգոհության մի ալիք էլ Լենինգրադյան փողոցի մատույցներում է ծավալվել, ուր Նոյ թաղամասի սեփականատերերն ու բնակիչներն են ահազանգում , որ իրենց անմիջական հարևանությամբ՝ Լենինգրադյան փողոց 23/7 հասցեում, «Լույսեր» ընկերության կողմից նախաձեռնվել է տասնութհարկանի բազմաբնակարան բնակելի չորս շենքերի համալիրի կառուցում:

Այդ ընկերության վերջերս տարածած հայտարարությամբ՝ իրենց աշխատանքների կատարման համար առկա է ապրիլի սկզբին Երևանի քաղաքապետի տված շինթույլտվությունը, որի համաձայն նախատեսվում է տասնութհարկանի բազմաբնակարան շենքերի համալիրի շինարարության իրականացում, որն անմիջապես նայում է Նոյ թաղամասի մի շարք բնակիչների առանձնատներին և դրանց բակերին:

Այսինքն, քաղաքապետարանը բարձրահարկերի թույլտվություն է տալիս առանձնատնային թաղամասում՝ խաթարելով արդեն իսկ գոյություն ունեցող օրգանիզմի բնականոն գործունեությունը: Ընդ որում ՝ գործող քաղաքաշինական օրենսդրության մի շարք նորմերի անտեսմամբ է դա արվում:

Այս նույն տրամաբանությամբ Երևանի քաղաքապետարանն «արագի մեջ» բազմահարկերի շինթույլտվություններ է տալիս Երևանի տարբեր հատվածներում՝ քաղաքաշինական ակնհայտ խախտումներով՝ շենքերի միջև հեռավորության, հակահրդեհային և այլ պարամետրերի տոտոլ անտեսմամբ:

Հենց այսօր բացահայտ խախտումներով, Երևանի Ավետիսյան 118 հասցեի դեմ դիմաց՝ Համբարձումյան փողոցում հողային աշխատանքներ են իրականացվում՝ բազմաբնակարան շենքի կառուցման համար:

ՈՒ գիտե՞ք ինչն է հետաքրքիր՝ առաջ եթե գոյություն ունեցող ուրբանիստական միջավայրում առանց հանրային քննարկմում-իրազեկման, քաղաքաշինական նորմերի խախտմամբ գեթ մեկ շինթույլտվություն տրվեր, այսպես կոչված՝ քաղակտիվիստները մի կողմից, որոնք, ի դեպ, ներկա քաղաքային իշխանությունն են հենց, մասնագիտական շրջանակները՝ մյուս, զանազան հ/կ-ների մասին էլ չասած… քարը քարի վրա չէին թողնի:

Հիմա համատարած է այս գործընթացը, բայց ոչ մեկի ձայնը չի լսվում: Հատուկենտ ձայներ՝ լուսավոր, բարգավաճ…«Ի տիշինա՜»:

Հեղինակ Մարինե Մինասյան

Աղբյուր` Փաստինֆո