Փաստ ինֆո

Պետությունն արհեստականորեն զրկում է քաղաքացիներին՝ հավաքների հիմնարար իրավունքից, այդ ընթացքում անցկացնում է շատ վիճելի օրենքներ, միևնույն ժամանակ՝ հրահրում է իրավիճակ, որ ինչ-որ մեկին ձերբակալի՝ շատ կասկածելի պայմաններում, մի մեղադրանքով, որով տուժող կարող էր լինել ոչ թե պատգամավորը, այլ՝ ոստիկանը։ Այս մասին «Փաստինֆո»-ի հետ զրույցում ասաց Վահագն Չախալյանի փաստաբան Ռուբեն Մելիքյանը։

Հիշեցնենք, որ մայիսի 11-ին «Իմ քայլի» պատգամավոր Նիկոլայ Բաղդասարյանը ոստիկանություն հաղորդում էր ներկայացրել, թե իրեն փորձել են հեծանիվով վրաերթի ենթարկել՝ կապված իր աշխատանքային գործունեության հետ։

Դեպքի առթիվ հարուցվել է քրեական գործ իշխանության ներկայացուցչի նկատմամբ բռնություն գործադրելու հատկանիշներով՝ ՀՀ քրեական օրենսգրքի 316-րդ հոդվածի հատկանիշներով։ Մայիսի 13-ին ոստիկանությունը հայտարարեց կասկածյալին ձերբակալելու մասին։ Վերջինս «Կամք» հասարակական կազմակերպության անդամներից է եւ բողոքում է «Սեռական շահագործումից և սեռական բնույթի բռնություններից երեխաների պաշտպանության մասին» ԵԽ կոնվենցիայի վավերացման դեմ։

Ի պաշտպանություն ակտիվստի՝ «Կամք»-ի մի քանի ներկայացուցիչները բողոքի փոքրաթիվ ակցիա են իրականացրել իրենց համախոհին ապօրինի ձերբակալելու դեմ, եւ ոստիկանությունը նրանց նկատմամբ վարչական վարույթ է հարուցել, ենթարկել են վարչական ձերբակալման՝ մայիսի 13-ին եւ մայիսի 14-ին։ Փաստաբանի գնահատմամբ՝ ոստիկանության գործողությունները եղել են ոչ իրավաչափ և համարում են չարաշահում՝ հավաքների արգելքի։

Նշենք, որ Վահագն Չախալյանը գտնվել է դատարանի բակում, որտեղ քննարկվում էր ԱԺ պատգամավորին հեծանիվով վրաերթի ենթարկելու գործով կալանքի միջնորդությունը։

«Մարդիկ առանձին-առանձին գնում են դատարանի դիմաց՝ առանց միանալու կոչ անելու, նրանց մեղադրում են հավաք իրականացնելու մեջ, ներկայացնում, ոչ օրինական պահանջ ներկայացնելու մեջ, հետո վարչական ձերբակալման են ենթարկում ոստիկանության իբրև օրինական պահանջը չկատարելու համար »,-ասաց Մելիքյանը։

Փաստաբանի դիտարկմամբ՝ իրավիճակն առաջացել է այն պատճառով, որ պետությունը, կորոնավիրուսի համավարակի պայմաններում, առանց քննարկման անցկացնում է մի կոնվենցիա, որի վերաբերյալ հասարակության մի մասը, մեղմ ասած, ունի հարցեր։

«Սա արդեն իսկ սադրիչ գործողություն կարելի է համարել, որովհետև հանրային աշխատանք չէր իրականացվել՝ կապված Լանզարոտի կոնվենցիայի հետ։

Այնուհետև՝ մարդիկ բողոքում են, հետո պատգամավորներից մեկը բողոք է ներկայացնում ոստիկանություն, անձը ձերբակալվում է, ապա՝ առաջադրվում է այնպիսի մեղադրանք՝ ՀՀ քրեական օրենսգրքի 316-րդ հոդվածով, որը իրավաբանների համար շոկային մեղադրանք էր։ Պարզ էր, որ մարդիկ կլինեին, ովքեր կգնային դատարան, որտեղ քննարկվում է կալանավորման հարցը։ Հետո նրանց պահանջ է ներկայացվում՝ չմտնել լայվ, չանել քաղաքական հայտարարություններ և վարչական ձերբակալման ենթարկում»,- նշեց փաստաբանը։

Հեղինակ՝ Իզաբել Սահակյան

Աղբյուր` Փաստինֆո