Փաստ ինֆո

«Վիրուսի անվան տակ պահպանում են միայն այն սահմանափակումները, որոնք անհրաժեշտ են իշխանության քաղաքական նպատակներից ելնելով: Այստեղ իրավական ոչինչ գոյություն չունի, նպատակը քաղաքական է»,-«Փաստինֆո»-ի հետ զրույցում նման համոզմունք հայտնեց փաստաբան Լուսինե Սահակյանը՝ անդրադառնալով արտակարգ դրության իրավական ռեժիմի երկարացմանը:

Հիշեցնենք, որ կառավարության որոշմամբ, նախ մարտի 16-ից՝ 18։30-ից մինչև ապրիլի 14-ը՝ 17։00-ն, այսինքն` մեկ ամիս ժամկետով Հայաստանում հայտարարվեց արտակարգ դրություն՝ նպատակ ունենալով հանրապետությունում խոչընդոտել նոր կորոնավիրուսային հիվանդության (COVID-19) տարածումը։Ապա՝ այն երկարացվեց եւս 30 օրով՝ մինչեւ մայիսի 14-ը: Այսօր կառավարությունը որոշում ընդունեց արտակարգ դրությունը երրորդ անգամ եւս 30 օրով երկարաձգելու մասին: Միեւնույն ժամանակ, այս ընթացքում արտակարգ դրության սահմանափակումներն աստիճանաբար վերացվեցին, իսկ այսօրվա որոշմամբ , մայիսի 18-ից արդեն կսկսեն աշխատել հանրային տրանսպորտը, մանկապարտեզները, մարզասրահները:
Փաստորեն, պահպանվում է միայն հավաքների ազատության նկատմամբ սահմանափակումը:

Լուսինե Սահակյանի խոսքով, մենք ականատես եղանք, որ իրականում արտակարգ դրության հայտարարումից հետո էլ համապատասխան սահմանափակումները խստորեն չէին պահպանվում, մարդիկ ազատ տեղաշարժվում էին եւ , ըստ էության որեւէ մեխանիզմ չէր գործադրվում, որպեսզի արտակարգ դրության պայմանները պահպանված լինեն:

«Եթե հարցը վերաբերում է հավաքներին, այդ հարցը ավելի լուրջ էր դրված եւ հիմա եւս բոլորս տեսնում եւ ակնհայտ հասկանում ենք, որ երկրում արտակարգ դրություն չկա, քաղաքացիները ազատ տեղաշարժվում են, վարակը տարածվում է, բայց չգիտես ինչու սահմանափակվում է հավաքների ազատության իրավունքը: Բնականաբար, սա քաղաքական ենթատեքստ ունի եւ պայմանավորված է հանրաքվեով, որովհետեւ կարծում եմ, որ իշխանությունը շատ լավ հասկանում է, որ հանրաքվեն իրենց ձեռնտու չէ , ուստի աշխատում են արտակարգ ռեժիմով այն հետաձգել».-ասաց Լուսինե Սահակյանը:

Նշենք, որ Հայաստանում հայտարարված հանրաքվեն կորոնավիրուսի պատճառով հետաձգվեց , իսկ արտակարգ դրության դադարեցումը ենթադրում է հանրաքվեի անցկացում արտակարգ դրության ավարտից 50-60 օրվա ընթացքում եւ իշխանությունը հանրաքվեից խուսափելու համար, փաստորեն ֆորմալ երկարաձգում է արտակարգ դրության ռեժիմը:

Հավաքների իրավունքի սահմանափակումը փաստաբանը պայմանավորում է նաեւ երկրում քաղաքական ընդդիմության գործունեության սահմանափակման , ինչպես նաեւ սոցիալ-տնտեսական խնդիրների սրման պայմաններում ժողովրդական դժգոհության հնարավոր ալիքից խուսափելու նպատակով:

«Սահմանափակումը բնականաբար, հանգեցնում է նրան, որ ընդդիմադիրները չեն կարողանում հավաքներ կազմակերպել, բացի այդ, ժողովրդի մոտ կուտակված խնդիրներ կան , որոնք շատ դեպքերում պոռթկում են եւ բնականաբար, հավաքներով են պայմանավորված: Կանխում են նաեւ այդ հավաքները»:

Ըստ փաստաբանի, եթե արտակարգ դրությունը հայտարարված նպատակին իրականում չի ծառայեցվում, գործ ունենք իրավունքների խախտման հետ. «Եթե դու վիրուսի տարածման խնդրով ես պայմանավորում արտակարգ դրությունը, ապա պարտավոր ես որոշակի գործողություններ ձեռնարկել, բայց ամբողջ հանրապետությունը ազատ տեղաշարժվում է, մարդիկ շփվում են եւ միայն հավաքներն են սահմանափակվում: Արտակարգ դրությունը չի ծառայեցվում հանրության առողջության պահպանման նպատակին, ծառայեցվում է քաղաքական նպատակին: Սա շատ լուրջ խնդիր է »,-եզրափակեց Լուսինե Սահակյանը:

Աղբյուր` Փաստինֆո