Փաստ ինֆո

Մանկապղծության դեմ կոնվենցիայի դրույթներից մեկը վերաբերում է կրթությանը և այն երկրներին խրախուսում է իրենց ազգային կրթական ծրագրերում ունենալ միջոցներ երեխաներին իրենց սեռական անձեռնմխելիության նկատմամբ վտանգներից և ռիսկերից առաջին ազդանշանները ճանաչելու և ինքնապաշտպանվելու ունակություններ տալ։ Այս մասին այսօր ԱԺ ճեպազրույցների ժամանակ ասաց ԱԺ «Իմ քայլը» խմբակցության պատգամավոր Մարիա Կարապետյանը՝ անդրադառնալով Լանզարոտիի կոնվենցիային։

Պատգամավորի խոսքով սա չի նշանակում, որ տարրական և միջնակարգ դպրոցում երեխաները պետք է սովորեն, թե ինչ է առհասարակ սեռական անձեռնմխելիությունը. «Սրանք դժվար բառեր են և դժվարամարսելի են որքանով հասկանում եմ նաև որոշ չափահաս քաղաքացիների համար, ուր մնաց փոքր երեխաների։ Այսինքն՝ այստեղ խնդիրը երեխայի տարիքին հարմարեցված, նրա կարիքների, ունակությունների, հետաքրքրություններին հարմարեցված ունակությունների տրամադրումն է, թե ինչպես ճանաչել չափահաս անձանց վարքի մեջ հնարավոր ազդանշանները, որ իրենց վտանգ է սպառնում այդ չափահաս անձից։ Ինչպես անկաշկանդ օգնություն խնդրել մեծահասակներից, որպեսզի իրենց սեռական անձեռնխելիությունը պաշտպանված լինի»,-ասաց պատգամավորը։

Վերջինս նկատեց, որ երեխաներին սովորեցնել ռիսկերն ու վտանգները վաղ տարիքից ճանաչելը տրամաբանական է, որովհետև հենց այդ տարիքում են, որ ամենախոցելին են. «Ոչ ոք չի պատրաստվում երեխաներին քրեական օրենսգիրքը դասավանդել կամ նրանց մանրամասնությամբ նկարագրել սեռական անձեռնմխելիության նկատմամբ հնարավոր հանցագործությունները։ Այսկերպ մտածելը կարծում եմ՝ բանական չէ։ Խոսքը գնում է վաղ նշանները ճանաչելու և մեծահասակներից օգնություն խնդրելու տարրական ունակությունների մասին»,-նշեց Մարիա Կարապետյանը։

Աղբյուր` Փաստինֆո