Փաստ ինֆո

Հաշվի առնելով երկրում առկա տնտեսական և սոցիալական վիճակը, հաշվի առնելով նաև այն, որ կորոնավիրուսը դեռ երկար է շարունակելու ներկա մնալ մեր կյանքում, որոշեցինք գնալ փուլային որոշակի սահմանափակումների նվազման։ Այս մասին ֆեյսբուքյան ուղիղ եթերի ժամանակ ասաց ՀՀ վարչապետ Նիկոլ Փաշինյանը՝ հավելելով, որ տնտեսական գործունեության այն տեսակները, որոնք չեն բացվել, պատրաստվում են բացել։

Վարչապետը նշեց, որ այս ամեն ինչն արդյունավետ կլինի, եթե անցնենք կորոնավիրուսի դեմ պայքարի ապակենտրոն մարտավարության. «Սա նշանակում է, որ մեզնից յուրաքանչյուրը պետք է որոշակի կանոններ պահպանելու պատասխանատվություն ստանձնի, և ես իմ դիտարկումներով կարող եմ ասել, որ այսօր փողոցներում տեսնում եմ իրար ձեռքով բարևող մարդկանց, կներեք արտահայտությանս համար, բայց իրար քիթը մտած զրուցող մարդկանց։ Սա մեծ պրոբլեմ է և այս տեմպերով կարող ենք շատ լուրջ ճգնաժամի առաջ կանգնել»,-նշեց Նիկոլ Փաշինյանը՝ ընդգծելով, որ մեզնից յուրաքանչյուրը հնարավորություն ունի չվարակվելու և չվարակելու, եթե պահպանի այն կանոնները, որոնց մասին հաճախ խոսվում է։

Նիկոլ Փաշինյանը նկատեց՝ պետք է սովորենք ապրել զուգահեռ, բայց դա չի նշանակում առանց կաշկանդվածության վարակվել, վարակել ուրիշներին և այսպիսի ճգնաժամ ստեղծել. «Եթե այս տեմպերով գնանք և նոր հիվանդացությունների դեպքերն այս տեմպով ավելանան, ստիպված ենք լինելու գնալ սահմանափակումների, և դրանց նպատակն այն է լինելու, որ հանկարծ չունենանք այնպիսի իրավիճակ, որ բուժօգնության կարիք ունեցող որևէ քաղաքացի մնա առանց բուժօգնության»,-հավելեց վարչապետը՝ քաղաքացիներին կոչ անելով խստիվ հետևել հակահամաճարակային կանոններին։

Աղբյուր` Փաստինֆո