Փաստ ինֆո

Միակ փաստարկը, որը փորձեցին մանիպուլյատիվ եղանակով կիրառել դատախազները՝ Արմեն Թավադյանի քրեական գործն էր։ Այս մասին «Փաստինֆո»-ի եթերում ասել է ՀՀ երկրորդ նախագահ Ռոբերտ Քոչարյանի պաշտպանական խմբի անդամ Արամ Օրբելյանը։

Հիշեցնենք, որ 2019թ դեկտեմբերի 19-ին ոստիկանությունը տեսանյութ էր տարածել, որտեղ Ռոբերտ Քոչարյանի աջակիցներից մեկը Քանաքեռում գտնվող իր գրասենյակ է հրավիրել մարտի 1-ի դեպքերից տուժած անձանցից մեկին ու առաջարկել հրաժարվել տուժողի կարգավիճակից, տված ցուցմունքից և չներկայանալ դատական նիստերին՝ հայտնելով, որ պատրաստ է վճարել այն գումարը, որը պետք է պետությունը տրամադրի որպես դրամական աջակցություն։ Բացի այդ խոստացել է, որ իշխանափոխությունից հետո տուժողին կնշանակեն բարձր պաշտոնի։ Նշենք, որ հաղորդագրությունը տարածվել էր այն ժամանակ, երբ վերաքննիչ քրեական դատարանը ՝դատավոր Լուսինե Աբգարյանի նախագահությամբ, գտնվում էր խորհրդակցական սենյակում՝ քննարկելու Ռոբերտ Քոչարյանի խափանման միջոցի վերաբերյալ միջնորդությունը, իսկ որոշման հրապարակումը նախատեսվում էր դեկտեմբերի 20-ին։ Դեպքի առթիվ հարուցվել էր քրեական գործ, որի շրջանակներում մեղադրանք է առաջադրվել «5-րդ ալիք» ՀԸ սեփականատեր Արմեն Թավադյանին և Ռոբերտ Քոչարյանի ենթադրյալ աջակից Վարուժան Մկրտչյանին։ Գործն այժմ դատարանի վարույթում է։

Ռոբերտ Քոչարյանի խափանման միջոցը փոխելու, նրան կալանքից ազատելու փաստաբանների միջնորդությունների քննարկելիս էլ մեղադրող դատախազը «հիշեցրել» էր Արմեն Թավադյանի վերաբերյալ քրեական գործը՝ նշելով, որ Ռոբերտ Քոչարյանի կողմից գործի քննությանը խոչընդոտելու ռիսկն առկա է և կա նման նախադեպ։

Օրբելյանը վստահեցնում է՝ Արմեն Թավադյանի գործն ի սկզբանե ստեղծված արհեստածին գործ էր՝ շոու սարքելու համար և դրա արդյունքում փորձել են վերաքննիչ դատարանից ստանալ ցանկալի որոշումը, որը ստացվել է։

«Երբ ծանոթացանք նյութերին, ակնհայտ մանիպուլյատիվ ձևակերպումներ է՝ կտորներ են հանված ամբողջ տեքստից, փորձել են կտորներ հավաքել և հեռուստատեսային հաղորդում են սարքել։ Ըստ քննության՝ մի վկայի են փորձել կաշառել, ով 2009թ-ին, թե 2008թ և 2018-19թթ երկու անգամ էլ ասել է՝ ես ոստիկան եմ եղել, ես ծառայություն եմ կատարել այստեղ, ցուցարարներն ինձ վրա նետել են իր, ոտքս կոտրել են, շարունակել եմ ծառայությունը, հետո տեսել եմ, որ ոտքս ուռել է, գնացել եմ հիվանդանոց։ Ուզում եմ հասկանալ՝ կաշառում են, որ ի՞նչ փոխվի, ասի՝ ցուցարարներն ինձ չեն խփել, ոտքս չի կոտրվել, խփողը ցուցարարը չի եղել։ Կարո՞ղ է այսօր երեկոյան Հանրային ՀԸ-ով հաղորդում գնալ, կարող է, իհարկե կարող է»,- ասաց նա։

Տվյալ վկայի ցուցմունքը որեւէ առնչություն չի ունեցել եւ չունի ՀՀ երկրորդ նախագահ Ռոբերտ Քոչարյանին առաջադրված մեղադրանքի հետ։

Աղբյուր` Փաստինֆո