Փաստ ինֆո

Ինչ քայլ էլ ձեռնարկեն, ըստ գործող սահմանադրական կարգավորումների, չեն կարող առանց Սահմանադրությունը խախտելու այդ գործընթացները լուծել , - «Փաստինֆո»-ի հետ զրույցում ասել է սահմանադրական իրավունքի մասնագետ, իրավաբանական գիտությունների թեկնածու Վարդան Այվազյանը։

Նշենք, որ մամուլում շրջանառվող տեղեկությունների համաձայն՝ օրենսդիր իշխանության իշխող խմբակցությունը ՍԴ «հարցը» լուծելու համար քննարկում է երկու տարբերակ՝ ՍԴ 7 դատավորի թեկնածու առաջադրելն ու ընտրելը կամ ԱԺ-ի կողմից Սահմանադրության 213-րդ հոդվածի փոփոխությունը, որն էլ իր հերթին ունի երկու տարբերակ՝ կամ կդադարեցվեն ՍԴ 7 դատավորների լիազորությունները, կամ կկիրառվի պաշտոնավարման 12-ամյա ժամկետի սահմանափակումը, որի հիմքով կդադարեցվեն ՍԴ երեք դատավորների՝ Ալվինա Գյուլումյանի, Ֆելիքս Թոխյանի և Հրանտ Նազարյանի պաշտոնավարումը:

Ըստ սահմանադրագետի՝ նշված գործողություններն իրենց մեջ խախտումներ են ենթադրում ու ՍԴ կազմը փոխելու միակ ճիշտ տարբերակը նոր Սահմանադրության ընդունումն է։

«Անկախ այն հանգամանքից, որ Սահմանադրության դրույթները նշված ոլորտի սահմանադրական կարգավորումները մեղմ ասած շատ հեռու են կատարյալ լինելուց։ Խոսքը վերաբերում է հենց այն հանգամանքին, որ ՍԴ-ն չպետք է իրավունք ունենա որոշելու Սահմանադրական փոփոխությունների նախագծի սահմանադրականությունը»,- ասաց սահմանադրագետն ու ավելացրեց. «Ինչ քայլ էլ ձեռնարկեն, ըստ գործող սահմանադրական կարգավորումների, չեն կարող առանց Սահմանադրությունը խախտելու այդ գործընթացները լուծել։ Կարծում եմ՝ ամենաիդեալական տարբերակը, որը Սահմանադրության նմանատիպ խախտման հետ որևէ աղերս չէր ստեղծի և ընդհանրապես հեղափոխության գործընթացը կամբողջացներ, միանգամայն նոր Սահմանադրություն ընդունելն է»։
Վարդան Այվազյանի կարծիքով՝ նոր Սահմանադրության ընդունմամբ կլուծվեն բոլոր տեսակի խախտումները, բայց մյուս կողմից էլ շատ մեծ մտավախություն ու կասկած ունեմ, որ նեղ մասնագիտական առումով ներկայիս ձևավորված սահմանադրական հանձնաժողովը փաստացի իր ունակություններով չի կարող գրել կատարյալին մոտ նոր Սահմանադրություն, որը հետագայում պարբերաբար փոփոխությունների ենթակա չլինի »,- ասաց Վարդան Այվազյանը։

Դիտարկմանը, որ, եթե նոր Սահմանադրություն չստեղծվի և փորձեն փոփոխություններ կատարել Սահմանադրության արդեն առկա նորմերում՝ շրջանցելով և խախտելով օրենքը, արդյո՞ք դա հետագայում չի հանգեցնի նոր քրեական գործերի հարուցման, սահմանադրագետը պատասխանեց, որ այն դրույթները, որոնք պետք է խախտվեն, անտրամաբանական են և Սահմանադրության ոգուն, էությանը չեն համապատասխանում, բայց, եթե մենք ունենք այդպիսի գործող կարգավորումներ և երկու տարի առաջ «Թավշյա հեղափոխությունից» անմիջապես հետո չդադարեցվեց գործող Սահմանադրությունը, բնականաբար օրինականության տեսակետից լինելու են խոցելի և կարող են խնդիրներ առաջացնել։ Նրա խոսքով՝ Սահմանադրություն գրելը և ընդունելը բարդ խնդիր է, բայց անիրականանալի չէ, եթե վերանայվի գործող հանձնաժողովի մասնագիտական կազմը։

«Որպեսզի հետագայում իրավական առումով, ընթացակարգերի առումով լինի անխոցելի, որպեսզի մեղադրանքներ չհնչեցվեն, ամենաիդեալական տարբերակը նոր Սահմանադրության ընդունումն է՝ նոր պետականության և նոր հասարակության մոդելով։ Դա անհնար չէ, եթե մասնագիտական կազմը վերանայվի»,- ասաց Այվազյանը։

Դիտարկմանը՝ արդյո՞ք իշխանությունը պատրաստ կլինի վերանայել հանձնաժողովի մասնագիտական կազմը, թե կնախընտրեն գնալ նախկինների ճանապարհով՝ ստեղծելով իշխանությանը հաճո Սահմանադրություն, Այվազյանը պատասխանեց. «Եթե Ձեր նշած սցենարով գնան, այսինքն՝ եթե իրենց անհրաժեշտ է ոչ թե բարձր որակ ունեցող պետության և հասարակության մոդել, այլ՝ սեփական հարմարավետությունն ապահովող մոդել, ուրեմն, եթե դիտարկենք սեփական հարմարավետության կտրվածքով, որևէ փոփոխություն Սահմանադրության մեջ իմաստ էլ չունի կատարել։ Գործող Սահմանադրությունը հենց այդ հարմարավետությանը շատ լավ ծառայում է, քանի որ Սահմանադրության նախորդ հեղինակներն այնպես են արել, որ Սահմանադրության հետագա ճակատագիրը լինի իրենց տոտալ վերահսկողության տակ»։

Հեղինակ՝ Իզաբել Սահակյան

Աղբյուր` Փաստինֆո