Փաստ ինֆո

Ճիշտ չէ, որ Մարդու իրավունքների պաշտպանը մեկնաբանի վարչապետի ելույթը այն առումով, որ դա նաև քաղաքական բնույթի ելույթ է։ Այս մասին ԱԺ-ում լրագրողների հետ զրույցի ժամանակ ասաց ՀՀ մարդու իրավունքների պաշտպան Արման Թաթոյանը՝ անդրադառնալով ՀՀ վարչապետ Նիկոլ Փաշինյանի ԱԺ վերջին ելույթին։

Արման Թաթոյանն ընդգծեց, որ կան կանոններ, որոնք չափազանց կարևոր են. «Այն կանոնները, որոնք ես նախանշել էի, դրանք միջազգային սկզբունքների վրա էին հիմնված և հատուկ էի գրել կանոններ, որոնք վերաբերում են բոլորին, բայց հատկապես կարևոր են վստահության բարձր մանդատ ստացած քաղաքական մեծամասնության և դրա յուրաքանչյուր ներկայացուցչի համար։ Կարևոր է ցանկացած խոսքում չօգտագործել այնպիսի հայտարարություններ, որոնք վիրավորում են դիմացինին։ Վիրավորանքը ծնում է երկրորդ վիրավորանք, հիմա վիրավորում են էն մյուսը պատասխանում է, էն մյուսն ավելի շատ է պատասխանում և այդպես լարվածությունն աճում է և կարող են լինել դեպքեր, որ անգամ բռնության վերածվի»,-ասաց Արման Թաթոյանը։

Դիտարկմանը, որ վարչապետն իր ելույթում նշել է, որ իրենց իշխանությունը 2 տարի շարունակ հոգեբանական բռնությունների են ենթարկվում, իշխանական խմբակցության կանանց սոցցանցերում սպառնալիքներ են ուղղում, Արման Թաթոյանն ասաց, որ մթնոլորտի լարվածության թուլացման հետ կապված մշտապես աշխատանքներ է տանում. «Ինձ համար կապ չունի իշխանության ներկայացուցիչ է, հասարակ քաղաքացի է, եթե կա բռնության սպառնալիք, եթե կա վիրավորանք, եթե կա ատելություն ու բռնություն դա դատապարտելի է»,-ասաց Արման Թաթոյանը։

Հարցին՝ արդյոք վարչապետի՝ «կփռենք ասֆալտին», «կծեփենք պատերին» արտահայտությունները նույնպես չեն ծնում բռնություն, Արման Թաթոյանը ձեռնպահ մնաց քաղաքական բնույթի մեկնաբանությունից. «Անկախ կարգավիճակից, ավելին՝ որքան բարձր է կարգավիճակը, այնքան մեծանում է պատասխանատվությունը և այդ առումով բեռը, բայց կարգավիճակը կապ չունի, խոսքը բոլորին է վերաբերում։ Ինձ չի հետաքրքրում, թե ինչ կարգավիճակ ունեցող մարդ է, ինչ իրավիճակում է արել այդ արտահայտությունը, եթե արտահայտել է վիրավորանք և այն դա անթույլատրելի է, անկախ նրանից, թե ով է անում և ում է ուղղված»,-հավելեց Արման Թաթոյանը։

Աղբյուր` Փաստինֆո