Փաստ ինֆո

ԱԺ «Լուսավոր Հայաստան» խմբակցությունը դեռ քննարկում է իր հետագա քայլերը։ Երբ որոշում լինի հայտարարությամբ հանդես կգան։ Այս մասին այսօր «Փաստինֆո»-ին հայտնեց խմբակցության քարտուղար Գևորգ Գորգիսյանը։

Հարցին, քննարկվու՞մ է մանդատը վայր դնելու տարբերակը, Գորգիսյանը բացասական պատասխան տվեց ու ասաց, որ մանդատը վայր դնելը որևէ օգուտ չի տա։

«Այդ դեպքում գոյություն ունեցող դիկտատուրան ավելի կուժեղանա։ Մեզ մեր մանդատները տվել են ՀՀ քաղաքացիները՝ դիմակայելու Նիկոլ Փաշինյանի դիկտատուրային»,-ասաց «Լուսավոր Հայաստան» խմբակցության քարտուղարը։

Հիշեցնենք, որ այսօր մայիսի 8-ին ԱԺ-ում տեղի ունեցած ծեծկռտուքի կապակցությամբ  «Լուսավոր Հայաստանը» հանդես է եկել հայտարարությամբ՝ նշելով, որ «Վարչապետը միտումնավոր «Լուսավոր Հայաստանին» պիտակավորում է որպես «նախկինների» ներկայացուցիչ, որպեսզի իր պատգամավորների խուլիգանական վարքագիծն արդարացվի իր համակիրների աչքերում»։

«Ավելին, իմքայլականներն իրենց բոլոր ընդդիմախոսներին եւ քննադատներին ներկայացնում են որպես ժողովրդի եւ պետության թշնամիներ, հակապետական տարրեր, որոնց նկատմամբ հաշվեհարդարն արդեն, իսկ «լեգիտիմացված» է։
Սույն միջադեպը եւ դրան հաջորդած մեկնաբանությունները վառ վկայությունն են կառավարող թիմի անհանդուրժողականության եւ քաղաքական անհասունության։ Նրանք առաջնային պլան են մղել իրենց անսխալականության եւ անպատժելիության արատավոր սկզբունքները։

Սա ամբողջատիրական մտածողության դրսեւորում է, ինչի վերջնական հանգրվանը կոշտ ավտորիտարիզմն է։ Ընդամենը երկու տարում Փաշինյանը հեղափոխության առաջնորդից վերածվեց միայն իր կուսակցականների եւ իրեն սատարող ֆեյսբուքյան փոքրաթիվ խմբակների վարչապետի։ Հանրային ներուժը համախմբելու եւ ի շահ երկրի ծառայեցնելու փոխարեն, նա պառակտում եւ ծվեն-ծվեն է անում ռեսուրսները. «մոդելավորում» հասարակությանը տարբեր շերտերի, պիտակավորում քաղաքացիներին հեղափոխականների եւ հակահեղափոխականների, սեւերի եւ սպիտակների, հերոսների եւ դավաճանների։ Այս մոտեցումը չափազանց վտանգավոր ական է Հայաստանի Հանրապետության պետականության հիմքերում»,- նշված է հայտարարության մեջ։

Հեղինակ՝ Սոնա Գեւորգյան

Աղբյուր` Փաստինֆո