Փաստ ինֆո

Երբ իմ գործընկերներին ասում էի, որ մենք կանգնած ենք վտանգավոր ջրբաժանի առաջ և ասում էի, որ ատելությունն ուղղակի կազմաքանդում է հասարակությունը, հենց այս ամբիոնից իմ գործընկերներն ասում էին՝ դե տիկին Զոհրաբյան, կարող է Ձեզ չեն սիրում, դրա համար դուք ատելության գերդոզա եք տեսնում։ Այս մասին այսօր ԱԺ-ում ասաց «Բարգավաճ Հայաստան» խմբակցության պատգամավոր Նաիրա Զոհրաբյանը։

Նա ընդունեց, որ իրեն չսիրողներ կան, բայց ինքը երբեք գիր-ղուշ չի արել, որպեսզի պարզի, թե ով է իրեն սիրում, ով չի սիրում: Ապա ավելացրեց, որ այն ինչ կատարվում է այսօր, ամենաթողության արդյունք է և ինքը չի խոսում ֆեյք ինդուստրիայի թափթփուկների մասին, ովքեր թաքնվում են տարբեր անունների տակ, այլ խոսում է իրական օգտատերերի մասին:

«17 անգամ ինձ այրելու կոչ են արել, 7 անգամ՝ գլխատելու, 4 անգամ՝ քառատելու և 6 անգամ՝ կախելու, և պետությունը ոչինչ չարեց ինձ պաշտպանելու համար»,- ասաց Զոհրաբյանը։

Նա շեշտեց՝ գնահատում է բոլոր այն օրենքները, որոնք կզսպեն ատելության ու թշնամանքի խոսքը, սակայն չի հավատում, որ միայն օրենսդրական կարգավորումներով հնարավոր կլինի խնդիրը լուծել։

«Եթե մենք քաղաքական ուժերով, լրատվամիջոցներով, քաղհասրակությամբ չգանք բարոյական համաձայնության, որ սա կարմիր գիծ է, սրանից այն կողմ որևէ մեկս չենք անցնում, ապա որևէ օրենք այս հարցը չի կարգավորելու ու խորհրդարանում, դրանից դուրս անընդհատ նման տգեղ, ցավալի, ցածրակարգ բանավեճեր են լինելու»,-ասաց պատգամավորը։

Զոհրաբյանն առաջարկեց հրավիրել լսումներ մեդիայի, քաղհասարակության ներկայացուցիչների հետ և պայմանավորվածություն ձեռք բերել, որ լրատվամիջոցները չեն հեռարձակի այն խոսքը, որտեղ թշնամանք ու ագրեսիա կլինի։

«Քաղտեխնոլոգներից մեկի խոսքերի տակ գրել էին՝ երեխեքդ ռակ ընկնեն...գիտեք, ես հասկանում եմ, որ հասարակության մեջ կա մի սեգմենտ, որն անընդհատ ինքնակայանալու, ինքնահաստատվելու խնդիր ունի։ Ես ուսումնասիրեցի, թե որ տեսակի մարդիկ են հայհոյում սոցցանցերում և շատ հետաքրքիր է, որ դրանք այն մարդիկ են, ովքեր ունեն չսիրվածության բարդույթ։ Ես զարհուրեցի, որ մեր երկրում այսքան չսիրված կին ու տղամարդ կա»,-ասաց պատգամավորը։

Աղբյուր` Փաստինֆո