Փաստ ինֆո

Տավուշի մարզում բողոքի ակցիա չի եղել։ Երկու գործարարի միջև վեճ կա և ոչ թե գյուղացիներն են փորձել ճանապարհ փակել, այլ գործարարներից մեկն իր շրջանակով է փորձել փակել ճանապարհը, ինչը մենք թույլ չենք տվել։ «Փաստինֆո»-ի հետ զրույցում այս մասին ասաց Տավուշի մարզպետ Հայկ Չոբանյանը՝ անդրադառնալով երեկ մարզում տեղի ունեցածին։

Հիշեցնենք, որ մամուլում տարածվել էր տեղեկատվություն առ այն, որ Տավուշի մարզում լարված իրավիճակ է։ Ըստ լրատվամիջոցների՝ Խաշթառակ գյուղի բնակիչներն ի նշան բողոքի, փակել են ճանապարհը։ Վերջիններս բողոքել են Աղստև գետի վրա կառուցված ՀԷԿ-ից, որ գետը լցվում է «Գետափ» հանգստյան գոտու տարածք՝ ողողելով շենք-շինություններն ու խաղահրապարակները։

Տավուշի մարզպետը նկատեց՝ գործարարը, ով նախաձեռնել էր այդ ամենը, Խաշթառավ գյուղից է, ինչի պատճառով էլ հրապարակման մեջ նշվել է գյուղի անունը, բայց բողոքողներն ամենևին էլ գյուղացիները չեն եղել. «Կա վեճ երկու գործարարների միջև և այդ վեճը քաղաքաշինական է։ Անցած տարի ապրիլին նախաձեռնել էինք, որ այդ հարցով երկու գործարարները միասին համաձայնության գան, բայց քանի որ համաձայնության չեկան, մենք մայիս ամսին ուսումնասիրություն կատարեցինք, նախնական հայտնաբերեցինք, որ կան որոշակի շեղումներ և գործը հանձնեցինք դատախազությանը։ Չկա որևէ անգործություն, որի մասին խոսվում է։

Գործատուներից մեկը ՀԷԿ-ի հետ է կապված, մյուսը՝ հանգստյան գոտու։ Դրանք իրար հարևանությամբ են գտնվում և ունեն հողային, քաղաքաշինական բողոքներ։ Դրան գումարվում է նաև այն, որ վերջին օրերին Աղտևի մակարդակն աննախադեպ բարձրացել է։ Վերջին անգամ նման մակարդակի հասել է 1998 թվականին, իսկ այդ շինարարությունները եղել են 98թ.-ից հետո։ Այսինքն` իրենց գործունեության ողջ ընթացքում գետի այսպիսի վարարում չի եղել և իրավիճակը նաև այս տեսանկյունից է սուր»,-նշեց Հայկ Չոբանյանը։

Մարզպետը հայտնեց, որ Հիդրոմետ ծառայությունից երեկ են տվյալներ ստացել, որ նորմատիվից բավական բարձր ցուցանիշներ են եղել, ինչի համար վերջին օրերին ուսումնասիրություններ են ընթանում ոչ միայն այդ վայրում, այլև ամբողջ գետի երկայնքով։ Հայկ Չոբանյանի խոսքով՝ առնվազն չորս գործատուի մոտ, որոնք հիմնականում հանգստյան գոտիներ են, հայտնաբերել են որոշակի վնասներ. «Դեռ ուսումնասիրություն պետք է լինի՝ հասկանալու արդյոք այդ գործատուները ժամանակին շինարարության ժամանակ պահել են համապատասխան նորմատիվները, թե ոչ»,-ասաց մարզպետը։

Վերջինս կարծում է, որ այս դեպքն իր մեջ պարունակում է նաև որոշակի սպեկուլյացիա, հակառակ դեպքում բողոքող գործարարը կհայտարարեր, որ նախորդ տարի այս հարցով ուսումնասիրություն է եղել և ավելին, կասեր, որ գործը գտնվում է դատախազությունում. «ՀՀ օրենսդրությամբ դրանից առավել սուր ընթացք վեճի համար, քան այն է, որ փոխանցվել է դատախազություն, չկա։ Այս միջադեպի առաջին դասն այն պետք է լինի, որ մարդիկ սովորեն անկեղծ և բարեկիրթ լինել և որևէ մեկի մտքով չանցնի, որ կարող է միջպետական ճանապարհը փակել իր կամակորությունների և սպեկուլյացիայի պատճառով։ Այդ է պատճառը, որ համապատասխան խիստ միջոցներ կձեռնարկենք այն մարդու նկատմամբ, ով հրահրել է ճանապարհը փակել։ Սակայն ճանապարհն, ըստ էության, չի փակվել, քանի որ փաստացի ճանապարհը փակ է եղել մոտ 1.5-2 րոպե։ Մեզ հաջողվել է կանխել այդ փորձը։ Մեր նպատակն է ամբողջովին վեր հանել սպեկուլյացիան և պատժել այդ մարդկանց, որ այս կրկնությունները բացառվեն ու նմանատիպ դեպքեր այլևս չկրկնվեն։ Երևի այդ մարդիկ սովորել են, որ նմանատիպ հարցերը զոռբայությամբ են լուծվում, բայց ՀՀ-ում այլևս այդպես չի լինելու»,-ասաց մարզպետը։

Նշենք, որ մամուլում նշվել էր ԱԺ նախկին պատգամավոր Խաչատուր Քոքոբելյանի անունը և հարցին, թե ով է երկրորդ գործարարը, Հայկ Չոբանյանը պատասխանեց. «Կարևոր չէ, որ անուններ տամ։ Կարևորն այն է, թե ինչի մասին է երևույթը։ Թե ով է այդ գործարարը, ինչ է անուն-ազգանունը, այս պահին ինձ համար էական չէ»։

Մարզում այս պահին իրավիճակը հանգիստ է։ Մարզպետը հույս հայտնեց, որ երեկվա իրենց միջամտությունը և զգուշացումներն իրենց դերը կունենան և այլևս որևէ ինքնագործունեություն չի լինի։

Աղբյուր` Փաստինֆո