Փաստ ինֆո

Մանդատը, որը ստանձնել եք ոչ միայն Ձեր զենքն է՝ մի շարք լիազորություններով եւ առավելություններով հանդերձ, այլեւ խաչն է՝ մի շարք պարտականնություններով եւ պատասխանատվության ծանրությամբ հանդերձ։ Այս մասին ֆեյսբուքյան իր էջում գրառում է արել սահմանադրագետ Գոհար Մելոյանը:

«Դուք եք երկրում հանրության կողմից առաջնային մանդատ ստանձնած պաշտոնատար անձինք, Ձեր վարքագիծն օրինակելի եւ վարակիչ է, որի արտացոլումը տեսնելու եք նաեւ Ազգային ժողովի նիստերի դահլիճից դուրս, իսկ գործունեության հետեւանքներն առնչելի յուրաքանչյուրիս, այդ թվում՝ ձեզ եւ ձեր ընտանիքներին։

Հնչեցված հարցադրումներին առ այն, թե արդյոք անհրաժեշտ չէ իրավական փաստաթղթով սահմանելու պատգամավորի վարքագծի կանոններ՝ ստորեւ ներկայացնում եմ «ՀՀ Ազգային ժողովի պատգամավորի գործունեության երաշխիքների մասին» օրենքով, արդեն իսկ, սահմանված պատգամավորական էթիկայի կանոնները։

Մասնավորապես՝ պատգամավորն ինչպես իր լիազորությունների իրականացնելիս, այնպես էլ՝ ԱՄԵՆՕՐՅԱ վարքագծում պարտավոր է պահպանել պատգամավորական էթիկայի կանոնները, որոնք են.

1) հարգել օրենքը և ենթարկվել օրենքին.

2) հարգել հանրության բարոյական նորմերը.

3) պահպանել Ազգային ժողովի, նրա հանձնաժողովների նիստերի և խորհրդարանական լսումների անցկացման կարգը.

4) իր լիազորություններն իրականացնելիս չառաջնորդվել իր կամ իր հետ փոխկապակցված անձանց անձնական շահերով.

5) չօգտագործել պատգամավորի պաշտոնի հեղինակությունն ի շահ իրեն կամ այլ անձի.

6) իր գործունեությամբ նպաստել Ազգային ժողովի նկատմամբ վստահության և հարգանքի ձևավորմանը.

7) ամենուր և ցանկացած գործունեությամբ զբաղվելիս դրսևորել պատգամավորին վայել վարքագիծ.

8) հարգալից վերաբերմունք ցուցաբերել քաղաքական ընդդիմախոսների, Ազգային ժողովում հարցերի քննարկման մասնակիցների, լրագրողների, ինչպես նաև բոլոր այն անձանց նկատմամբ, որոնց հետ պատգամավորը շփվում է իր լիազորություններն իրականացնելիս»,- ասվում է գրառման մեջ:

Աղբյուր` Փաստինֆո