Փաստ ինֆո

«Իմ քայլն» ունի հստակ դիրքորոշում առ այն, թե ինչ քաղաքական հետևանքներ պետք է ունենա ուրբաթ օրն ԱԺ-ում ԼՀԿ ղեկավար Էդմոն Մարուքյանի և «Իմ քայլը» խմբակցության պատգամավոր Սասուն Միքայելյան իր միջև ծագած ծեծկռտուքը։ Այս մասին ԱԺ-ում հայտնել է «Իմ քայլը» խմբակցության ղեկավար Լիլիթ Մակունցը։ 

Մակունցը նշեց, որ արդեն իսկ դատապարտել են տեղի ունեցած միջադեպը, դատապարտել են այն, որ «Իմ քայլը» խմբակցությունը տրվել է սադրանքի, միևնույն ժամանակ դատապարտում են նաև մարդու արժանապատվությունն ամիսներ շարունակ ոտնահարելը։

Մակունցը ժամանակագրություն ներկայացրեց՝ հիշեցնելով, որ Էդմոն Մարուքյանը երդմնակալության արարողությունից երկու օր անց կոնֆլիկտ հրահրեց ԲՀԿ խմբակցության հետ, մոտ երկու շաբաթ առաջ պատգամավոր Գևորգ Պապոյանին պարբերաբար ընդհատում էր և հնչեցրել է սպառնալիք՝ «ձայնդ կտրիր, թե չէ քթիցդ արյուն է գալու» և մի շարք այլ միջադեպեր։

Մակունցի խոսքով՝ կա իրավիճակ, երբ ԱԺ պատգամավոր, ԼՀԿ խմբակցության ղեկավարի եղբայրը շարունակում է սեռական բնույթի հայհոյանքներ հնչեցնելու այդ մշակույթը մեկ այլ պատգամավորի մոր հասցեին։

«Ինչպես կարող է բռնությանը դեմ արժեքներին հավատացող մարդը, այն բանից հետո, երբ Սասուն Միքայելյանը իրեն ապտակել է և դրանից հետո ԲՀԿ խմբակցության կողմից հարգարժան պատգամավորներից մեկը,ոչ միայն ինքը, բայց նաև ինքը, Սասուն Միքայելյանին պահել էին և հնարավորություն չէին տվել նրան որևէ գործողություն անելու, Էդմոն Մարուքյանը, տեսնելով, որ ինքնապաշտպանվելու կարիք չունի և Սասուն Միքայելյանը որևէ վտանգ չի ներկայացնում ոչ իր համար, ոչ իր կողքը գտնվող որևէ պատգամավորի համար, հարձակվում է և ոտքով հարվածում »,- ասաց Մակունցը։

Մակունցը վստահեցնում է՝ «Լուսավոր Հայաստան» խմբակցությունը զոհ չէ. «Լուսավոր Հայաստան» խմբակցությունը կոնֆլիկտի կողմ է, ավելին՝ կոնֆլիկտը հրահրող կողմ է։

Մակունցը նշեց, որ այս ամենը պետք է ունենա քաղաքական հետևանք։

«Քաղաքական հետևանք պետք է լինի, և Սասուն Միքայելյանը պատրաստ է մանդատը վայր դնել, եթե միաժամանակ մանդատը վայր դնի Էդմոն Մարուքյանը։

Ավելին՝ իրենց մանդատները պատրաստ են վայր դնել Արտակ Մանուկյանն ու Վահե Ղալումյանը՝ պայմանով, որ մանդատները վայր են դնում նաև ԼՀԿ պատգամավորներ Հրանտ Այվազյանը և Սարգիս Ալեքսանյանը։ Սա է մեր դիրքորոշումը։ Սա է արդարությունը ու քաղաքական հետևանքը, որը պետք է տեղի ունենա»,- նշեց Մակունցը։

Աղբյուր` Փաստինֆո