Փաստ ինֆո

Երևանի ընդհանուր իրավասության դատարանի աշխատակազմը՝ դատավոր Աննա Դանիբեկյանի անաշխատունակության վիճակում գտնվելու ժամկետների մասին տեղեկացել է ապրիլի 7-ից 9-ն ընկած ժամանակահատվածում՝ դատավոր Աննա Դանիբեկյանի հետ հեռախոսազրույցի արդյունքում։ Այս մասին «Փաստինֆո»-ն տեղեկացավ ՀՀ երկրորդ նախագահ Ռոբերտ Քոչարյանի պաշտպանական խմբի անդամ Հովհաննես Խուդոյանից։

Մինչդեռ նկատենք, որ, ներկայացված անաշխատունակության թերթիկի համաձայն, նրա անաշխատունակությունն սկսվել է մարտի 13-ից։

Ավելի վաղ տեղեկացրել ենք, որ պաշտպան Հովհաննես Խուդոյանը ապրիլի 23-ին դիմում է ներկայացրել Երևան քաղաքի ընդհանուր իրավասության դատարանի աշխատակազմի ղեկավար Ա. Ասլանյանին՝ դատավոր Աննա Դանիբեկյանի անաշխատունակության վերաբերյալ պարզաբանումներ ստանալու նպատակով։ Պաշտպանը հետաքրքրվել էր, թե ե՞րբ է ստացվել դատավորի՝ մինչև ապրիլի 16-ը անաշխատունակության վիճակում գտնվելու մասին տեղեկությունը, արդյո՞ք դատարանի աշխատակազմի ներկայացուցիչը փորձել է ճշտել՝ տիկին Դանիբեկյանը համաձա՞յն է, որ իր բացակայության հիմքերը ներկայացվեն Ռոբերտ Քոչարյանի փաստաբաններին և արդյո՞ք իրականությանը համապատասխանում է համացանցում հայտնված այն տեղեկությունը, որ դատավոր Դանիբեկյանի բացակայության պատճառը քթի վիրահատությունն է: Նախորդ երեք դիմումները, որոնք պաշտպանը հասցեագրել էր Երևանի դատարանի աշխատակազմի ղեկավարին, սպառիչ պատասխան չեն ստացել, ուստի՝ պաշտպանը թվով չորրորդ դիմումն է ներկայացրել՝ նշելով. «Խնդրում եմ, ի վերջո, պատասխանել վերը նշված հարցերին, եթե, իհարկե, մտահոգություն չունեք, որ Ձեր կողմից ներկայացվող պատասխանները կարող են օգտագործվել Ձեր դեմ քրեական վարույթի շրջանակներում»։

Փաստաբանի՝ ապրիլի 23-ին ներկայացրած դիմումին դատարանի աշխատակազմի ղեկավարը պատասխանել է՝ նշելով, որ դատավոր Աննա Դանիբեկյան իր հետ ապրիլի 7-ից 9-ն ընկած ժամանակահատվածում տեղի ունեցած հեռախոսազրույցի արդյունքում տեղեկացրել է, որ դատավորն անաշխատունակության վիճակում է գտնվելու մինչև ապրիլի 16-ը։ Փաստաբանի փոխանցմամբ՝ անդրադարձ է կատարվել նաև դատավոր Աննա Դանիբեկյանի բացակայության հիմքերին, մասնավորապես՝ մինչև պաշտպանի կողմից դիմում ստանալը, այնպես էլ դիմում ստանալուց հետո ճշտել են դատավոր Աննա Դանիբեկյանի բացակայության հիմքերը՝ առողջական վիճակը, հիմնավորող փաստաթղթերը պաշտպաններին ներկայացնելու վերաբերյալ դատավորի դիրքորոշումը, սակայն ստացել են բացասական պատասխան՝ առանց որևէ բացատրության։ Անդրադառնալով քթի վիրահատության մասին տեղեկատվության մասին հարցադրմանը, դատարանի աշխատակազմի ղեկավարը նշել է, որ «Անձնական տվյալների պաշտպանության մասին» ՀՀ օրենքի համաձայն տեղեկատվություն տրամադրել չեն կարող։

Հիշեցնենք, որ մարտի 17-ին նշանակված դատական նիստը հետաձգվել է, թեեւ փաստաբանները նախապես ճշտել էին դատարանից, որ նշանակված նիստը կայանալու է , բայց չի կայացել։ Հետագայում պարզվեց, որ Աննա Դանիբեկյանն անաշխատունակության թերթիկ է վերցրել մարտի 13-ից մինչեւ ապրիլի 16-ը, որի ընթացքում պետպատվերի շրջանակներում քթի վիրահատություն է արել։

Անաշխատունակության ժամկետը լրանալուց հետո էլ՝ ապրիլի 17-ին հայտնի դարձավ, որ դատավորը հիմա էլ հերթական արձակուրդ է վերցրել մինչեւ մայիսի 7-ը։

Աղբյուր` Փաստինֆո