Փաստ ինֆո

Հայաստանում վերջին տարիներին մեծ արագությամբ զարգացած հանրային սննդի ոլորտն այսօր կորոնավիրուսի հետևանքով կրում է բազմաթիվ վնասներ։

«Երեմյան փրոջեքթս»-ը 2020 թվականի հետ կապված մեծ ծրագրեր ուներ։ Մարտ ամսին պատրաստվում էին ընդլայնել ռեստորանային ցանցը և բացել ևս երկու նոր ռեստորան, սակայն համավարակի պատճառով գործընթացը սառեցված է, միայն շինարարական աշխատանքներն են ընթանում։ «Երեմյան փրոջեքթս»-ի 9 ռեստորանները մոտ 1.5 ամիս փակ էին, այժմ գործում են միայն երեքը, սակայն նշում, են, որ այս ընթացքում աշխատանքից որևէ աշխատակցի չեն հեռացրել։

«Աշխատակիցներն օգտվել են աջակցության 8-րդ ծրագրից՝ ստանալով միանվագ աջակցություն։ Մենք հարկադիր պարապուրդի 2/3 մասը վճարել ենք, ինչպես նաև անհատական մոտեցումներ ենք ցույց տվել։ Երկար տարիների թիմակիցներ ունենք, շատերի մոտ հացի, վարձի խնդիր է եղել, փորձել ենք բոլորի կողքին լինել։ Մոտ մեկ ամիս է սննդով ենք ապահովում նաեւ հյուրանոցներում մեկուսացման մեջ գտնվող մարդկանց։ Այս կերպ փորձում ենք աշխատակիցներին հնարավորինս ներգրավել աշխատանքներում»,-«Փաստինֆո»-ի հետ զրույցում ասաց «Երեմյան փրոջեքթս»-ի կոմերցիոն տնօրեն Արշակ Գևորգյանը։

Ընկերությունն այս ընթացքում օգտվել է նաև գյուղատնտեսական ծրագրերից և ավելացրել խոշոր եղջերավոր անասունների քանակը։ Բիզնեսի համար կորուստներն, իհարկե, շատ են, սակայն տնտեսվարողները փորձում են լավատեսորեն տրամադրվել, և ոլորտն այս դժվարին իրավիճակից դուրս բերելու տարբեր միջոցառումներ են ձեռնարկում։ Դրանցից մեկն էլ Ռեստորանների հայկական միության հռչակագիրն է, որով վարձատուներին առաջարկվում է մինչև 50 տոկոս վերանայել առաջիկա մեկ տարվա տարածքների վարձերը։

«Մեր վարձատուներից շատերը մինչև հռչակագիրը կոմպենսացիայի տարբերակներ և՛ առաջարկել են, և՛ լսել են։ Եղել են նաև վարձատուներ, որոնք ընդհանուր եզրեր չեն փորձել գտնել։ Մեր նպատակն ընդհանուր ոլորտի շահն է հետապնդում»,-ասաց Արշակ Գևորգյանը։

Վերջինս նկատեց՝ մոտ 6 ամիս բիզնեսը որևէ շահ դժվար հետապնդի։ Այսօր առաջնային խնդիրն աշխատակազմին և բրենդը պահպանելն է։

Մանրամասները՝ տեսանյութում

Հեղինակ՝ Հասմիկ Կոշկարյան

Աղբյուր` Փաստինֆո